Read tiv Mbaefese 1 Bible Online

Mbaefese 1 - tiv bible

Mbaefese 1

¹Paulu apostoli u Kristu Yesu sha ishima i Aôndo, ngu sughun uicighanmbaiorov mba ve lu [ken Efese], mba ve lu jighjigh ken Kristu Yesu yô.

²Mrumun u sha mhôôn a̱ lu sha a ven kua bem mba ve dugh hen Aôndo Ter wase man Ter Yesu Kristu.

³I̱ wuese Aôndo, Ter u Ter wase Yesu Kristu u A ver se sha hanma iveren i dedoo i ken jijingi sha ajiir a Sha ken Kristu.

⁴A tsuwa se ken a Na je er i lu a gba tar ga yô sha u lun mba i tsegh ve man u lun a acôghol iyol ga kpaa sha ishigh Nagh. Ka sha dooshima je

⁵A vande veren se sha u Una rumun se ye, se̱ lu ônov Nav ken Yesu Kristu, sha mwe u A wa ishima la ye,

⁶ka sha ci u iwuese i á wuese iengem i mrumun Na u sha mhôôn u A rumun se ken Udoonshima la.

⁷Ken a Na yô, se mba a mpaa u sha awambe Na man shi mde u gbev mbu nôngon sha mrumun Na u sha mhôôn u ngeen yum la,

⁸u A ne ken vese wuee la ken hanma mfe kua mkav kpaa.

⁹A pase se kwaghmyer u awashima Na u A wa ishima ken Kristu

¹⁰sha u sôron akaa cii sha ci u shighe una va kuma vough la yô, Una kohol akaa a a lu Sha man a a lu shin tar kpaa ci ca cii sha ikev i Kristu,

¹¹Un u se ya dyako ken a na, u i vande veren se la sha awashima u Un u A eren akaa cii sha mhen u awashima Na la.

¹²Ka sha u se̱ lu sha ci u icivir i iengem Na, se mba lu se vande veren ishima u keghen Kristu la.

¹³Ka Un u ne kpaa, zum u ne ungwa kwaghôron u mimi u Loho u Dedoo u myom wen yô, ne na Un jighjigh man i ver ne ikav sha Icighan Jijingi u ityendezwa ye.

¹⁴Ka Un man A lu ibumun u dyako wase er Una paa ior mba ve lu kwagh Na jim sha ci u icivir i iengem Na ye.

¹⁵Sha ci u nahan yô, mo kpaa zum u m ungwa jighjigh wen u nan u ne ne Ter Yesu la man shi dooshima u uicighanmbaiorov cii ve doo ne ishima la,

¹⁶m kera mem u sughun sha ci wen ga, m ngu umbur ne ken mbamsen av

¹⁷sha er Aôndo u Ter wase Yesu Kristu Ter u iengem A̱ na ne jijingi u mfe man u mpase sha u fan Un,

¹⁸shi A̱ wanger ne ashe a asema a en sha u né fa er ishimaverenkeghen i myer u A yila ne la i lu yô, man shi er iengem i ngeen yum i dyako Na u ken uicighanmbaiorov i lu yô,

¹⁹man shi er agee a Na a vese a gande ken vese mba se ne jighjigh yô, sha inja i ieren i tahav mbu agee a Na.

²⁰Ka sha a man A er tom ken Kristu zum u a nder Un shin mbakpenev la A ver Un er A̱ tema Un ken uwegh ku yanegh sha ajiir a Sha la,

²¹A̱ hemba taven sha a hanma tarkuran man tahav man agee man tor u yan cii man hanma iti cii i i yer i sha ayange ne kua a lu van ken hemen la kpaa.

²²Man A ver akaa cii shin angahar a Na, A ver Un A̱ lu ityough sha akaa cii ken nongo u Kristu,

²³ka iyol Na je la, ka m-iv u Un u A lu ivin akaa cii ken uuma cii.