Read tiv Yosua 8 Bible Online

Yosua 8 - tiv bible

Yosua 8

¹Tsô TER kaa a Yosua er: De cie ga, de luun a mciem iyol kpaa ga; kua a mbautyav cii a we imôngo; yô, mough, kôndo sha Ai; nenge, tor u Ai kua ior nav man gar na, kua tar na cii, M na u sha ikev;

²er a Ai kua tor na er u er a Yeriko kua tor na nahan; kpa ishar na kua ilev nav kura nen sha ci u ayol a en; ver mbautyav mbagenev ve̱ yer ken ijime i gar la.

³Tsô Yosua mough a mbautyav cii sha u kôndon sha Ai; Yosua sange ior dubu ikundugber, anomaior a fan ityav, a na ve gbenda tugh.

⁴A kaa a ve er: Nenge, ne yô, za yer nen gar la, ken ijime keela; de luun nen ca a gar la yum ga, kpa ne cii kegh nen iyol;

⁵mo kua ior mba ve lu a mo cii, sé kôndo sha gar la; tsô, zum u vea due sha u nôngon ityav a vese, er ve vande eren hiihii nahan yô, se sé yevese ve;

⁶vea due vea gba zendan se zan zan sé za kende ve ca a gar; gadia vea kaa er: Mba yevese er iyange la nahan. Nahan sé yevese ve,

⁷tsô né mough henpe ne yer la, né ngohol gar la, gadia TER, Aôndo wen, Una na un sha ikev yen.

⁸Tsô, shighe u gar una hingir sha ikev yen yô, nande nen un sha usu; ka sha mkaanem ma TER, er nen ye; nenge, m kaa ne imo yam ve.

⁹Tsô Yosua na ve gbenda; ve yem henpe yeren la, ve za lu hen harga u Betel vea Ai, vegher u Ai u shin ityôtar la; kpa Yosua yô, tsa a ior hen tugh mbula heregh.

¹⁰Tsô Yosua mough pepe pepe, kohol ior, kôndo, un kua mbatamen mba Iserael, ve hemen ior u zan sha Ai.

¹¹Mbautyav mba ve lu a na cii, ve kôndo, ve kporom ve va sha ishigh ki gar, ve haa afo hen Ai vegher u imbusutarimese la; pev lu her atô na a Ai.

¹²A tôô nomsombaiorov er dubu utaan nahan a yer ve hen harga u Betel vea Ai, veghergar u shin ityôtar la.

¹³Kape ve ver ior la; mbautyav cii mba ve lu gar vegher u ken imbusutarimese la kua mbayeren vev mba ve lu vegher u shin ityôtar la; tugh mbula je, Yosua za hen atô u pev la.

¹⁴Tsô tor u Ai nengen nahan yô, ior mba hen gar la ve mough fefa ve kange iyol pepe, ve due sha u nôngon ityav a Mbaiserael, tor a ior nav cii, sha ijiir i i vande veren sha hemen u Araba la; kpa a fa er mbayeren lu ken ijime gar ga.

¹⁵Tsô Yosua man Iserael cii gba yevese er i hemba ve nahan, ve yevese ve yem vegher u desereti.

¹⁶I yila ior mba ken gar cii er ve̱ kohol, ve̱ zenda ve ijime; ve cir sha Yosua zan zan i za kende ve ca a gar.

¹⁷Ma nomsoor môm ken Ai shin Betel de duen sha u zendan Mbaiserael ijime ga; ve undu gar gbilin, ve lu zendan Iserael ijime.

¹⁸Tsô TER kaa a Yosua er: Naregh iwange i u lu a mi sha uwe la vegher u ken Ai, gadia Me na u un sha ikev; tsô Yosua naregh iwange i i lu un sha uwe la vegher u ken gar.

¹⁹Tsô mba ve yer la ve mough hen ijiir ve fefa, ve ngohol un; ve nande gar la fefa.

²⁰Ior mba Ai mba gem ashe yô, ve nenge, mnyim ma gar kôndo Sha je, ve kera fatyô u yevese hiden keen shin keela ga; ior mba ve yevese ve yem vegher u desereti la kpaa, ve gema ve ta num sha mba ve lu zendan ve ijime la.

²¹Zum u Yosua kua Mbaiserael cii nenge er mbayeren mbala ngohol gar, man mnyim ma gar ma kôndo sha je yô, ve gema ve ta num sha ior mba Ai.

²²Mba ken gar mbala kpaa due ta num sha a ve; ve hingir hen atô u Mbaiserael, mbagenev ken vegher ne mbagenev ken vegher la; ve hemba ve, ve kera de mô ve môm war ga.

²³Ve kôr tor u Ai uma, ve va a na hen Yosua.

²⁴Tsô zum u Iserael wua ior i Ai ken akôngo bee, hen desereti henpe ve zenda ve ijime la, zan zan ve cii ve kpe sha zwa u sanker, ve bee yô, Mbaiserael cii gema hide hen Ai, ve va hemba un sha zwa u sanker.

²⁵Ior mba ve kpe sha iyange la cii yô, nomso kua kasev kuma ior dubu pue kar uhar, ka ior i Ai cii je la.

²⁶Gadia Yosua hide a uwegh nagh ku naregh iwange a mi la ga, zan zan i tim ior i Ai cii i bee.

²⁷Saa ilev kua ishar i gar la, Iserael kura, sha mkaanem ma TER kaa a Yosua la ye.

²⁸Kape Yosua nande Ai la, gema un hingir tihialôgh gbem, ka ice zan zan nyian.

²⁹A sende tor u Ai sha kon; lu sha min zan zan iyange bee; iyange ngur miren yô, Yosua kaa er, i̱ hungwa a ikom na; ve gbihi i hen hundagar, ve kohol awen ve ta tihi sha mi; nga her zan zan nyian.

³⁰Tsô Yosua ta TER, Aôndo u Iserael, atse a nanden nagh sha mi, sha uwo u Ebal,

³¹er Mose wanakiriki u TER kaa Mbaiserael nahan, er i nger ken ruamabera u tindi u Mose yô: atse a sha awen a i koo a ga, a ma or nan bende iyôgh sha mi ga; ka sha a, ve na TER iniav mbi nanden, man shi ve sôngo iniav mbi bem kpaa ye.

³²Hen ijiir la a kimbir u ngeren tindi u Mose sha awen sha ashe a Mbaiserael je.

³³Mbaiserael cii, kua mbatamen vev man mbahemenev vev man mbaajiriv vev, ve tile, mbagenev vegher u areki keen, mbagenev di vegher u keela sha ishigh ki Mbalevi mba ve lu upristi, ve tôô areki u ikuryan u TER la; ior mba ve nyer a nyôr kua mba tar la jim, vegher ve ugen tile sha ishigh ki uwo u Gerishim, vegher ugen sha ishigh ki uwo u Ebal, er Mose wanakiriki u TER vande kaan er ve̱ ver ior mba Iserael doo doo la nahan.

³⁴Ken masetyô yô, a ôr akaaôron a tindigh cii, iveren kua ifan la, er i nger ken ruamabera u tindi la cii yô.

³⁵Ma kwaghôron môm u Mose kaa cii, Yosua de u ôron sha ishigh ki mkohol u ior i Iserael ga, kua kasev man mbayev mba kiriki man mba ve nyer ve a nyôr ve lu zenden a ve imôngo la kpaa.