Read tiv 1 Mbatesalonika 2 Bible Online

1 Mbatesalonika 2 - tiv bible

1 Mbatesalonika 2

¹Gadia, anmgbianev, ne ayol a en kpaa ne fa mnyer wase her a ven la lu gbilin ga.

²Shin er se vande yan ican, i gba eren a vese ken Filipi dang er ne fe nahan, kpa se lu vangertiôr ken Aôndo wase, se ôr ne Loho u Dedoo u Aôndo, lu sha ahendan kpishi je.

³Gadia ityesen yase ka i sha mtsum, shin i hôngorough kpaa ga, shin sha atseregh kpaa ga.

⁴Kpa er Aôndo nenge se kuma u á ver Loho u Dedoo sha ikev yase yô, kape se lu ôron je la. Ka sha u i̱ doo ior a vese ga, kpa i̱ doo Aôndo u A karen asema ase yô.

⁵Gadia mayange se lu ôron kwagh sha zwanyohon ga er ne kpaa ne fe nahan, shin sha hua u a lu myer kpaa ga, Aôndo je, ka Shiada wase,

⁶shin u keren icivir hen ior, shin her a ven, shin hen mbagenev kpaa ga; ma se fetyô u zan ne iyol kpaa, er se lu mbaapostoli mba Kristu yô.

⁷Kpa se lu eren sha uee her atô wen er ngô ka a uve sha ônov nav nahan.

⁸Kape se kpaa, er ne sar se yum yô, kera doo se u nan ne Loho u Dedoo u Aôndo tseegh ga, kpa zan zan kua uma wase je kpaa, gadia ne hingir mbadoon se ishima kpishi.

⁹Gadia, anmgbianev, ne umbur tom wase u sha ican man u sha gbashima, gadia se ôr Loho u Dedoo u Aôndo kpa se lu eren tom tugh man tetan sha u sé kera za mô wen iyol zum u se lu pasen ne Loho u Dedoo u Aôndo la, ga yô.

¹⁰Ka ne je ne lu mbashiada kua Aôndo kpaa ye, er mlu wase her a ven, ne mba ne ne jighjigh la, lu wang man perapera man a acôghol a wan iyol ga.

¹¹Gadia ne fa er se lu wan ne kwagh er ter ka a eren a ônov nav nahan, se lu taver hanmô wen ishima, se lu pasen ne ser,

¹²zende wen u̱ kuma Aôndo u A yer ne u zan ken tartor Na man iengem Na.

¹³Sha ci u kwagh ne nahan yô, se mba sughun Aôndo gbem gadia zum u ne ngohol kwaghôron u Aôndo u ne ungwa hen vese la yô, ne rumun un er ka kwaghôron u ior ga, kpa er ka kwaghôron u Aôndo man kape i lu kpaa je la, u a eren tom ken a ven, ne mba ne ne jighjigh la.

¹⁴Gadia ne yô, anmgbianev, ne hingir mbakaven iniongo i Aôndo i ken Kristu Yesu i i lu ken Yudia la, gadia ne kpaa, ka sha ikev i ityô yen man ne ya injacan i ve ve ya sha ikev i Mbayuda,

¹⁵mba ve wua Ter Yesu kua uprofeti la ye, se kpaa ve tôv se a ican, kwagh ve doo Aôndo ga man shi mba ihom a ior cii kpaa.

¹⁶Mba yangen se er se̱ de ôron kwagh a atôatyev sha er a̱ war ga, kape ve lu ivin asorabo a ve gbem je la, kpa ken masejime yô, iyugh va sha a ve.

¹⁷Kpa se yô, anmgbianev, i pav se a ven sha anshighe kpeghee, kpa ka sha iyol tsô, ka ken ishima ga, nahan se nôngon tsung sha isharen i vesen u shi zuan ishigh a ven,

¹⁸Nahan i lu se ka van her a ven, mo Paulu je yô, lum acin imôngo je, kpa Satan yange se.

¹⁹Gayô, ka nyi i lu ishimaverenkeghen yase, shin iember yase shin tsar wase u ihagh u sha ityou laa? Kera ka ne je sha ishigh ki Ter wase Yesu sha m-ande Na gaa?

²⁰Gadia ka ne je, ne lu icivir yase man iember yase kpaa ye.