Read tiv 1 Mbakorinte 9 Bible Online

1 Mbakorinte 9 - tiv bible

1 Mbakorinte 9

¹Mo m ngu sha ian yam ga ha? Mo m ngu apostoli ga zee? M nenge a Yesu Ter wase ga ha? Ne kera mba tom wam ken Ter gaa?

²Aluer m ngu mbagenev apostoli ga kpaa, ne yô, m ngu ne apostoli keng je. Ka ne je, ne lu ikav i tesen sha tom wam u apostoli ken Ter ye.

³Ipalegh yam a mba ve lu karen mlu wam yô, ka i ne:

⁴Se kera mba a tahav mbu yan kwagh, man shi man kwagh gaa?

⁵Se kera mba a tahav mbu zenden a kwase wase u a lu anmgbian ken Ter er mbaapostoli mbagenev man anngôôv mba Ter man Kefa nahan gaa?

⁶Shin ka mo man Barnaba tsô se kera lu a tahav mbu den tomshiren la ga ase?

⁷Ka an nana nyôr tom u nôngon ityav man shi nana koson iyol i nana? Ka an nana er sule u wain man nana kera ya atam a u ga? Ka an nana kura ilev man nana kera ma atumba a mbi ga ase?

⁸M ngu ôron kwagh ne sha tahav mbu or tsô shinii? Tindi yô, kaa nahan gaa?

⁹Gadia ken tindi u Mose i nger er: De we bua kper sha zwa zum u a lu shoghol iyiagh la ga. Nahan ka ibua man Aôndo A we i iko yee?

¹⁰Kera ka sha ci wase jim man A ôr nahan ye gaa? Ka sha ci wase je lu i nger nahan ye, gadia or u kahan sule yô, ka u nana kaha sha ishimaverenkeghen, u nan shoghol iyiagh kpaa, i̱ lu sha ishimaverenkeghen, sha u nana zua a kwagh yô.

¹¹Aluer ka se se te ne ivor ken jijingi yô, gema ka zegekwagh je u sé sunda akaa a en ken iyol ye zee?

¹²Aluer mbagenev mba a tahav sha a ven yô, kera guda se gaa? Kpa se er kwagh sha tahav mbula ga; kpa m gba taver ishima sha akaa cii tsô sha u m̱ de te Loho u Dedoo u Kristu icul ga yô.

¹³Ne kera fa er mba ve eren tom sha uicighanmbaakaav mba ken tempel la ve ye kwagh ken tempel gaa? Man shi mba ve eren tom sha atse a nanden nagh sha mi yô, mba zough a kwar sha atse gaa?

¹⁴Kape Ter kaa la er: mbapasen Loho u Dedoo kpaa, ve̱ lu uma sha Loho u Dedoo la.

¹⁵Kpa mo yô, m er kwagh sha akaa a i ne ian sha mi ne môm môm kpaa ga. Man m ngu ngeren akaa ne sha u i̱ erem a kpaa ga, gadia guda u me kpe kera a u ma or nana̱ bunde ihagh yam ne.

¹⁶Gadia aluer m ngu ôron Loho u Dedoo yô, kam kwagh u tan ihagh a mi ga, gadia i kighir mo a kighir je. Aluer me ôr Loho u Dedoo ga yô, kwagh á tserem.

¹⁷Aluer m ngu eren kwagh ne sha ishima i gbar gbar yô, m ngu a injar, aluer ka sha ishima i gbar gbar ga kpaa, i nam a na tom sha ikev.

¹⁸Ka nyi je i lu injar yama? Ka er me na Loho u Dedoo gbilin er m lu ôron u yô, sha u me kera er kwagh sha tahav av mbu sha Loho u Dedoo la cii ga yô.

¹⁹Shin er m lu uikangen hen ma or ga nahan kpaa, m gema iyol yam m hingir kpan u ior cii sha u me hemba kôron ior yô.

²⁰Mbayuda yô, m hingir ve er ka Oryuda nahan sha u me kôr Mbayuda yô. Mba ve lu sha tindi yô, m hingir ve er ka or u sha atindi nahan, sha u me kôr mba ve lu sha atindi la, shin er mo iyol yam m lu or u sha atindi ga nahan kpaa.

²¹Mba ve lu sha atindi ga yô, m hingir ve er ka or u sha atindi ga yô, sha u me kôr mba ve lu sha atindi ga la, nahan kpaa m ngu or u sha atindi a Aôndo ga ze, m ngu sha atindi a Kristu.

²²Aseeraior yô, m hingir ve er ka isheeror nahan sha u me kôr aseeraior yô. Ior cii m hingir ve hanma kwagh cii, sha u a lu nan nan kpaa, me yima mbagenev yô.

²³M er akaa cii sha ci u Loho u Dedoo sha u me zua a kwar sha mi yô.

²⁴Ne kera fa gaa? Mbagban ayem ken iniumbe ka ve yevese cii, kpa ka môm tsô nan tôô iwua la ye gaa? Yô, yevese nen sha er né zua a mi yô.

²⁵Hanma or u wan iyol sha iniumbe yô, ka nan kôr iyol i nan tsaha sha akaa cii. Ve yô, ka sha u zuan a tsar u usen tsô, kpa se yô, ka u usen ga.

²⁶Mo yô, m ngu yevese bema be bema ga, m ngu tan azu er or u tan ahumbe dang nahan ga.

²⁷M ngu gbidyen iyol yam m ngu veren i ken kpan je, sha u i̱ de lu u m ôr mbagenev kwaghaôndo kera man mo iyol yam yô, m̱ gema m̱ yina sha ikaren ga.