Read tiv Mbafilipi 4 Bible Online

Mbafilipi 4 - tiv bible

Mbafilipi 4

¹Nahan yô, ne anmgbianev mba ne doom ishima shi i hangem a ven kpaa, ne mba ne lu iember yam man tsar wam u icivirigh kpaa ne, tile nen ken Ter heregh taveraa, ne mbadoon mo ishima.

²M ngu wan Yuodia kwagh shi m ngu wan Suntuki kwagh kpaa mer, ve̱ zua, ve lu kwaghmôm ken Ter.

³We ikarem u mimi u sha tom kpaa, m ngu zamber a we mer, wase kasev mban. Ve er tom sha u pasen Loho u Dedoo a mo imôngo tsung kua Kelemen man mbagenev mba ve er tom a mo imôngo kpaa, ve mba ati a ve a lu ken ruamabera u uma la.

⁴Ember nen ken Ter gbem, shi me kaa mer, ember nen.

⁵Ior cii ve̱ fa ishimawan yen doo doo. Ter zulum ve.

⁶Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun,

⁷man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye.

⁸Kwagh ugen yô, anmgbianev av, ver nen ishima sha hanma kwagh u mimi, man hanma kwagh u a kom icivir, man hanma kwagh u perapera man hanma kwagh u wang, man hanma kwagh u doon ishima man hanma kwagh u a doo u ungwan kpaa. Aluer kwagh u hemban lun a inja una lu man kwagh una kuma iwuese yô, ver nen ishima sha akaa ne.

⁹Man akaa a ne hen her a mo man ne ngohol man ne ungwa man ne nenge a mi ken mo yô, ka a je eren nen a, man Aôndo u bem Una lu a ven ye.

¹⁰M ember ken Ter kpishi er hegen ne shi ne nder u henen sha kwagh wam yô. Kera je kpaa ne lu henen sha kwagh wam kpa ian lu ne ga.

¹¹M ngu ôron nahan ka sha ci u ibanave ga. Gadia mo yô, hanma inja i mlu i m lu sha mi cii kpem iyol a mi, hoghor mo iyol a mi kpaa.

¹²U lun ken ican kpaa m fa, u ngeen a kwagh wuee kpaa m fa. Hanma gbenda cii man ken hanma kwagh cii kpaa, i nyôr a mo ker, m fa ci ca cii, u yan kwagh kuman mo man shi u lun ijen kpaa, u ngeen a kwagh wuee man shi u banen a kwagh kpaa.

¹³M ngu a agee a eren akaa cii je ken Un u A taver mo ne.

¹⁴Nahan kpaa ne er doo kpee zum u ne wasem ken ican la.

¹⁵Man shi ne Mbafilipi ne fa, sha mhii u ivangeli i Kristu zum u m due ken Masedonia la ma nongo u Kristu lu wasen mo sha kwagh u inyaregh ki duen man inyaregh ki nyôron ga saa ne tseegh.

¹⁶Ken Tesalonika je kpaa ne tindim a kwagh sha ci u gbayol wam kwa môm shin kwa har nahan.

¹⁷Nahan kpaa ka iwua m keren ga kpa m ngu keren atam a ngeen sha ci u mtsera wen.

¹⁸Akaa a ne tindi a mi la m zua a mi hen Epafroditu. I nam cii, neer mo a neer, m mgbough a mi je, ka ihuma i doon, ka nagh ku doon ku ku kom Aôndo yô.

¹⁹Aôndo wam Una na sha hanma gbayol wen vough sha inja i mngee u A ngee a akaa ken iengem ken Kristu Yesu.

²⁰Iengem i̱ lu i Aôndo, Ter wase, gbem sha won. Amen.

²¹Sugh hanma icighanor ken Kristu Yesu, nam. Anmgbianev mba ve lu a mo mba sughun ne.

²²Uicighanmbaiorov cii mba sughun ne, hemba kan mba ve lu ken ya u Shisar la.

²³Mrumun u sha mhôôn u Ter Yesu Kristu a̱ lu a jijingi wen.