Read tiv Mbaromanu 2 Bible Online

Mbaromanu 2 - tiv bible

Mbaromanu 2

¹Nahan yô, we or u ka u gba nan or ibo tsô ne, wea lu nan nan kpaa u ngu a ityôkwagh i lun a ishô ga gadia kwagh u u lu nan orgen ibo sha mi la, we iyol you kpaa u ngu a ibo sha mi, gadia we u u lu nan ibo la kpaa u ngu eren akaa angara je.

²Se fa ka sha mimi je ijirôron i Aôndo ka i kôr mba ve eren ambaakaa la ye.

³We or u ka u gba nan mba ve eren ambaakaa ne ibo tsô, kpa shi u lu eren a iyol you ne, u ngu henen wer ú war ijirôron i Aôndo?

⁴Shin u ngu tsumen sha kwagh u erdoo Na u ngeen yum la man bem Na man ishimawan Na; u kera fa er erdoo u Aôndo a lu zan a we ken mgemshima gaa?

⁵Ka sha ishima you i cighir man ishima i geman ga la je u lu ombon iyugh sha ci wou iyol you sha iyange i iyugh man m-ande u ijirôron i mimi i Aôndo la ye.

⁶Una na hanma or injar sha aeren a nan.

⁷Mba ve lu keren iengem man icivir man mtsôr sha u eren kwagh u dedoo sha ishima i wan yô, Una na ve uma u tsôron.

⁸Kpa mba ve hembe wan ayol a ve iko, ve hembe mimi ato ve gem ve ongo imo i iferkwagh yô, Una na ve iyugh man ishima i vihin.

⁹Ican man ishima i nyian ia tser hanma or u uma u nan eren ifer, hii sha or u Yuda kua or u Grika kpaa.

¹⁰Kpa iengem man icivir man bem vea lu sha mba ve lu eren dedoo la cii, hii sha or u Yuda kua or u Grika kpaa.

¹¹Gadia hen Aôndo yô, msange u sha dooshima ngu je ga.

¹²Mba ve er isholibo, ve lu a atindi ga la, vea tim di a atindi ga. Kpa mba ve er isholibo ve lu a atindi yô, á ôr ve ijir sha tindi.

¹³Gadia ka mbaungwan a ungwa atindi tsô man vea lu mbaperapera sha ishigh ki Aôndo ga, kpa ka mbaeren a er sha atindi la á na ve ishô ye.

¹⁴Zum u atôatyev a a lu a atindi ga la aa eren akaa a sha tindi la sha gbaaôndo u a yô, á hingir tindi sha ci u ayol a a shin er a lu a atindi ga nahan kpaa.

¹⁵Ve mba tesen er i nger ieren i sha atindi la ken asema a ve je. Imo ve i ken ishima la kpaa ngi eren shiada, mbamhen vev mba nan ibo ayol a ve, gayô, mba nan ishô ayol a ve,

¹⁶ka sha iyange i Aôndo Una ôr akaa a myer a ken ior la ijir ken Yesu Kristu sha ivangeli yam.

¹⁷We yô, u rumun wer i̱ yila u er Oryuda man shi u suur sha atindi shi u wuese wer u ngu a Aôndo,

¹⁸shi u fa ishima Na, shi u karen akaa, u fe a a hembe lun a inja yô, gadia mba tesen we kwagh u ken atindi.

¹⁹U fa doo doo je wer u ngu orhemen u mbaapirashe shi u ngu iwanger i mba ken ime

²⁰man u ngu or u kôôm mbalanenkwagh man or u tesen mba ve lu a kuma ga la gadia u ngu a mpase u kwaghfan man mimi ken atindi.

²¹Nahan we u u tesen mbagenev ne u kera tese iyol you gaa? We u u yee wer, i̱ de iin ga ne, u gema u ngu iini?

²²We u u kaan wer, i̱ de eren idya ga ne, u gema u ngu eren idya? We u u nyagh akombo ne, u gema u ngu yan ishar sha akaa a ken utempel mba mbaaôndo?

²³We u u wuese wer u ngu a atindi ne u gema u ngu lahan Aôndo sha tindi u peren wouwee?

²⁴Gadia ka vough er i vande ngeren nahan er: Ka ne je ne ne i lu tuhwan iti i Aôndo hen atôatyev ye.

²⁵Icôngo yô, ka kwagh u injaa aluer wea kuran atindi yô, kpa aluer wea lu or u peren atindi yô, icôngo you la hingir ipusu ve.

²⁶Nahan yô, aluer or u ipusu nana kura akaawan a ken tindi yô, ipusu i nan la á kera nenge i er ka icôngo nahan gaa?

²⁷Nahan or u nan lu ipusu sha marami kpa nan gem nan we atindi iko la nana na u ibo, we u u lu a kwaghngeren man shi icôngo, kpa u gem u per tindi la.

²⁸Gadia ka or u nan lu Oryuda sha mnenge u sha ashe la tsô nan lu Oryuda ga, shin ka kwagh u sha mnenge u sha ashe man u ken iyol la a lu icôngo ga.

²⁹Gadia ka u nan lu Oryuda ken ishima la je nan lu Oryuda ye, icôngo i mimi kpaa, ka kwagh u ken ishima, ka kwagh u ken jijingi, ka sha kwaghngeren la tsô ga. Iwuese i nan yô, ka i hen ior ga, ka ken Aôndo i dugh ye.