Read tiv 2 Mbakorinte 2 Bible Online

2 Mbakorinte 2 - tiv bible

2 Mbakorinte 2

¹M wa ken ishima yam mer me kera va hen a ven sha ishima i vihin ga.

²Gadia aluer ka mo m ne ne ishima i vihin yô, ka an nana shi á nam iember saa di un u m ne un ishima i vihin la?

³Ka sha ci u nahan je m nger ne nahan ye sha er zum u me va yô, mbala mba ma ve nem iember la yô, ve̱ de nem ishima i vihin ga. M fa dedoo mer, ne cii, iember yam yô, ka iember yen kpaa.

⁴Gadia er m nger ne yô, m lu ken ican kpishi, je m ya ican ken ishima tsung kpaa, mlu a mliam ashe kpishi kpaa lu sha u nan ne ishima i vihin ga, kpa lu sha u ne fa dooshima u ne doom ishima tsung la.

⁵Aluer ma or na ishima i vihin yô, ka mo nan nem ishima i vihin ga, shi kpuaa ma i lu ne cii, kpa kam pe kehen kwaghôron ga.

⁶Sha imbaor la yô, er mba ve hemba ngeen la vea tsaha nan yô, kuma.

⁷Nahan yô, guda gema de nen nan kwagh la man shi sur nen nan ishima kpaa sha u ijungwen i tsung la i̱ de hembe nan ga yô.

⁸M ngu zamber a ven mer, shi rumun nen or la sha dooshima.

⁹Ka sha ci u nahan m nger ne ye, sha u me kar ne me fa, shin ne mba mbaungwan kwagh sha hanma kwagh cii kpaou?

¹⁰Or u ne de nan kwagh yô, mo kpaa m de nan. Aluer mea de kwagh kpaa, kwagh u m de la, ka sha ci wen sha ishigh ki Kristu.

¹¹Ka sha u Satan a̱ de ye mtsera sha a vese ga yô. Se kera lan ayom a na ga.

¹²Zum u m va ken Teroa sha ci u ôron Loho u Dedoo u Kristu yô, i bughum hunda ken Ter

¹³kpa m zua a mmem ken ishima ga sha ci u m kohol anmgbian wam Titu her ga yô. Tsô m lôhô ve ayem m yem ken Masedonia.

¹⁴Kpa i̱ wuese Aôndo u A ne se, se lu hemban ken Kristu gbem ne, shi A lu samber a ihuma i kwaghfan Na ken hanma ijiir cii sha ikev yase.

¹⁵Gadia se mba ihuma i doon i Kristu sha ci u Aôndo hen mba i lu yiman ve la man shi hen mba ve lu timin la kpaa.

¹⁶Mbagenev yô, ka ve ihuma i kuugh i zan ken ku. Mbagenev di yô, ka ve ihuma i uma i zan ken uma. Ka an je nan kom sha akaa nee?

¹⁷Se mba zenden kpenga a kwaghôron u Aôndo er mbagenev kpishi ve eren nahan la ga, kpa se mba ôron kwagh ken Kristu sha mimi, ka er mba Aôndo A tindi ve nahan man ka sha ishigh ki Aôndo kpaa.