Read tiv 2 Mbakorinte 3 Bible Online

2 Mbakorinte 3 - tiv bible

2 Mbakorinte 3

¹Shi se gba wuese ayol a ase vee? Shin uwashika mba pasen mlu u or mba zan a mi ken ven shin mba ne di ne nger la, kwagh gba se a mi er mbagenev nahana?

²Washika wase yô, ka ne je, i nger un ken asema ase, ior cii fa un ve ôr un kpaa.

³Ne mba tesen gbar gbar er ne lu washika u Kristu, ka sha tom wase i nger un ye, ka sha inki ga kpa ka sha Jijingi u Aôndo u uma, ka sha ikpande i awen kpaa ga, kpa ka sha ikpande i inyam i nger un ye.

⁴Imbamsuur i se suur sha Aôndo ne se zua a mi ken Kristu.

⁵Se ayol a ase se kuma u kaan ser ma kwagh ka u wase ga, kpa mkom wase ka her Aôndo a dugh ye.

⁶Ka Un A gem se se kom u lun mbatomov sha ikuryan i he, ka i sha kwaghngeren la ga kpa ka i ken jijingi, gadia kwaghngeren la woo a wua kpa jijingi ne a na uma.

⁷Aluer tom u u lu zan ken ku, u i nger asangeakaa sha iwen la, u hingir u engem je, ônov mba Iserael kera fatyô u kenger ishigh ki Mose ga sha ci u iengem i ishigh nagh i i lu i karen kera la yô,

⁸man hire tom u sha jijingi la ua hemba lun a iengem ga yee?

⁹Gadia aluer tom u u lu nan ior ibo la, iengem ia lu sha mi kpaa, tom u nan perapera la ua hemba ngeen a iengem ica je.

¹⁰Kwagh u lu iengem la kpaa, sha gbenda ne yô a kera engem ga, sha ci u iengem i hemban cii la.

¹¹Aluer kwagh u karen kera la kpaa ngu a iengem yô, kwagh u lun gbem la una hemba lun a iengem.

¹²Er se lu a imbaishimaverenkeghen ne yô, se hemba lun a vangertiôr je.

¹³Ka er Mose u a cir ikondo sha ishigh nagh sha u ônov mba Iserael ve̱ de kenger mkur u kwagh u a lu karen kera la ga nahan ga.

¹⁴Kpa i cighir asema a ve, gadia zan zan nyian je kpaa ape i lu ôron Ikuryan i Tse yô, ikondo i yisan shon la ngi her, mba bughun i sha ga, gadia ka ken Kristu i bughun i kera ye.

¹⁵Een, zan zan nyian je kpaa hanma shighe u ka a ôron Mose yô, ikondo i yisan la i cirin asema a ve.

¹⁶Kpa zum u or ka nana gema hen Ter yô, i bugh ikondo i yisan la kera.

¹⁷Ter yô ka Jijingi, hen ape Jijingi u Ter A lu yô, ikangenev mbi her ga.

¹⁸Se cii se kera mba a ikondo i yisan sha ishi ga se mba nengen iengem i Ter er ka ken ijingi nahan. Mba geman se se̱ hingir er ibeen shon la nahan, hii ken iengem za a za hemen ken iengem. Ka hen Ter u A lu Jijingi la kwagh ne a dugh ye.