Read tiv Yosua 22 Bible Online

Yosua 22 - tiv bible

Yosua 22

¹Tsô Yosua yila Mbaruben man Mbagadi man vegherkwe u Manase,

²a kaa a ve er: Ne er kwagh u Mose wanakiriki u TER kaa ne cii, man shi ne ver ato sha imo yam sha hanma kwagh u m kaa ne cii.

³Ayange imôngo ne, ne undu angbianev enev ga zan zan nyian, ne wa iko sha kwagh u TER, Aôndo wen, a we ne la.

⁴Hegen yô, TER, Aôndo wen, na anmgbianev enev mmem, er lu kaa ve yô; gema nen, hide nen hen utenti enev, hen tar u dyako wen, u Mose wanakiriki u TER a ne nen yande Yordan la.

⁵Yô, ver nen ishima, er nen sha kwaghwan man tindi u Mose wanakiriki u TER A we ne yô, er TER, Aôndo wen, A̱ doo ne ishima man né zenden sha igbenda Na cii, né waan atindi a Na iko, né var a Na man né eren Un tom a ishima yen cii kua uma wen cii kpaa.

⁶Kape Yosua ver ve doo doo, a na ve gbenda la; ve yem hen utenti vev.

⁷Mose vande nan vegherkwe u Manase u môm dyako ken Bashan; kpa vegherkwe ugen la yô, Yosua na ve a anmgbianev vev imôngo yande Yordan vegher u shin ityôtar. Zum u Yosua na ve gbenda u yemen hen utenti vev la yô, a ver ve doo doo,

⁸a ôr kwagh a ve a kaa er: Hide nen hen utenti enev a inyaregh kpishi man ilev kpishi man azurfa man zenaria man togula man iyôgh kua akondo kpishi, kar nen ishar i mbaihomov enev a anmgbianev enev.

⁹Tsô ônov mba Ruben man ônov mba Gadi kua vegherkwe u Manase hide, ve undu Mbaiserael ken Shilo u a lu ken tar u Kanaan la, ve za hen tar u Gileadi hen tar u dyako ve, u i ne ve dyako sha u, sha kwaghôron u TER u a kaa a Mose la.

¹⁰Zum u ve ar hen tar u u kase Yordan, u u lu ken vegher u Kanaan la yô, ônov mba Ruben man ônov mba Gadi kua vegherkwe u Manase ta atse a nanden nagh sha mi hen kpe u Yordan la, zegeatse, gba ikôr mimi.

¹¹Tsô Mbaiserael ungwa gwa er: Nenge, ônov mba Ruben man ônov mba Gadi kua vegherkwe u Manase, ve ta atse sha ishigh ki tar u Kanaan ken tar u u kase Yordan, vegher u ken Mbaiserael la.

¹²Zum u Mbaiserael ungwa gwa la yô, mkohol u ior i Iserael cii kohol imôngo hen Shilo, sha u za nôngon ityav a ve.

¹³Tsô Mbaiserael tindi Pinehashi, wan u pristi Eleasar, hen ônov mba Ruben man ônov mba Gadi kua vegherkwe u Manase, ken tar u Gileadi,

¹⁴a atiator pue a na imôngo, ititor i môm sha hanma kwe u Iserael; hanmô ve lu orhemen ken ya u ter ken uipaven mba Iserael.

¹⁵Ve va hen ônov mba Ruben man ônov mba Gadi kua vegherkwe u Manase ken tar u Gileadi, ve va ôr kwagh a ve, ve kaa er:

¹⁶Mkohol u ior i TER cii ngu kaan nahan er: Ka nyi kwaghbo ne, ne er Aôndo u Iserael ne gem nyian ne de u dondon TER, ne ta atse a en kposo hendan a TER nyiana?

¹⁷Isholibo i Peor kuma se gaa? Kwagh u se lu a wanger ayol a ase sha mi ga zan zan nyian ne, shin er bouange samber sha mkohol u ior i TER je kpaa,

¹⁸nahan kpaa ne gema nyian ne de u dondon TERE? Yô, er ne hendan a TER nyian ne, kper Una yuwe a mkohol u Iserael cii.

¹⁹Kpa aluer tar u ne ngohol la, ua lu wang ga yô, per za nen ken tar u TER jim la, henpe tabernakel u TER a lu yô, ngohol nen tar ken a vese; kpa de kera hendan nen a TER ga; man de kera hendan nen a vese kpaa ga, sha u tan atse a en a nanden nagh sha mi kposo a atse a TER, Aôndo wase, ga.

²⁰Zum u Akan wan u Sera er kwaghbo sha kwagh u i tswer i we un ifan la yô, iyugh kera va sha mkohol u ior i Iserael cii gaa? Kera lu un tseegh tim sha isholibo na ga.

²¹Tsô ônov mba Ruben man ônov mba Gadi kua vegherkwe u Manase gema ôr kwagh a mbahemenev mba icombor i Iserael ve kaa er:

²²TER, Aôndo u mbaaôndo! TER, Aôndo u mbaaôndo! Un yô, A fa, man Iserael kpaa una fa; aluer ka sha mhendan shin sha tindi u peren u TER yô, de yem se nyian ga!

²³Aluer sea ta atse a nanden nagh sha mi, sha u sé gema sé undun TER, shin u nan nagh ku nanden sha a, shin nagh ku sha samuyia, shin sha u nan iniav mbi bem sha a yô, TER iyol Na, A̱ or iyev.

²⁴Ka sha ishima i nyian je se er kwagh ne ye, se lu kaan ser, alaghga iyange igen ônov enev vea ôr kwagh a ônov asev vea kaa er: Ka nyi i zough ne a TER, Aôndo u Iserael?

²⁵Gadia TER ver Yordan, ka ikighir yase a ven, ne ônov mba Ruben kua ônov mba Gadi, ne mba a kwar ken TER ga; nahan ônov enev vea na ônov asev vea de u cian TER.

²⁶Ka nahan se kaa ser: Sé wa ago iyol hegen, sé ta atse sha ci wase, ka sha ci u nanden nagh sha mi ga, man ka sha ci u nagh ku sôngon kpaa ga,

²⁷kpa a̱ lu shiada hen atô wase a ven man hen atô u icombor yase i ken ijime yase, er se civir TER sha ishigh Nagh sha iniav yasev mbi nanden man iniav yasev mbi sôngon kua iniav yasev mbi bem, sha ci u iyange igen ônov enev ve̱ de kaan a ônov asev er: Ne mba a ma kwar hen TER ga, ze.

²⁸Ka nahan se kaa ser: Tsô zum u vea kaan a vese shin vea kaan a icombor yase ken ayange a ken hemen la nahan yô, se kpaa sé kaa ser: Nenge nen inja i mte u i te atse a TER a nanden nagh sha mi ne, a uter asev ta la, lu sha ci u nagh ku nanden ga, man sha ci u nagh ku sôngon kpaa ga, kpa ka shiada her atô wase a ven.

²⁹Mayange se fatyô u hendan a TER nyian, sé gema ijime Na nyian, sé de u dondon TER ga, sé ta atse a nanden nagh sha mi agen kposo a atse a TER, Aôndo wase, a a lu sha ishigh ki tabernakel Na la, sha ci u nagh ku nanden man ku sha samuyia kua ku sôngon ga.

³⁰Zum u pristi Pinehashi man atiator a mkohol u ior la, ka mbahemenev mba uya mba uter mba Iserael je la, mba ve lu a na imôngo, ve ungwa akaaôron a ônov man Ruben mba ônov mba Gadi kua ônov mba Manase ôr la yô, doo ve kpishi.

³¹Tsô Pinehashi wan u pristi Eleasar kaa a ônov mba Ruben man ônov mba Gadi kua ônov mba Manase er: Nyian se fa TER ngu her atô wase, sha er ne er isholibo ne sha ishigh ki TER ga yô; ne yima Mbaiserael sha ikev i TER ve.

³²Nahan Pinehashi wan u pristi Eleasar kua atiator, mough hen ônov mba Ruben kua ônov mba Gadi, ve due ken tar u Gileadi ve hide ken tar u Kanaan hen Mbaiserael ve va ôr ve kwagh la.

³³Kwagh ne doo Mbaiserael, tsô Mbaiserael wuese Aôndo, ve kera seer ôron er vea nôngo ityav a ve, vea tim tar u ônov mba Ruben kua ônov mba Gadi la ga.

³⁴Tsô ônov mba Ruben man ônov mba Gadi, ii atse la iti er: Nga Shiada hen atô wase er TER A lu Aôndo yô.