Read tiv 1 Timoteu 4 Bible Online

1 Timoteu 4 - tiv bible

1 Timoteu 4

¹Kpa Jijingi ngu kaan wanger wanger er: Sha ayange a masejime yô, mbagenev vea undu jighjigh u nan, vea ver ishima sha ujijingi mba tsughun ior man sha ityesen i ujijingi mba bov.

²Ka sha imanger i mbaaiev mba i ver ve ikav ken imo i ken asema a ve er ka sha iyôgh ki acivin nahan.

³Mba yange kwase u eren, mba tsweren akaayan a Aôndo A gbe a sha u mba ve ne jighjigh shi ve fe mimi la, ve̱ ngohol a sha ishughun la.

⁴Hanma kwagh u Aôndo A gbe cii ka u doon, ma kwagh u vendan ngu ga, aluer á ngohol un sha ishughun yô,

⁵gadia hingir icighankwagh sha kwaghôron u Aôndo man sha msen u eren.

⁶Aluer u tesen anmgbianev akaa ne yô, ú lu ortom u dedoo u Kristu Yesu u i koso u sha akaaôron a sha jighjigh u nan man sha ityesen i dedoo i u dondo sha mi la.

⁷Kpa ukwaghhir mba dang dang mba ungômbakasev la yô, venda kera. Kar iyol you sha u ú taver sha u civir Aôndo yô.

⁸Gadia u karen iyol, i̱ taver la tseegh yô, wa ngun a inja kpeghee, kpa u civir Aôndo yô, ngu a inja sha akaa cii gadia ngu a ityendezwa sha uma u hegen ne kua uma u a lu van la kpaa.

⁹Kwaghôron ne ka u jighjigh, a kuma u rumun un a ishima i môm.

¹⁰Ka sha kwagh ne se lu eren tom tsung se lu nôngon sha ican kpaa ye: ka er se ver asema ase se lu keghen Aôndo u uma u A lu Oryiman u ior cii la, jim yô, ka u mbananjighjigh.

¹¹Wa kwagh sha akaa ne shi tesen a kpaa.

¹²Ma or nana̱ de lahan we er u ngu wanye ga, kpa hingir mbananjighjigh ikav sha kwaghôron man sha zende man sha dooshima man sha jighjigh u nan man mlu u wang kpaa.

¹³Ver ishima u ôron ior Bibilo man u wan kwagh man shi u tesen zan zan me kar van.

¹⁴De hundu ishima sha iwua i sha mrumun u sha mhôôn i i lu ken we i i ne u sha kwaghôron u profeti man ave a pendan a mbatamen la ga.

¹⁵Nôngo sha akaa ne, penda ishima sha mi sha u ior cii vea nenge mzehemen wou yô.

¹⁶Ver ishima sha iyol you man ityesen you kpaa, taver ishima sha mi. Aluer ú er nahan yô, ú yima iyol you kua shi mba ve lu ungwan we la kpaa.