Read tiv Mbagalatia 2 Bible Online

Mbagalatia 2 - tiv bible

Mbagalatia 2

¹Ken masejime, anyom nga kar pue kar anyiin yô, m shi m za sha Yerusalem, mo vea Barnaba, m za a Titu kpaa.

²Ka sha mpase u Aôndo pasem man m za ye. M tim ve ivangeli i m lu ôron ken atôatyev la sha ishi, kpa lu ken iuv a mba ve za gwa yô, sha u m̱ de zenden gbilin ga, shin zende u m vande zenden la kpaa u̱ de gbe gbilin ga.

³Titu u a lu vea mo la, shin er a lu or u Grika je nahan kpaa i kighir un sha u a̱ tsôngo ga.

⁴Kpa lu sha ci u anmgbianev mba aiev mba ve nyer myer la; ve yô, ve nyôr imbusu sha u vea nenge mker sha mlu wase u lun a ikangenev ga ken Kristu Yesu la, sha u vea za a vese ken ikpan yô.

⁵Kpa anshighe môm tsô kpaa se kera rumun u nan ayol a ase sha ikev ve ga, sha er mimi u ivangeli a̱ lu a ven her gbem.

⁶Mba ve ze gwa er ve gbe kwagh yô—kwagh u ve vande lun la kam ma kwagh ga, Aôndo sangen sha dooshima ga—mbala yô, ve kera seer mo ma kwagh ga.

⁷Kpa ve gema ve nenge er i wam tom u ôron mbaipusuv Loho u Dedoo la sha ikev di er i ver Peteru ken mbaicôngo nahan.

⁸Gadia Un u A na Peteru agee sha u lun apostoli u mbaicôngo la yô, mo kpaa, A nam di nahan sha ci u atôatyev.

⁹Zum u ve kav mrumun u sha mhôôn u i nam la yô, Yakobu man Kefa kua Yohane mba i nenge ve er ka mtuunummbaiorom yô, ve na, mo kua Barnaba uwegh ku yanegh ku mzough sha er se se za ken atôatyev, ve di vea za ken mbaicôngo.

¹⁰Ka mbaatsanev tseegh i lu ve ka ma se umbur ve ye, man lu kwagh la je i gbam ken ishima u eren ye.

¹¹Kpa zum u Kefa za va hen Antioki yô, m hendan a na sha ishigh nagh je, gadia lu a ibo doo doo je.

¹²Gadia er mbagenev mba ken Yakobu ve lu a va ga yô, a lu yan kwaghyan a atôatyev imôngo. Kpa mbala mba ve yô, a kem iyol, a pav iyol na kposo, lu cian mba ve lu ken icôngo yô.

¹³Mbayuda mbagenev cii kpaa nyôr imanger a na ityô, zan zan Barnaba je kpaa ve urugh un sha imanger ve la.

¹⁴Kpa zum u m nenge ve kera lu zan sha mimi u ivangeli jighilii ga yô, m kaa a Kefa sha ishigh vegh cii mer: Aluer we u u lu or u Yuda kpa u eren er ortyôtyev nahan, i kera lu er or u Yuda nahan ga yô, ka nyi man u kighir atôatyev wer ve̱ eren er Mbayuda nahan kenge?

¹⁵Marami wase je, se mba Mbayuda, kera ka mbaasorabo mba ken atôatyev ga.

¹⁶Se fa or gbe zuan a ishô sha aeren a sha tindi ga, kpa ka sha jighjigh u nan ken Kristu Yesu. Man se ayol a ase kpaa se na Kristu Yesu jighjigh, sha u ma i ne se ishô sha jighjigh u nan u ken Kristu, i kera lu sha aeren a tindi ga. Gadia sha aeren a tindi yô, ma or u umace nana zua a ishô ga.

¹⁷Aluer se mba nôngon u zuan a ishô ken Kristu man i va kohol se se lu mbaasorabo yô, nahan Kristu ka ortom u isholibo? Mayange ga.

¹⁸Aluer m shi m maa kwagh u m vande yôhôl kera la yô, m ngu tesen ikav mer, mo iyol yam m ngu or u peren tindi je.

¹⁹Gadia ka sha tindi man m kpe sha kwagh u tindi ye, sha u me gema me lu uma sha ci u Aôndo yô.

²⁰I mandem sha terankon a Kristu imôngo; m kera ngu uma ga, kpa Kristu ngu uma ken mo. Man uma u m lu uma ken iyol hegen ne yô; ka sha jighjigh u nan ken Wan u Aôndo u m doo Un ishima man A gem A ne iyol Na sha ci wam la, man m lu uma ye.

²¹M ngu tan mhôônom ma Aôndo kera ga, gadia ishô ia lu sha tindi yô, Kristu kpe gbilin je ve.