Read tiv 2 Mbakorinte 6 Bible Online

2 Mbakorinte 6 - tiv bible

2 Mbakorinte 6

¹Er se lu mbaerentom a Na imôngo yô, se mba wan ne kwagh ser, mngohol u ne ngohol mrumun u sha mhôôn u Aôndo yô, i̱ de lu gbilinkwagh ga.

²Gadia ngu kaan er: Ka sha shighe u a doo la M ver ato we, sha iyange i myom la kpaa M wase u. Nenge, ka hegen je i lu shighe u doon ye, nenge ka hegen i lu iyange i myom kpaa ye.

³Se mba nan ityôkwagh i nôngon gbev sha ma gbenda môm je ga, sha u i̱ de teren tom wase sha kwagh u dang ga yô,

⁴kpa se mba pasen ayol a ase ken akaa cii je er se lu mbatomov mba Aôndo yô: ken ishima i wan tsung, man ken atsan, man akaa a tseren, man uzayol,

⁵man igbidiv, man gaadi man ayôôso a ikpelaior, man ityom i eren, man u tsan per acin imôngo, man u lun ijen acin imôngo,

⁶man mlu u wang, man kwaghfan, man ishima i wan, man mlu u sar sar, man Icighan Jijingi, man dooshima u lun a imanger ga,

⁷man kwaghôron u mimi, man agee a Aôndo, man sha ikav mbi utyav mbi perapera ken uwegh ku yanegh man ku imesegh kpaa,

⁸man icivir, man iheen, man gwa u bo, man gwa u dedoo. Mba nengen se er ka mbaaiev yô, kpa se mba mbamimi je;

⁹man shi bee er i fa se ga, kpa i fa se doo doo je; bee er se mba nôngon ku yô, kpa nenge, se mba uma je; man shi bee er i tsaha se yô, kpa i wua se ga;

¹⁰man shi bee er se mba zungwen yô, kpa se mba ember gbem je; man shi bee er se mba mbaatsanev yô, kpa se mba geman mbagenev kpishi hingir mbanyarev; man shi bee er se mba a ma kwagh ga yô, kpa se mba a akaa cii je.

¹¹Ne Mbakorinte, se ôr ne vanger wase cii, ishima yase bugh gbangeraa.

¹²Ka ken vese i imbishi ne ga, ka ken asema a en i imbishi ne ye.

¹³Ne di kpaa, gema er nen kwagh—m ngu ôron kwagh er ka i ôr a mbayev nahan—ne kpaa, bugh nen ishima.

¹⁴I̱ de zough ne ken mzough u kpeegh sha igbur i môm a or u nan ne jighjigh ga, imôngo ga. Gadia perapera zua vea ifer sha nyi? Shin ka nyi mzough i lu hen iwanger a ime?

¹⁵Ka nyi i zough Kristu a Belial la? Shin ka sha nyi man kwagh u or u nan ne jighjigh a zua a u nan ne jighjigh ga laa?

¹⁶Ka nyi i zough tempel u Aôndo a akombo? Gadia se yô, se mba tempel u Aôndo u uma je. Kape Aôndo A kaa je la er: Me tema hen ve shi Me zenden hen atô ve kpaa, Me lu Aôndo ve, ve kpaa vea lu nongoior Wam.

¹⁷Nahan yô, due nen ken atô ve kera, lu nen kposo, kape Ter A kaa la, kwagh u hôngorough kpaa, de benden nen ave ga. Nahan Mo Me rumun ne,

¹⁸Me lu Ter wen, ne di né lum ônov mba nomso man ônov mba kasev, kape Ter Uhembanagee, A kaa la.