Read tiv 2 Mbakorinte 12 Bible Online

2 Mbakorinte 12 - tiv bible

2 Mbakorinte 12

¹Ka u tan ihagh keng, nahan kpaa ka a inja ga, kpa me za ar sha akaa a nengen a mi sha ashe kua mbampase mba Ter kpaa.

²M fa or u ken Kristu, anyom kar hegen pue kar anyiin, i feese nan i za a nan Sha sha u Sha utar la—shin lu ken iyol, shin lu ken iyol gaou, m fa ga, ka Aôndo A fe ye.

³M fa i feese or la i za a nan ken Paradiso,—shin lu ken iyol shin lu ken iyol ga kpaa m fa ga, ka Aôndo A fe ye—

⁴nan za ungwa akaaôron a a lu a ôron ga yô, i rumun er or a̱ ôr a ga.

⁵Ka sha imbaor la me ta ihagh ye, kpa sha kwagh wam iyol yam yô, me ta ihagh ga saa sha isheer yam.

⁶Aluer a sarem pe tan ihagh kpaa ma m lu ibumeor ga, kpa ma i lu mimi ma m lu ôron ye. Kpa m de, sha u or nana̱ de henen kwagh sha mo i̱ hemba kwagh u nan nenge a mi ken mo shin kwagh u nan ongo ken mo la ga,

⁷sha ci u mbampase mba sha mnenge mba ve gande la. Sha u m̱ de kenden iyol sha yum ga la, i nam saa ken iyol, ka ortyom u Satan je, sha u a̱ gbidyen mo, m̱ de kenden iyol sha yum ga yô.

⁸Sha kwagh ne m sôn Ter kwa tar mer, kwagh ne a̱ due ken mo kera.

⁹Kpa A gema A kaa a mo er: Mrumun u sha mhôôn Wam kuma u, gadia agee Am ka a tema hoghom hoghom ken isheer. Nahan yô, me ta ihagh sha isheer saan saan sha u agee a Kristu a̱ tema ken mo yô.

¹⁰Nahan yô m rumun isheer sha ci u Kristu kua aheen kpaa, man akaatseren man mbamtev mba sha atsan man atsan a eren kpaa, gadia ka shighe u m lu isheer la je m gem m taver ye.

¹¹M hingir ibumeor ve, kpa ka ne ne kighir mo m er nahan ye, gadia ka ne ma ne wuese mo ye, gadia m yina sha uihembanmbaapostoli mban sha ma kwagh ga, shin er m gbe kwagh ga nahan kpaa.

¹²I er akav a orapostoli ken a ven sha ishima i wan kpishi, lu sha akav a tesen, man akaa a kpilighyol man ityom i ageegh kpaa.

¹³Ka sha nyi je ne yen sha iniongo i Kristu igene, saa di er mo iyol yam m ze ne iyol ga la, shinii? Shi dem nen kwaghbo ne tsô.

¹⁴Nenge acin a m kohol iyol u van ken ven ka atar je ne. Kpa me za ne iyol ga; gadia ka akaa a en la kwagh a gbem a min ga kpa ka ne ayol a en. Gadia ka u ônov vea ombo kwagh sha ci u mbamaren ve ga kpa ka mbamaren vea ombo sha ci u ônov vev ye.

¹⁵Mo yô, me vihi akaa a am saan saan shi me na nagh sha iyol yam kpaa sha ci u uuma enev. Er ne doom ishima yum, nahan mo m gema m pande a pande doon nee?

¹⁶I̱ lu nahan tsô, mo yô, m za ne iyol ga. Kpa ne mba kaan ner, m hemba ayom m kôr ne sha icugh.

¹⁷Nahan m tsugh ne sha ma or u m tindi ken a ven yôô?

¹⁸M taver Titu ishima mer a̱ za, shi m tindi anmgbian ugen vea na kpaa. Nahan Titu za tsugh nee? Kera lu sha jijingi môm se lu zenden gaa? Lu gbenda môm se lu zan gaa?

¹⁹Ne mba henen gbem ner se mba palegh iyol. Kpa ka sha ishigh ki Aôndo se lu ôron kwagh ken Kristu ye, man akaaôron ne cii ka u maan ne a maa, ne mbadoon mo ishima.

²⁰M ngu cian mer, me va yô, alaghga me kera kohol ne er i sarem nahan ga, ne kpaa né kera zua ishigh a mo er i sar ne nahan ga, alaghga ayôôso aa lu, kua iwuhe, man ishima i vihin, man akaa a kpelan, man angereke a eren, man u kôson ior sha dang, man iyolgengese, man anzughul kpaa.

²¹M ngu cian mer, aluer me shi me va yô, Aôndo wam Una heem sha ashe a en, á gba u me zungwe sha kwagh u mbagenev kpishi mba ve vande eren isholibo kpa ve lu a gema ishima sha hôngor ve man sha idya i eren man sha ijimba i ve lu eren la kpaa ga.