Read tiv 1 Mbakorinte 14 Bible Online

1 Mbakorinte 14 - tiv bible

1 Mbakorinte 14

¹Za nen a dooshima ityô kpa nôngo nen ngegh sha u zuan a uiwua mba sha jijingi, kpa hemba veren nen ishima sha u ôron kwaghôron u profeti.

²Or u lamen ijô yô, ka ior nan er kwagh a ve ga, kpa ka Aôndo je, gadia or môm kpaa nan ongo ga, nan ngu ôron akaa a myer ken jijingi.

³Kpa or u nan er kwaghôron u profeti yô, ka ior je nan er kwagh a ve ye, sha u maan ve a maa man sha u surun ve asema man shi u taver ve asema kpaa.

⁴Or u lamen ijô yô, ka iyol i nan tseegh nan maan ye, kpa or u nan er kwaghôron u profeti yô, ka nongo u Kristu nan lu maan ye.

⁵Sarem u ne cii ma ne lu lamen ijô, kpa hemba saren mo u ma ne ôr kwaghôron u profeti. Gadia or u nan er kwaghôron u profeti yô, nan hemba or u lamen ijô la, saa nana̱ pase i, nongo u Kristu kpaa, u̱ zua a mmaa sha mi.

⁶Hegen yô, anmgbianev, aluer me va her a ven man mea lamen ijô yô, me lu ne a inja nana, saa me ôr ne kwagh sha mpase u sha mnenge shin sha kwaghfan shin sha kwaghôron u profeti shin sha ityesen.

⁷Akaa a lun a uma ga, a a eren imo la kpaa, kape a lu je la, er imar shin adiguve nahan, aluer vea pav imo ga yô, á er nan man á fa kwagh u imar shin adiguve ve kaana?

⁸Gadia ikpamkor kpaa, aluer ia kaa imo hughuluu yô, ka an nana kange iyol i utya?

⁹Kape ne kpaa aluer ne mba lamen ma zwa man á wanger u ungwan ga yô, á fa kwagh u i lu ôron nana? Gadia né lu er ior mba lamen a ahumbe nahan.

¹⁰Amo nga sha won kposo kposo ngee je, kpa hanmô de ngin a ikenge i i ga.

¹¹Nahan aluer me kar inja i ikenge la ga yô, me hingir or u ôron kwagh la er ortyôtyev nahan man or u ôron kwagh la di kpaa nana hingir mo er ka ortyôtyev nahan.

¹²Ne kpaa er ne lu nôngon ngegh sha u zuan a uiwua mba sha jijingi la yô, kape ma ne nenge ngegh sha u hemban maan a maa nongo u Kristu je la.

¹³Kape i lu man or u ôron kwagh sha ma zwa la nana̱ er msen sha u ma nan pase u kpaa yô.

¹⁴Gadia aluer m ngu eren msen sha imbazwa la yô, ka jijingi wam tsô a lu eren msen ye, kpa mhen wam yô, tema gbilin.

¹⁵Tsô á er nana? Me er msen sha jijingi shi me er msen sha mhen kpaa. Me wa icam sha jijingi, shi me wa icam sha mhen kpaa.

¹⁶A lu nahan ga yô, wea sughun sha jijingi yô, á er nan man u nan lu sha ian i fan kwagh la ga la, nana rumun er, “Amen” sha ishughun you laa? Gadia nan fa kwagh u u lu ôron la ga.

¹⁷Gadia we yô, u ngu sughun doo kpekpe, kpa orgen la yô, i maa nan a maa ga.

¹⁸M ngu sughun Aôndo er m hembe lamen ijô a ven cii yô.

¹⁹Nahan kpaa, ken nongo u Kristu yô, hemba doon mo u ôron asemberakaa ataan sha mhen wam a u ôron asemberakaa dubu pue sha imbazwa la.

²⁰Anmgbianev av, de kera luun nen yev yev sha mhen wen ga; sha gbenda u kwaghbo yô, lu nen anikundanev, kpa sha mhen yô, lu nen mbavesen.

²¹I nger ken atindi er: Ka sha ior mba ve lu zwa ugen man sha ityumbujôôgh i mbagenev man Me ôr kwagh a nongoior ne ye. Heera je kpaa vea ungwa ato, kape Ter A kaa la.

²²Nahan ijô i lamen ne ka ikav sha ci u mbananjighjigh la ga, kpa ka sha ci u mba ve ne jighjigh ga la. Kpa u ôron kwaghôron u profeti yô, ka sha ci u mbanan jighjigh ga la ze, kpa gema ka sha ci u mba ve ne jighjigh la.

²³Nahan aluer nongo u Kristu cii ua kohol ijiir i môm man ve cii vea lu lamen ijô man mba ve fe kwagh la ga, shin mba ve ne jighjigh ga la vea va nyôr yô, vea kera kaa er ne mba hunden gaa?

²⁴Kpa aluer ve cii vea lu ôron kwaghôron u profeti yô, man orgen nana nyôr, a lu or u nan jighjigh ga, shin or u fan kwagh la ga yô, nahan ve cii vea kôôm nan, ve cii vea kar nan kpaa,

²⁵akaa a myer a ken ishima i nan aa hingir ken igbar, nana kuma ishigh inya nana wuese Aôndo, nana pase er, mimi je Aôndo ngu ken a ven.

²⁶Nahan yô, anmgbianev, kwagh ne ngu nana? Ka nea kohol ijiir i môm yô, hanmô wen nan lu a icam shin ityesen shin mpase shin u lamen ma zwa, shin u pasen inja i u. Yô, i̱ er hanma kwagh cii sha u maan a maa.

²⁷Aluer mba lamen ma zwa yô, i̱ lu ior ihiar, i̱ de hembe utar ga, i̱ lamen môm môm man ugen nana̱ gema nana̱ pasen.

²⁸Kpa aluer or u pasen zwa la nana lu ga yô, or la nana̱ huan ving ken nongo u Kristu nana̱ ôr kwagh a iyol i nan kua a Aôndo kpaa.

²⁹Uprofeti yô, ve̱ ôr kwagh, ior ihiar shin itiar, mbagenev di ve̱ gema ve̱ kar kwaghôron la.

³⁰Aluer orgen u nan tem heregh nana zua a mpase yô, or u hiihii la nana̱ huan.

³¹Gadia ne cii ne fatyô u ôron kwaghôron u profeti môm môm, sha u ne cii ne zua a ityesen man á taver ne asema kpaa.

³²Man ujijingi mba uprofeti mba ongo imo i uprofeti.

³³Gadia Aôndo ka u nzughul nzughul ga, kpa ka u bem. Er i lu ken iniongo i Kristu i u icighanmbaiorov cii nahan yô,

³⁴kasev ve̱ luun ving ken nongo u Kristu. Gadia i na ve ian i ôron kwagh ga, ve̱ ungwan kwagh, er atindi kpaa a kaa nahan.

³⁵Kpa aluer a sar ve pe zuan a ityesen sha ma kwagh yô, ve̱ pine noov vev ken ya. Ka kwagh u iheenegh je u kwase nana ôr kwagh ken nongo u Kristu.

³⁶Shin ka her a ven kwaghôron u Aôndo a dughu? Shin ka ne tseegh i ôr ne un yee?

³⁷Aluer orgen nana hen er nan ngu profeti shin or u ken jijingi yô, nana̱ fa er akaa a m nger ne yô, ka tindi u Ter je.

³⁸Aluer orgen nana wa kwagh ne iko ga yô, nan kpaa i̱ de we nan iko ga.

³⁹Nahan yô, anmgbianev, nôngo nen ngegh sha u ôron kwaghôron u profeti kpa i̱ de yangen ijô i lamen la ga.

⁴⁰Kpa i̱ eren akaa cii tsembelee je, sha inja sha inja.