Read tiv Yosua 16 Bible Online

Yosua 16 - tiv bible

Yosua 16

¹Kwar u ônov mba Yosev yô, hii hen Yordan u hen Yeriko, mngerem ma Yeriko vegher u sha ityoughkitaregh la, kar ken desereti, hii hen Yeriko kôndo sha tar u iwoogh zan zan za ar hen Betel,

²due hen Betel za hen Lushi, kar zan zan za ar sha ikighirtar i Mbaarki hen Ataroti,

³kar sen vegher u shin ityôtar zan zan za ar hen ikighirtar i Mbayafeleti, zan zan za ar sha ikighir i Bete-horon u shin, zan zan za ar hen Geser, u za kure hen zegemnger.

⁴Nahan ônov mba Yosev, Manase kua Eferaim, ve ngohol dyako ve.

⁵Ikighirtar i ônov mba Eferaim sha icombor ve yô, lu nahan: ikighir i dyako ve vegher u sha ityoughkitaregh lu Ataroti-adar zan zan za ar sha Bete-horon u sha;

⁶ikighir la due vegher u shin ityôtar hen Mikemeta vegher u ken imbusutarimese; ikighir la gese yem vegher u sha ityoughkitaregh zan zan za ar hen Taanati-shila kar yem vegher u sha ityoughkitaregh za ar hen Yanoa,

⁷sen hen Yanoa za ar Ataroti man Naara, za mande hen Yeriko za kure hen Yordan.

⁸Hen Tapua yô, ikighir yem vegher u shin ityôtar za ar hen uwagh u Kana, kar za kure hen zegemnger,

⁹kua agar a i tsegha a sha ci u ônov mba Eferaim ken atô u dyako u ônov mba Manase, agar la cii kua agar a kiriki a a kase a la.

¹⁰Ve zenda Mbakanaan mba ve tema ken Geser kera ga, kpa Mbakanaan tema ken atô u Eferaim zan zan nyian, ve hingir mba eren tom u ikpan.