Read tiv Yosua 12 Bible Online

Yosua 12 - tiv bible

Yosua 12

¹Utor mba hen tar la mba Mbaiserael hemba ve, man ve ngohol tar ve yande Yordan vegher u iyange i dugh hii hen pev, u Arnon zan zan ar hen uwo u Hermon kua Araba cii, vegher u sha ityoughkitaregh la yô, ka:

²Shihon tor u Mbaamor, u a tema ken Heshebon la, a tema tor hii sha Aroer, u a lu hen kpe u pev u Arnon hen atô u pev man vegher u Gileadi zan zan ar hen ifi u Yaboki, ka ikighirtar i Mbaamon je la;

³Man sha Araba kpaa zan zan ar hen zegemnger u Kinereti vegher u sha ityoughkitaregh la, zan zan ar hen zegemnger u Araba, ka Zegemnger u Bar je la, vegher u sha ityoughkitaregh, sha ian i Bete-yeshimoti man sha vegher u ken imbusutariyan, shin soughsough u Pisega;

⁴man tar u Ogo, tor u Bashan, u a lu or u ken asande a Mbarefai a a shi her la, u a tema ken Ashetaroti man Ederei,

⁵a tema tor sha uwo u Hermon man sha Saleka kua Bashan cii, zan zan ar hen ikighirtar i Mbageshur man Mbamaakati, kua vegher u Gileadi, ikighirtar i Shihon tor u Heshebon.

⁶Mose wanakiriki u TER kua Mbaiserael hemba ve, man Mose wanakiriki u TER gema u, na Mbaruben man Mbagadi man vegherkwe u Manase, hingir dyako ve.

⁷Mban ka utor mba hen tar la, mba Yosua kua Mbaiserael hemba ve yande Yordan vegher u shin ityôtar la, hii hen Baal-gadi shin pev u Lebanon zan zan za ar sha uwo u Halaki u kôndo sha Seir la; Yosua gema tar ve na ikwe i Iserael sha uipaven vev hingir dyako ve.

⁸Sha tar u iwoogh man shin tar u delaa, man ken Araba, man soughsough, man ken desereti, man ken tar u Imbusutariyan; tar u Mbahiti man Mbaamor man Mbakanaan man Mbaperishi man Mbahivi man Mbayebushi;

⁹tor u Yeriko, môm; tor u Ai u a lu ikua ikua a Betel la, môm;

¹⁰tor u Yerusalem, môm; tor u Heberon, môm

¹¹tor u Yarmuti, môm; tor u Lakishi, môm;

¹²tor u Egelon, môm; tor u Geser, môm

¹³tor u Debir, môm; tor u Geder, môm

¹⁴tor u Horma, môm; tor u Aradi, môm;

¹⁵tor u Libena, môm; tor u Adulam, môm;

¹⁶tor u Makeda, môm; tor u Betel, môm;

¹⁷tor u Tapua, môm; tor u Hefer, môm;

¹⁸tor u Afeki, môm; tor u Lasharon, môm;

¹⁹tor u Madon, môm; tor u Hasor, môm;

²⁰tor u Shimeron-meron, môm; tor u Akesav, môm;

²¹tor u Taanaki, môm, tor u Megido, môm;

²²tor u Kedeshi, môm; tor u Yokeneam hen Karmel, môm;

²³tor u Dor sha gungu u Dor, môm; tor u Goim ken Gilgal, môm;

²⁴tor u Tirsa, môm; kohol cii ka utor ikundugber kar môm je ne.