Read tiv 2 Timoteu 1 Bible Online

2 Timoteu 1 - tiv bible

2 Timoteu 1

¹Paulu apostoli u Kristu Yesu sha ishima i Aôndo sha inja i ityendezwa i sha uma u a lu ken Kristu Yesu la,

²ngu sughun Timoteu, ka wan wam u ishima ishima. Mrumun u sha mhôôn man mhôônom ma zungwen man bem mba ve dugh her Aôndo Ter man Kristu Yesu Ter wase ve̱ lu sha a we.

³Ka mea umbur we ken mbamsen av gbem tugh man atetan yô, m wuese Aôndo u m lu civir Un sha imo i ken ishima i nan mo ibo ga la er uter av kpaa lu eren nahan.

⁴Hangem pe zuan ishigh a we sha u iember yam i̱ iv yô, gadia m umbur mliam ou.

⁵M ngu umbur jighjigh u nan u mimi u a lu ken a we, u a vande lun ken ngôu u tamen Loisi man shi ken ngôu Unise kpaa, shi m fa dedoo mer ngu ken we kpaa.

⁶M ngu umbur we sha u seer nderen iwua i sha mrumun u sha mhôôn i i lu ken we la sha mpende u m penda ave sha a we la.

⁷Gadia ka jijingi u cian kwagh, Aôndo a ne se ga, kpa ka u ageegh man u dooshima man u kôron iyol tsaha.

⁸Nahan yô, kunya u̱ de ker u u eren shiada sha u pasen Ter wase ga, u̱ de ker u sha kwagh wam, mo orkwar Na kpaa ga, kpa nyôr nongo sha ican i yan sha ci u Loho u Dedoo sha agee a Aôndo,

⁹u A yima se shi A yila se sha icighanmyer la, lu sha ci u aeren a ase ga kpa lu sha awashima Na iyol Na man shi sha mrumun u sha mhôôn Na u i ne se ken Kristu Yesu je er shighe lu a lu ga la.

¹⁰Kpa i pase un ken igbar hegen sha mve u Oryiman wase Yesu Kristu u A ngohol ku agee kera, A va a uma man mtsôr ken iwanger sha Loho u Dedoo.

¹¹I verem or u yôôn u, man apostoli u u man ortesen u u kpaa;

¹²ka sha ci u kwagh ne man m lu yan atsan ne nahan ye, kpa kunya kôrom sha mi ga. Gadia m fa Un u m na Un jighjigh la man m fa dedoo mer Una fatyô u kuran kwagh u i wem sha ikev la zan zan iyange la.

¹³Kwaghôron u dedoo u u zough a mi hen mo yô, a̱ lu u ikav i zan sha mi sha kwagh u jighjigh u nan man dooshima u ken Kristu Yesu.

¹⁴Kura kwagh u dedoo u i we u sha ikev la sha agee a Icighan Jijingi u A tem ken vese la.

¹⁵U fa er mba ken Ashia cii ve gem ijime a mo yô. Figelu man Hermogene kpaa mba ken ve.

¹⁶Ter A̱ zungwe ya u Onesiferu mhôônom gadia a wasen mo acin imôngo, kunya kôr un a ikangenev yav kpaa ga.

¹⁷Zum u a va nyôr ken Roma yô, a kerem tsung, a zua a mo kpaa.

¹⁸Ter A̱ na un a̱ zua a mhôônom ma zungwen hen Ter sha iyange la—man ityom kpishi i a er ken Efese la kpaa u fa i dedoo.