Read tiv 1 Mbakorinte 10 Bible Online

1 Mbakorinte 10 - tiv bible

1 Mbakorinte 10

¹Sarem ka de lanen nen ga, anmgbianev. Uter asev cii lu shin ityô i ibeen shi ve cii ve per zegemnger la.

²Ve cii i er ve batisema ken Mose, ken ibeen kua ken zegemnger la.

³Ve cii ve ya kwaghyan u sha inja i jijingi la môm je.

⁴Shi ve cii kpaa ve ma kwaghman u sha inja i jijingi la môm je. Gadia ve lu man ken vande u sha inja i jijingi u u lu zan a ve ityô la. Vande la yô, lu Kristu je.

⁵Ken ve yô, mba i doo Aôndo a ve ga la ve hemba ngeen gadia A tim ve ken ikôngo.

⁶Akaa ne hingir se ikav i nengen sha mi sha u asorabo a̱ de saren se er a lu saren mbala nahan ga.

⁷De luun nen mbacivirakombo er mbagenev ken ve ve eren nahan ga. Kape i nger la er: Nongoior la tema inya sha u vea ya kwagh vea ma kwagh shi ve kighir ve mough sha sha u vinen amar.

⁸Se yô, se kera er nen idya er mbagenev ken ve ve er nahan la ga, ve gba inya ve kpe iyange i môm ior dubu ikundu kar utar.

⁹Se kera kar nen Ter er mbagenev ken ve lu ve eren man ve gba iyô nahan ga.

¹⁰De gbe nen ahon er mbagenev ken ve lu ve gba ahon man ortiminior gema tim ve nahan ga.

¹¹Akaa ne er ve, lu akav a tesen man i nger a sha u a̱ lu se ityesen, se mba mkur u ashighe a ve sha a vese ne yô.

¹²Nahan yô, or u nan fe er nan tile yô, nana̱ ver ishima er nana kera va gba ga yô.

¹³Ma imeen ngi a tser ne ga, saa i hemban or ga la. Kpa Aôndo yô, ka u jighjigh, Una rumun er i̱ va mee ne i̱ hemba agee a en ga, kpa ken imeen la Una bugh ne gbenda u waren sha er ne tile dông yô.

¹⁴Nahan yô, ne mbadoon mo ishima, yevese nen akombo a civir.

¹⁵M ngu ôron kwagh er ka i ôr a mbakavenkwagh yô. Kar nen kwagh u m kaan ne ne:

¹⁶Iyongo i ishughun i se nan ishughun sha ci u i la yô, kera ka mzough wase a awambe a Kristu gaa? Bredi u se coon la, kera ka mzough a iyol i Kristu gaa?

¹⁷Er bredi la a lu môm yô, nahan se mba se lu kpishi kpaa, se mba iyol i môm je, gadia se cii se ya bredi môm la.

¹⁸Nenge nen sha kwagh u mba i mar ve ve lu Mbaiserael la. Mba ve ye nagh yô, ve zua ve hingir kwagh môm a atse a nanden nagh sha mi la gaa?

¹⁹M ngu ôron nana? Nagh ku i ne sha akombo la, ka ma kwagha? Shin akombo ka ma kwagha?

²⁰Ei. M ngu kaan mer: Akaa a ve senge la yô, ka sha ci u ujijingi mba bov je, kera ka sha ci u Aôndo ve senge a ga. Man sarem u ma ne zough ma ne lu kwagh môm a ujijingi mba bov ga.

²¹Ne fatyô u man iyongo i Ter kua i ujijingi mba bov la imôngo ga. Ne fatyô u yan sha tebul u Ter kua sha tebul u ujijingi mba bov la kpaa ga.

²²Shin se mba bamen Ter ser, A̱ er iwuhee? Shin se hemba Un agee ase?

²³I na ian sha akaa cii. Kpa ka akaa cii man a lu iwasen ga. I na ian sha akaa cii kpa ka akaa cii a lu mmaa ga.

²⁴Ma or nana̱ de keren kwagh u doon sha ci u nan iyol i nan tsô ga, kpa i̱ lu kwagh u doon orgen kpaa.

²⁵Hanma inyam i i teen hen ijiir i teen inyam la yô, gba yan nen tsô, de pin kwagh sha mi ga, sha ci u imo i ken ishima la.

²⁶Gadia tar ka u Ter je, man m-iv u u.

²⁷Aluer orgen u ken mbanan jighjigh ga la nana lôhô ne kwaghyan man a lu ne pe zan yô, hanma kwagh u á za due ne a mi yô, gba yan nen tsô, de pin kwagh sha mi ga sha ci u imo i ken ishima la.

²⁸Kpa aluer orgen nana kaa a ven er: Ngin ka inyamakombo yô, de kera ye nen ga, sha ci u or u nan pase ne kwagh la yô, man sha ci u imo i ken ishima la kpaa.

²⁹Ka imo i ken ishima you la, m er kwagh sha mi ga, ka i orgen la. Gadia ka nyi man ian yam i eren akaa la, imo i ken ishima i orgen ia ôr ijir sha mini?

³⁰Aluer m ngu yan kwagh sha ishughun yô, ka nyi man á va ôr kwagh dang sha a mo sha kwagh u m sughun sha mi laa?

³¹Nahan yô, aluer nea yaan kwagh, shin nea maan kwagh shin nea eren nyityô kwagh kpaa, eren nen akaa cii sha ci u icivir i Aôndo.

³²De ne nen Mbayuda anzughul ga shin Mbagrika shin nongo u Kristu u Aôndo kpaa ga,

³³di er mo kpaa, ken hanma kwagh cii m eren kwagh u doon ior cii nahan, gadia ka mtsera wam iyol yam m lu keren ga, kpa ka u mbagenev kpishi sha u ma ve war yô.