Read tiv Yosua 5 Bible Online

Yosua 5 - tiv bible

Yosua 5

¹Tsô zum u utor mba Mbaamor cii mba ve lu yande Yordan, vegher u shin ityôtar la, kua utor mba Mbakanaan cii mba ve lu hen kpe u Zegemnger la, ve ungwa gwa u TER tôndo mngerem ma Yordan sha ishigh ki Mbaiserael zan zan se per yô, ishima shoughom ve ker, ma ishima i taver kera lu ker a ve ga, sha ci u Mbaiserael.

²Hen shighe la je, TER kaa a Yosua er: Er ahô sha awen, shi tsôngo Mbaiserael mtsenge u sha kwa har.

³Tsô Yosua er ahô sha awen, tsôngo Mbaiserael sha Igungu u Mbaipusu.

⁴Er i hii man Yosua tsôngo ve yô, ior mba ve due ken Igipiti cii mbanomso mba ve lu mbanôngontyav la cii, ve kpe sha gbenda ken toho ken ijime i ve due ken Igipiti la.

⁵Gadia i tsôngo ior mba ve due la cii, kpa mba i mar ve sha gbenda ken toho cii ken ijime i ve due ken Igipiti la yô, i tsôngo ve ga.

⁶Gadia Mbaiserael zende ken toho anyom akunduahar zan zan ior cii, ka nomso mbanôngontyav mba ve due ken Igipiti je la, ve saa kera, sha ci u ve ungwa imo i TER ga yô; TER kpaa bum a ve er, Una de ve, ve̱ nenge tar u TER lu bum a uter vev, er Una na se la, ga, tar u dumbur a atumbabua man iyough la.

⁷Ônov vev mba A ver ve sha ityouv vev yô, ka ve, Yosua tsôngo ve ye; gadia ve lu ipusu, sha ci u i tsôngo ve sha gbenda ga yô.

⁸Tsô zum u i bee ior mba i lu tsôngon ve la cii yô, ve tema hen ajiir a ve ken afo zan zan icôngo i bee.

⁹Tsô TER kaa a Yosua er: Nyian M pahar ityuhwanev mbi Igipiti sha a ven kera ve. Ka nahan man i yer ijiir la iti er, Gilgal zan zan nyian ye.

¹⁰Tsô Mbaiserael haa afo hen Gilgal, ve er iniongo i Paseka sha uwer la, ayange a u pue kar anyiin aikighe, hen ukpuunkpuun mba Yeriko.

¹¹Paseka been kera, sev mbu aven yô, sha iyange la je ve ya kwaghyan u hen tar la, umasa mba i we kwa sha mi ga yô, kua alakema u mgbaghen.

¹²Er ve ya kwaghyan u tar la kera, kper nan yô, mana de u haan; Mbaiserael shi kera zua a mana mayange ga, kpa ve ya kwaghyan u ken tar u Kanaan ken inyom la.

¹³Tso zum u Yosua lu hen Yeriko la yô, a kende ashe, a nenge or tile un sha ishi, nan tsuwa sanker nan kôr sha uwe; nahan Yosua za her a nan, za pine nan er: U ngu or wase shinii, u ngu or u mbaihomov aseva?

¹⁴Nan kaa er: Ei! Mo M ngu kur u ikumutya i TER; M va hegen. Tsô Yosua gure wa ityough inya, a sugh, a kaa a Nan er: Ka nyi i lu ter pe kaan wanakiriki Naa?

¹⁵Kur u ikumutya i TER kaa a Yosua er: Tsuwa akôv shin angahar a ou kera, gadia ijiir i u til ne, ka icighanjiir. Tsô Yosua er nahan.