Read tiv Yosua 1 Bible Online

Yosua 1 - tiv bible

Yosua 1

¹Tsô Mose wanakiriki u TER kpe kera yô, TER ôr kwagh a Yosua wan u Nun, ortom u Mose, A kaa er:

²Wanakiriki Wam Mose kpe; yô, mough hegen, we man ior ne cii, per Yordan ne, yem nen ken tar u M lu nan ve la, ka ve Mbaiserael.

³Hanma ijiir i ikevnguhar you ia ndyar sha mi M na ne i er iyange M kaa Mose nahan.

⁴Hii hen ikôngough kin man Lebanon ne, zan zan ar hen zegeifi u Uferati, tar u Mbahiti cii zan zan ar hen zegemnger vegher u iyange i mir la, á lu ikighirtar yen.

⁵Ma or nana fatyô u tilen sha ishigh you sha ayange a u lu uma ne ga; er M lu a Mose nahan, kape we kpaa Me lu a we la; Me kende u ga, Me undu u kpaa ga.

⁶Lu taveraa, taver ishima; gadia ú na ior mban vea ya dyako u tar u M bum a uter vev Mer, Me na ve la.

⁷Gba lun taveraa tsô, taver ishima tsung, sha u veren ishima u wan atindi cii iko a Mose wanakiriki Wam kaa u yô; de undun a, kahan ken iyan shin ken imese ga, sha er ú er kwagh sha inja henpe ú za cii yô.

⁸Ruamabera u atindigh ne a̱ de karen sha zwa wou kera ga, kpa zer timen kimi tugh man atetan, sha er ú ver ishima u eren akaa a i nger kimi cii; gadia ka nahan man ikôr ia lagh u sha akaa cii, shi ka nahan man ú er kwagh sha inja kpaa ye.

⁹M vande kaan we gaa? Lu taveraa, taver ishima; de cie ga; de luun a mciem iyol ga; gadia TER, Aôndo wou, ngu a we henpe ú za cii.

¹⁰Tsô Yosua kaa a mbavesen er:

¹¹Nyôr nen hen atôafogh, kaa nen ior ner: Er nen kwaghyan, gadia shi ayange atar, né per Yordan ne, né nyôr, né ngohol tar u TER, Aôndo wen, A ne ne er ne̱ ngohol u la.

¹²Yosua shi ôr kwagh a Mbaruben man Mbagadi kua vegherkwe u Manase, a kaa er:

¹³Umbur nen kwaghôron u Mose wanakiriki u Aôndo lu kaan ne er: TER, Aôndo wen, Una na ne mmem, Una na ne tar ne.

¹⁴Kasev enev man ônov enev mba kiriki, kua ilev yenev, ve̱ lu ken tar u Mose a ne ne yande Yordan ne, kpa ne yô, per, hemen nen anmgbianev enev, kange nen iyol i utya, ne anomaior a fan ityav cii, za wase nen ve;

¹⁵zan zan TER Una na anmgbianev enev mmem er A ne ne nahan, man ve kpaa ve̱ ngohol tar u TER, Aôndo wen, A lu nan ve la; tsô né hide né va ken tar wen u Mose, wanakiriki u TER, lu na ne yande Yordan vegher u iyange i dugh la.

¹⁶Tsô ve gema ve kaa a Yosua er: Kwagh u u kaa se cii, sé er, henpe u tindi se cii kpaa, sé za.

¹⁷Er iyange se ver ato sha Mose sha akaa cii nahan, kape we kpaa sé ver ato sha a we la; TER, Aôndo wou, A̱ gba lun a we tsô, er yan lu a Mose nahan.

¹⁸Hanma or u nan nyiman imo you, man nan ver ato sha akaaôron a ou, a u kaa nan cii la ga yô, i̱ wua nan; gba lun dông tsô, taver ishima.