Read tiv 2 Mbatesalonika 3 Bible Online

2 Mbatesalonika 3 - tiv bible

2 Mbatesalonika 3

¹Ken masetyô yô, anmgbianev, eren nen msen sha ci wase, kwaghôron u Ter a̱ samber fefa, a̱ zua a icivir er i lu ken ven nahan,

²i̱ yima se sha ikev i ior mba vihin kwagh man mbaaferev, gadia ka ior cii ve lu a jighjigh u nan ga.

³Kpa Ter ka u jighjigh je, Una taver ne agee, Una shi Á kura ne sha ikev i Orbo kpaa.

⁴Se mba veren asema sha a ven ken Ter ser: Akaa a se we ne kwagh sha mi la, ne mba eren shi nea er a kpaa.

⁵Ter A̱ kôôm asema a en u zan ken dooshima u Aôndo man ishima i wan i Kristu.

⁶Anmgbianev, se mba wan ne kwagh ken iti i Ter Yesu Kristu ser, kem nen ayol sha hanma anmgbian u nan zenden nzughul nzughul, i kera lu sha ityesen i ne ngohol hen vese la ga yô.

⁷Gadia ne ayol a en ne fa er i doo u né kav se yô, gadia se zende ken a ven nzughul nzughul ga.

⁸Mayange se ya kwaghyan hen ma or gbilin kpaa ga, saa sha tom u sha ican man u sha gbashima tugh man tetan sha u se̱ de kera zan mô wen iyol ga yô.

⁹Lu sha ci u se lu a tahav ga ze, kpa lu sha u se̱ na ayol a ase a̱ hingir ne ikav i nengen sha mi er né kav se yô.

¹⁰Gadia er se lu a ven imôngo la je, se wa ne kwagh ser: Aluer tom u shiren doo or ga yô, kwaghyan kpaa nana̱ de ye ga.

¹¹Gadia se ungwa mbagenev ken ven mba zenden nzughul nzughul, mba kera eren tom ga, kpa mba amber sha akaa.

¹²Ambaaior la yô, se mba wan ve kwagh, se mba taver ve asema ken Ter Yesu Kristu ser: Ve̱ kundu ishima, ve̱ eren tom, ve̱ ya kwaghyan ve ayol a ve.

¹³Kpa ne yô, anmgbianev, uwer u̱ de gbe ne u eren akaa a dedoo ga.

¹⁴Aluer hanma or nana ver ato sha kwaghôron wase u ken takerada ne ga yô, ver nen nan ikav, de kera zough nen a nan ga, i̱ va nan ahenge.

¹⁵Kpa de nengen nen nan er ka orihom ga, kpa wa nen a wa nan kwagh er ka anmgbian nahan.

¹⁶Ter u bem iyol Na, A̱ na ne bem gbem sha hanma gbenda cii. Ter A̱ lu a ven cii.

¹⁷Ishughun i mo, Paulu sha uwegh agh ne, ku ku lu ikav ken hanma washika yô, kape m ngeren ne.

¹⁸Mrumun u sha mhôôn u Ter wase Yesu Kristu a̱ lu sha a ven cii.