Read tiv Yosua 23 Bible Online

Yosua 23 - tiv bible

Yosua 23

¹Tsô ayange nga kar kera kpishi, zum u TER na Iserael mmem sha ikev i mbaihomov vev mba ve kase ve la cii yô, Yosua kpaa bee iyol, tsa sha won;

²nahan Yosua yila Iserael cii, mbatamen vev man mbahemenev vev man mbaajiriv vev kua mbavesen vev, a kaa a ve er: Mo m bee iyol ve, m tsa sha won;

³ne ayol a en ne nenge akaa cii a TER, Aôndo wen, er akuraior ne cii, sha ci wen yô; gadia TER, Aôndo wen, ka Un je, A nenge ityav sha ci wen ye.

⁴Nenge, m kar ne akuraior a a shi ne, hingir dyako u ikwe yen, hii hen Yordan je, kua akuraior cii a m tim la, zan zan za ar hen Zegemnger u Tamen vegher u shin ityôtar la.

⁵TER, Aôndo wen, ka Un je, Una zenda ve sha ishigh yenegh kera, Una kar a ve sha ishigh yenegh kera, né ngohol tar ve, er TER, Aôndo wen, kaa ne nahan.

⁶Nahan yô, taver nen ishima tsung, waan nen akaa a i nger ken ruamabera u atindigh u Mose la cii iko, eren nen sha mi, de undun un kahan ken uwegh ku yanegh shin ku imesegh ga;

⁷de nongo nen a akuraior a a shi ken a ven ne mayange ga, man de teren nen iti i mbaaôndo vev ga, de bumun ve ga, de eren nen ve tom ga, de gur civir nen ve kpaa ga;

⁸kpa var a TER, Aôndo wen, er ne lu eren zan zan nyian nahan.

⁹Gadia TER zenda akuraior a vesen a taver sha ishigh yenegh kera, kpa ne yô, ma or fatyô u tilen ne sha ishi ga zan zan nyian.

¹⁰Or wen môm kpaa ka nan zenda ior dubu; gadia TER, Aôndo wen, ka Un je A nenge ityav sha ci wen ye, er lu kaa ne nahan.

¹¹Nahan kura nen ayol a en dedoo, TER, Aôndo wen, A̱ doo ne ishima.

¹²Gadia aluer nea kaha nea zua a akuraior a a shi her ken a ven ne, nea er kasev ken a ve, vea nungwa a ven yô,

¹³fa nen mimi je, TER, Aôndo wen, Una kera zenda akuraior ne sha ishigh yenegh kera ga, kpaa aa hingir ne kwaghhônon man to man kwagh u kuman ne hen ambusu man usaa ken ashe a en, zan zan né tim ken tar u dedoo kera, u TER, Aôndo wen, A ne ne u ne.

¹⁴Nenge nyian m ngu zan sha gbenda u ior mba sha won cii; ne kpaa ne fa ken asema a en cii kua ken uuma enev cii kpaa, ma kwagh môm sha akaa a dedoo a TER, Aôndo wen, ter sha a ven la bunde ga, a cii i kure ne a vough, ma kwagh môm bunde ga.

¹⁵Tsô, er akaa a dedoo a TER, Aôndo wen, ôr a ven la cii a er ne sha mi nahan yô, kape TER shi Una va ne a akaabo cii, zan zan Una tim ne sha tar u dedoo kera, u TER, Aôndo wen, A ne ne u ne.

¹⁶Aluer nea vihi ikuryan i TER, Aôndo wen, A ye a ven la, né yem né za civir mbaaôndo mbagenev, né gure ve inya yô, ishima ia vihi TER a ven, né tim ken tar u dedoo u A ne u ne, fese je.