Read tiv 2 Mbakorinte 4 Bible Online

2 Mbakorinte 4 - tiv bible

2 Mbakorinte 4

¹Nahan yô, er se lu a tom ne sha mhôônom ma i zungu se la yô, asema kera nga yinan se ga.

²Kpa se venda akaa a kunya a ken myer la, se mba zenden sha atseregh ga, se mba kôron mkaanem ma Aôndo geman a mi ga, kpa se mba duen a mimi ken igbar, se mba pasen ayol a ase sha ci u imo i ken ishima i hanma or sha ishigh ki Aôndo.

³Aluer ivangeli yase shi ngi ior myer her yô, ka mba ve lu timin la tsô i lu ve myer her ye.

⁴Ve yô, ka mbanan jighjigh ga, aôndo u tar u ainge ne pir ve ashe a asema sha u ve̱ de nengen a iwanger i Loho u Dedoo u iengem i Kristu u A lu ibeen i Aôndo la ga.

⁵Gadia ka kwagh wase se lu ôron ga, kpa ka kwagh u Kristu Yesu, er A lu Ter yô, man se ayol a ase yô, se mba mbaeren ne tom sha ci u Yesu.

⁶Ka Aôndo u A kaa er, iwanger i̱ wanger ken ime la, A lu tan iwanger ken asema ase ye, sha u mkav u iengem i Aôndo i sha ishigh ki Kristu la i̱ wanger se yô.

⁷Kpa se mba a kwagh u injaa ne ken ikav mbi inyaav; nahan agee a hemban la ka a Aôndo, ka ken vese a dugh ga.

⁸Mba eren se ican sha hanma ian kpa i her se a her ga. Lan se ishima cii kpa se hunde ishima kera ga.

⁹Mba tôvon se a ican nahan kpaa i ta se kera ga. Mba kôron se tan inya, kpa i wua se ga.

¹⁰Se mba tôôn ku u kpen u Yesu ken iyol yase gbem je sha u uma u Yesu la kpaa i̱ tese un ken iyol yase gbar gbar yô.

¹¹Er se lu uma ne yô, mba nan se ken ku gbem je sha ci u Yesu, sha er uma u Yesu kpaa, i̱ tese un gbar gbar ken iyol yase i va kpen kera ne.

¹²Kape ku u lu eren tom ken vese ne. Kpa ken ven yô, gema ka uma.

¹³Se mba a imbaishima i nan jighjigh vough er kwagh u i nger la a kaa nahan yô er: M na jighjigh, ka nahan man m lu ôron kwagh ye, se kpaa se mba nan jighjigh, ka nahan man se lu ôron kwagh kpaa ye.

¹⁴Gadia se fa, Un u A nder Ter Yesu yô, se kpaa, Una nder se a Yesu imôngo man Una ver se a ven imôngo sha ishigh Nagh.

¹⁵Akaa cii nga sha ci wen sha u mrumun u sha mhôôn a̱ seer sha ior kpishi man i̱ seer iwuese sha ci u icivir i Aôndo kpaa.

¹⁶Nahan yô, asema kera nga yinan se ga; shin er or wase u ken won ne lu vihin kera kpaa, or wase u kimi ne mba gem un hegh ayange ayange.

¹⁷Gadia ancan u peesa u sha anshighe kpeghee ne ngu sôron se a sôr iengem i tsôron i vesen i ganden cii.

¹⁸Se mba kera veren asema sha akaa a i nengen a mi la ga, kpa ka akaa a i nengen a mi ga la, gadia akaa a i nengen a mi la ka a karen kera, kpa a i nengen a mi ga la gema ka a tsôron je.