Read tiv 1 Mbakorinte 5 Bible Online

1 Mbakorinte 5 - tiv bible

1 Mbakorinte 5

¹Gwa ngu zan ne je er idya ngi her atô wen, man ka imbaidya i ken atôatyev je kpaa i lu ga yô, orgen ngu a kwase u ter u nan je.

²Nahan kpaa ne mba gengese iyol; guda u ma i vihi ne, ma i dugh or u nan er kwagh la ken atô wen kera.

³Gadia mo yô, shin er ken iyol yam m lu her ga yô, ken jijingi yô, m ngu heregh, man kera je kpaa m hen kwagh u or u nan er imbakwagh la, m kure, bee er m ngu heregh yô.

⁴Zum u ne kohol ken iti i Ter Yesu, ne kua jijingi wam man agee a Ter wase Yesu yô,

⁵i̱ na imbaor la sha ikev i Satan sha u á vihi iyol i nan kera, kpa jijingi u nan yô, a̱ war sha iyange i Ter.

⁶Ihagh yen la doo ga. Ne kera fa er wankwa u kpeghee ka a zua sha ijenmwe cii ga?

⁷Dugh nen kwa u tse la kera sha u né lu ijenmwe i he yô, gadia jim je yô, ne kera mba a kwa ga. Gadia Waniyôngo wase u Paseka kpaa i sôngo un kera, ka Kristu je la.

⁸Nahan yô, se ya nen iniongo i̱ de lu sha kwa u tse ga, shin sha kwa u bo shin u ifer kpaa ga, kpa i̱ lu sha bredi u i we kwa sha mi ga yô, u wang man u mimi.

⁹M nger ne ken washika la mer, de zough nen a mbadyarev ga.

¹⁰Kpa ka mbadyarev mba ken tar ne cii ga, shin Mbahuav shin mbanumungbenda shin mbacivirakombo cii kpaa ga, a lu nahan yô, ma i gbe u né due shin tar kera kpee je.

¹¹Kpa hegen yô, m ngu ngeren ne mer: De zough nen a ma or u i yer nan er anmgbian kpa nan gem nan lu or u idya shin u hua shin or u civir akombo shin or u ityuhwan shin or u hunden msôrom shin or numun gbenda ga; imbaor la yô, kwaghyan tsô kpaa de ye a nan imôngo ga.

¹²Ka nyi i gbem u ôron mba ken won mbala ijiri? Kpa mba ve lu kimi yô, kera ka ne né or ve ijir gaa?

¹³Mba ken won yô, ka Aôndo A er ve ijir ye. Dugh nen iferor la ken a ven kera.