Read tiv Yosua 7 Bible Online

Yosua 7 - tiv bible

Yosua 7

¹Kpa Mbaiserael per tindi sha kwagh u i te icin sha mi la; gadia Akan wan u Karmi, wan u Sabedi, wan u Sera u ken kwe u Yuda, a tôô kwagh sha akaa a i te icin sha mi la; nahan ishima vihi TER a Mbaiserael tsung.

²Tsô Yosua tindi ior due hen Yeriko za hen Ai, u a lu ikua ikua a Bete-aven, vegher u Betel u sha ityoughkitaregh la, a kaa a ve er: Kôndo, za nenge nen tar la mker; tsô ior mbala kôndo za nenge Ai mker.

³Tsô ve hide hen Yosua ve va kaa a na er: Ior ve̱ de kende cii ga; ior er dubu uhar shin utar nahan tsô, ve̱ kôndo ve̱ za hemba Ai; de eren ior ican u zan ker cii ga, gadia mba kpeghee tsô.

⁴Nahan ior mbagenev kuma er dubu utar nahan, ve kôndo sha mi; kpa ve za yevese Mba-Ai.

⁵Ior mba Ai wua ve kuma er ikundugber kar ataratar nahan; ve zenda ve, hii hen hundagar je zan zan ar hen Sebarim, ve hemba ve sha soughsough la; asema shoughom ior ker, hingir er mngerem nahan.

⁶Tsô Yosua ande akondo a na, gba inya kuma ishigh inya hen areki u TER, lu her zan zan aikighe je, un kua mbatamen mba Iserael, ve kura inya ve haa sha ityouv vev kpaa.

⁷Yosua kaa er: Kpe ahii! Tere AÔNDO, ka nyi man U rumun ior mban ve̱ per Yordan kpee, sha u nan se sha ikev i Mbaamor sha er ve̱ tim se? Guda ma se gbe lun yande Yordan keela tsô!

⁸Ku! Tere! me kaa nana er Iserael vande nan ijime hen mbaihomov veve?

⁹Gadia Mbakanaan man mba ve tem ken tar ne cii vea ungwa gwa yô, vea va kase se, vea ese iti yase sha won kera; tsô Ú er nan a Iti You i hembana?

¹⁰Tsô TER kaa a Yosua er: Mough sha, ka nyi u yav u cir ishigh inya nahana?

¹¹Iserael er isholibo; een, ve aver ikuryan Yam je, i M ye a ve la; een, ve tôô kwagh sha akaa a i te icin sha mi la; iv kpaa ve ii, icugh kpaa ve tsugh man ve ver un ken ikav vev je.

¹²Ka nahan man ônov mba Iserael ve fetyô u tilen sha ishigh ki mbaihomov vev ga ye, mba nan ijime ve ken mbaihomov vev, gadia ve hingir mba lun a ifan iyol; Me kera lu a ven mayange ga, saa né dugh kwagh u i te icin sha mi la, her a ven kera.

¹³Mough za wanger ior, kaa wer: Wanger nen ayol a en sha ci u kper; gadia TER, Aôndo u Iserael, kaa er: Kwagh u i te icin sha mi ngu her a ven, Iserael; ú fatyô u tilen sha ishigh ki Mbaihomov ou ga, saa né dugh kwagh u i te icin sha mi la ken a ven kera ve.

¹⁴Nahan pepe yô, va nen sha ikwe sha ikwe; yô, kwe u TER Una tese la, u̱ kporom sha icombor icombor, man tsombor u TER Una tese la, u̱ kporom sha uya uya, man ya u TER Una tese la, a̱ kporom sha nomso nomso.

¹⁵Tsô or u i tese nan, nan lu a kwagh u i te icin sha mi la, á nande nan sha usu, kua akaa a a lu a nan cii, gadia nan aver ikuryan i TER, shi nan er kwagh u ibume ken Iserael kpaa.

¹⁶Tsô Yosua mough pepe pepe, va a Iserael sha ikwe sha ikwe; i tese kwe u Yuda;

¹⁷tsô er a kporom a icombor i Yuda yô, i tese tsombor u Mbasera; er a kporom a tsombor u Mbasera nomso nomso yô, i tese Sabedi;

¹⁸er a kporom a ya na nomso nomso yô, i tese Akan, wan u Karmi, wan u Sabedi, wan u Sera, ken kwe u Yuda.

¹⁹Tsô Yosua kaa a Akan er: Wan wam, shi civir TER, Aôndo u Iserael, wuese Un, kaam kwagh u u er la hegen je, de yeren mo un ga.

²⁰Akan gema kaa a Yosua er: Mimi je, mo m er TER, Aôndo u Iserael, isholibo, kape m er ne:

²¹Er m nenge ikondo i cirin iyol i dedoo i Shinar ken ishar i utya man ushekel mba azurfa deri uhar kua ijen i zenaria i iyohov mbu i mbu kom shekel akunduahargber yô, sarem, tsô m tôô akaa la; nenge i yer a, nga shin inya, her atô u tenti wan man azurfa mase shin.

²²Tsô Yosua tindi mbatyomov, za ayem hen tenti la; yô, nenge i yer a ken tenti na, azurfa mase shin.

²³Ve tôô a her atô u tenti, ve va a mi hen Yosua man hen ior mba Iserael cii; ve ver a sha ishigh ki TER.

²⁴Tsô Yosua kua Mbaiserael cii a na imôngo, ve tôô Akan wan u Sera kua azurfa la man ikondo i cirin iyol la man ijenzenaria la man ônov nav mba nomso man mba kasev man ibua na man ujaki nav man iyôngo na man tenti na kua akaa a a lu a mi cii, ve va a ve hen pev u Akor.

²⁵Tsô Yosua kaa er: Ka nyi u er se ican nahana? TER Una er u ican nyian ne! Nahan Mbaiserael cii ta un awen; ve nande ve sha usu, ve ta ve awen.

²⁶Tsô ve kohol awen, ve ta zegetihi sha a na; nga her zan zan nyian; nahan TER gema de ishima Na i vihin tsung la. I ii ijiir la iti er Pev u Akor, zan zan nyian.