Read tiv Mbaromanu 3 Bible Online

Mbaromanu 3 - tiv bible

Mbaromanu 3

¹Tsô Oryuda hemba sha nyi? Icôngo yô, ngi a inja sha nyi?

²Ngi a inja kpe kpe, sha igbenda kposo kposo kpaa. Kwagh u hiihii yô, i na ve akaaôron a Aôndo sha ikev.

³Tsô ka nana? Aluer mbagenev ken ve yan vea lu jighjigh ga yô, mban u jighjigh ve la gema bunde jighjigh u Aôndo?

⁴Mayange ga, Aôndo A̱ lu u mimi shin er ior cii ve lu mbaaiev nahan kpaa; kape i nger kpaa la er: Ka sha u Ú lu a ishô sha akaaôron a Ou yô, shi Ú hemba sha ijir i U yer la kpaa yô.

⁵Kpa aluer ifer yase i gema i tese perapera u Aôndo yô, shi sé ôr nana? M gbe ôron sha inja i or tsô. Aôndo ka Una haa iyugh Na sha a vese yô, A kera lu u perapera ga shinii? Mayange ga.

⁶A lu nahan yô, Aôndo Una ôr tar ijir nana?

⁷Aluer ka sha aie u ken a mo la man mimi u Aôndo una hemba ngeen sha u nan Un iengem yô, ka nyi i shi i lu ôron mo ijir er m ngu orsholibo nahana?

⁸Ka nyi man se kera gbe eren akaabo sha u akaadoon a̱ due sha mi ga? Kape mbagenev ve lamen sha a vese dang, ve kaan er kape se kaan la. Ijir i i ne ve ibo la ka sha min je.

⁹Tsô ka nana? Shi se hemba je kpa? mayange ga. Gadia se vande nan Mbayuda kua Mbagrika ibo cii ser, mba sha ikev i isholibo.

¹⁰Kape i vande ngeren je la er: Or u perapera ngu ga, môm tsô kpaa ga,

¹¹or u kaven kwagh ngu ga, or u keren Aôndo kpaa nan ngu ga.

¹²Ve cii ve kaha gbenda, kera mba a inja ga, or u eren kwagh u dedoo nan ngu ga, môm tsô kpaa ga.

¹³Gôngor ve ka uwar u lun ivegher je, ka sha iniombor ve ve lu tsughun ior ye, megh ku iyô i bo ku ve sha ityumbujôôgh.

¹⁴Zwa ve iv a ityuhwanev man ishima i vihin,

¹⁵angahar a ve nga zan ayem sha u za haan awambe inya,

¹⁶mtim man ican mba sha igbenda ve.

¹⁷Gbenda u bem yô, ve fa u ga,

¹⁸mba cie Aôndo je ga.

¹⁹Se fa, hanma kwagh u atindi a lu ôron yô, nga ôron a mba ve lu sha ikev i atindigh la sha u ilyam a̱ tôndo hanma or zwa man tar cii u̱ ya ibo sha ishigh ki Aôndo.

²⁰Nahan sha aeren a sha atindi yô, a na ma or u umace ishô sha ishigh Nagh ga, gadia ka sha atindi man i fe asorabo ye.

²¹Kpa hegen yô, i pase perapera u Aôndo ken igbar, kwagh u atindigh ngu sha mi ga, kpa atindi man uprofeti mba eren shiada sha mi,

²²ka perapera u Aôndo u sha jighjigh u i ne [Yesu] Kristu la, sha ci u ve mba ve ne jighjigh la cii, gadia mkposo ngu ga.

²³Gadia ior ca ca ve er isholibo nahan kera mba a iengem i Aôndo ga.

²⁴Nahan mba ne ve ishô iwua sha mrumun u sha mhôôn Na, sha mpaa u a lu ken Kristu Yesu la.

²⁵Un yô, Aôndo vande veren Un er A̱ lu iwom i sha jighjigh u nan, sha awambe a Na. Lu sha u Aôndo Una tese perapera Na gadia asorabo a i vande eren tsuaa sha shighe u ishimawan i Aôndo la yô, A kera wa a iko ga.

²⁶Lu sha u Una tese perapera Na hen shighe u ainge ne, sha u Una lu u perapera man shi Una na mba ve lu ken jighjigh u nan ken Yesu la ishô kpaa yô.

²⁷Tsô ihagh i tan shi ngi hana? I kar a mi sha. Lu sha hanma tindi? Lu sha tindi u aeren la shinii? Ei, lu sha tindi u jighjigh u nan.

²⁸Nahan se fa, or yô, ka sha jighjigh u nan i ne nan ishô ye, kwagh u aeren a sha atindi ngu sha mi ga.

²⁹Shin Aôndo ka u Mbayuda tseeghe? Kera ka u atôatyev kpaa gaa? Mimi je, ka u atôatyev kpaa,

³⁰aluer Aôndo ngu môm tsô yô, u Una na mbaicôngo ishô sha jighjigh u nan, kua mbaipusu kpaa sha ci u jighjigh u nan.

³¹Nahan se mba bunden atindi sha kwagh u jighjigh u nan la shinii? Mayange ga, se mba geman taver a taver atindi je.