Read tiv Mbaromanu 4 Bible Online

Mbaromanu 4 - tiv bible

Mbaromanu 4

¹Tsô sé kaa nana? Aberaham ter wase u tamen sha mlu u iyolough la, zua a nyi?

²Gadia aluer a ne Aberaham ishô sha aerenakaa a na yô, ma a lu a ityôikaa i tan ihagh, kpa ma i lu sha ishigh ki Aôndo ga.

³Gadia icighanruamabera kaa nana? Aberaham na Aôndo jighjigh nahan i gema i nenge kwagh la er ka perapera na je la.

⁴Or u eren tom yô, mba nengen kwagh u i ne nan la er ka iwua ga, kpa ka injar je.

⁵Kpa or u nan eren tom ga, kpa nan gem nan suur sha Un u A ne mba ve fe Aôndo ga la ishô yô, ka i nenge jighjigh u nan u nan ne la er ka perapera u nan je la.

⁶Kape Davidi kpaa a ôr kwagh je la, a wuese msaanyol u or u Aôndo A nenge er nan ngu a ishô, i lu sha aerenakaa ga la.

⁷Saan mba i de ve aferakaa a ve la iyol, shi i cir asorabo a ve kpaa la.

⁸Saan or u Ter A kera we isholibo i nan ker ga la iyol.

⁹Nahan msaanyol ne ngu sha ci u mbaicôngo tseegh shinii, ngu sha ci u mbaipusu kpaa? Gadia se mba kaan ser, i gema jighjigh u nan u Aberaham la i nenge er ka perapera na je la.

¹⁰Nahan i nenge kwagh la nana? Lu shighe u a tsôngo la shin lu shighe u a lu ipusuu? Lu sha shighe u a tsôngo kera la ga, kpa lu shighe u a lu ipusu her la.

¹¹A ngohol ikav i icôngo, lu ikav i tesen sha perapera u sha jighjigh u nan u a lu a mi je er a lu a tsôngo ga la. Lu sha u una lu ter u mbaipusuv mba ve ne jighjigh la cii, sha u i̱ gema kwagh la i̱ nenge er ka perapera ve je la.

¹²Shi a̱ lu ter u mbaicôngo kpaa, ka mba ve tsenge a tsôngo tseegh tsô la ga kpa ka mba ve zenden sha angahar a ter wase Aberaham u a ne jighjigh er a lu ipusu la je.

¹³Ityendezwa i i tôndo a Aberaham man tsombor na er una lu oryandyako u tar la, lu sha gbenda u atindigh ga, kpa lu sha ishô i i zough a mi sha jighjigh u nan la.

¹⁴Aluer ve mba ve ver ishima sha atindi la vea lu mbayandyako yô, jighjigh u nan ma a lu gbilinkwagh, ityendezwa kpaa ma i lu a inja ga.

¹⁵Gadia tindi ve a iyugh kpa ape tindi a lu ga yô, mper u tindi kpaa ngu ga.

¹⁶Ka nahan man i lu sha jighjigh u nan ye, sha u i̱ lu kwagh u mrumun u sha mhôôn, ityendezwa i̱ de lu kwagh u tenger ga sha tsombor na cii, ka mba ve ver ishima sha atindi la tseegh ga, kpa ka ve mba ve lu ken jighjigh u nan u Aberaham la kpaa, un u a lu ter wase cii la.

¹⁷Kape i vande ngeren kpaa la er, M ver u ter u akuraior cii. Lu sha ishigh ki Aôndo u a na Un jighjigh la er Un ka Aôndo u nderen mbakpenev shi A yer akaa a a lu ga la er a̱ lu yô.

¹⁸A na jighjigh sha ishimaverenkeghen ape ishimaverenkeghen ma i lu ga la, er una va hingir ter u akuraior er i vande kaan un nahan la er: Kape tsombor wou ua lu la.

¹⁹A kav er iyol na i lu er ka i kpen nahan, anyom a na lu er akunduataan nahan, sagh u Sara kpaa lu ikôm, nahan kpaa jighjigh na u nan ure ga.

²⁰A kera ta akpelan sha ityendezwa i Aôndo sha u una na jighjigh ga ze, kpa a taver sha jighjigh u nan, lu nan Aôndo icivir.

²¹A fa dedoo er kwagh u A tende zwa yô, shi ngu a agee a eren un kpaa.

²²Ka nahan man i gema kwagh la i nenge er ka perapera na je la.

²³Ka sha ci na tseegh man i nger er, i gema kwagh la i nenge er ka perapera na ga,

²⁴kpa ka sha ci wase kpaa, ka se mba á na se ishô la, se mba se ne Un u A nder Ter wase Yesu shin ku la jighjigh.

²⁵Ka Un u i ne Un ken ku sha ci u akaabo ase shi i nder Un kpaa sha ci u ishô yase ye.