Read tiv Mbafilipi 3 Bible Online

Mbafilipi 3 - tiv bible

Mbafilipi 3

¹Kwagh ugen yô, anmgbianev av, ember nen ken Ter. U shi ngeren ne akaa shon ne kpaa, uwer gbam ga, ne yô, ka ne iwasen.

²Kura nen iyol sha kwagh u iwa, kura nen iyol sha kwagh u mbashirentom mba mimi ga la, kura nen sha kwagh u mbatôndon avav iyol ayol a ve la.

³Gadia ka se je se lu mbaicôngo ye, se mba se civir Aôndo ken Jijingi, se mba se te ihagh ken Kristu Yesu, man se kera suur sha iyol ga la,

⁴shin er mo m lu a ityôikaa i suur sha iyol nahan kpaa. Aluer orgen nana nenge er nan fatyô u suur sha iyol yô, mo ma m hembe.

⁵I tsôngom sha iyange i sha anigheni la, m ngu ken nongo u Iserael, ken kwe u Benyamin, m ngu or u Heberu u ken Mbaheberu je, sha kwagh u atindi yô, m ngu Orfarishi.

⁶Sha kwagh u ishima i tseen, m tôv nongo u Kristu a ican je. Sha kwagh u perapera u a lu sha atindi la yô, m lu a acôghol a wan iyol ga.

⁷Kpa akaa a a lum mtsera la cii, a gema hingir mo msaa sha ci u Kristu.

⁸Mimi je m nenge akaa cii hingir mo msaa sha ci u mfe u fan Kristu Yesu Terem la a hembe ica yum yô. Ka sha ci Na man m de akaa cii a saam ye, m nenge a hingir mo hôngor sha u Kristu Una lu mtsera wam yô,

⁹ma i kohol mo ken a Na, m̱ de lu a perapera wam iyol yam u sha atindi la ga, kpa i̱ lu u sha jighjigh u nan u i ne Yesu la, ka perapera u a dugh her Aôndo sha jighjigh u nan la,

¹⁰sha u ma m fe Un man agee a mnder Na u shin ku, man mzough u zuan a Na sha atsan a Na man u hingir kwagh môm a Na ken ku Na la,

¹¹aluer a fatyô yô, ma m ar sha mnder u shin mbakpenev la.

¹²Ka u kaan er m ngohol ve shin m hingir vough ve ga, kpa m ngu zendan a zenda sha u me tser a mi, i̱ hingir kwagh wam gadia Kristu tser a mo, m hingir kwagh Na.

¹³Anmgbianev av, mo yô, m ngu henen mer m zua a mi hingir kwagh wam ve ga, kpa kwagh u m lu eren yô, ngu môm, akaa a ken ijime la hungul mo kera m ngu naregh zan sha akaa a ken hemen la.

¹⁴M ngu yevese zan hen ikighir i i ver la sha u zuan a iwua i myila u a sen sha, u Aôndo A lu yilan ken Kristu Yesu la.

¹⁵Nahan se mba se hingir vough la yô, se lu nen a mhen ne. Man aluer mhen wen una kaha kposo sha ma kwagh yô, heera kpaa, Aôndo Una pase ne.

¹⁶Kpa kwagh u se zua a mi la yô, se zende nen sha mi vough.

¹⁷Anmgbianev av, ne cii, lu nen mbakaven mo shi nenge nen sha mba ve lu zenden er ne nenge ikav sha a mo nahan la.

¹⁸Gadia mbagenev kpishi mba zenden—m vande ôron ne kwagh ve. Hegen shi m ngu ôron ne a mliam ashe je mer, mba zenden, ka mbaihomov mba terankon u Kristu.

¹⁹Mkur ve yô, ka mtim, aôndo ve yô, ka iyav vev, kunya ve la gema ngu ve icivir, ka akaa a taregh ve veren ishima sha mi ye.

²⁰Gadia se yô, tar wase ngu Sha, ka sha her kpaa se lu keghen ser Oryiman Una va ye, ka Ter Yesu Kristu je la.

²¹Una va gema ayol a ase a icivirigh ga ne, aa hingir kposo á lu kwagh môm a iyol Na i iengem la, ka sha agee a Na a A fetyô u geman akaa cii hingir sha ikev Na la.