Read tiv 2 Timoteu 2 Bible Online

2 Timoteu 2 - tiv bible

2 Timoteu 2

¹Nahan yô, we wan wam, taver ken mrumun u sha mhôôn u ken Kristu Yesu la.

²Akaa a u ungwa hen mo, mbashiada kpishi kpaa lu her la, gema wa sha ikev i ior mba ve lu jighjigh mba vea kuma u tesen mbagenev kpaa yô.

³Nyôr nongo ken ican i yan er orutya u dedoo u Kristu Yesu nahan.

⁴Ma orutya u nan lu nôngon ityav ave yô nan cimin iyol i nan sha akaa a uma u tar ne ga, gadia ka u nana̱ er kwagh u doon or u a tsough nan sha ci u utya la.

⁵Aluer or ngu gban gesa u ayemegh a mbagenev yô, nana gba zuan a tsar ga, saa nana yevese sha tindi.

⁶Orsule u nan er tom sha gbashima la yô, ka nan nana̱ vande zuan a kwar sha iyiagh kila keng.

⁷Ver ikav sha kwagh u m kaa u ne gadia Ter Una na u mkav sha akaa cii.

⁸Umbur Yesu Kristu u i nder Un shin ku, u A lu ken tsombor u Davidi la, er m pase ken ivangeli yam nahan.

⁹Ka sha ci u i man m ya ican je i kangem kpaa er ka iferor nahan ye. Kpa kwaghôron u Aôndo yô, ngu uikangen ga.

¹⁰Ka nahan man m we ishima sha akaa cii ye, sha ci u uicuwanmbaiorov, sha u ve kpaa, ve̱ zua a myom u ken Kristu Yesu la kua iengem i tsôron.

¹¹Kwaghôron ne ka u jighjigh: Aluer se kpe a Na imôngo yô, sé lu uma a Na imôngo kpaa.

¹²Aluer se wa ishima yô, sé ya tor a Na imôngo. Aluer se nyiman Un yô, Un kpaa Una nyiman se.

¹³Aluer se kera lu jighjigh ga yô, Un yô ngu jighjigh her. Gadia u Una nyiman mlu Na iyol Na yô, Una fatyô ga.

¹⁴Umbur ior man shi pase sha ishigh ki Aôndo wer, ve̱ de sendegh kwaghôron sha asemberakaa a ôron ga, nga a inja sha ma kwagh ga, mba ve veren ato sha a kpaa, nga ze a ve ken mtim.

¹⁵Nôngo sha gbashima u veren iyol you sha ishigh ki Aôndo er or u i kar nan nan kom yô, ortom u i gba u nana ya kunya ga yô, or u nan pasen kwaghôron u mimi la jighilii.

¹⁶Palegh ayôôso a gbilinigh a dang la. Gadia vea hemba yemen a yem hemen sha u vendan Aôndo.

¹⁷Kwaghôron ve una za hemen er ivav i samber yan or iyol nahan. Himeneu man Filetu kpaa mba ken a ve.

¹⁸Mban yô, ve tsume ve undu mimi ve kaa er mnder u shin ku kar kera bee je. Mba nzughul a jighjigh u nan u mbagenev.

¹⁹Kpa imagh ki Aôndo ki ki tenger ga la yô, ki tile her, ki a ikav ne: Ter fa mba Nav, man shi, hanma or u nan teren iti i Ter yô, nana̱ pav a ifer.

²⁰Ken ya u vesen yô, ka ikav mbi sha zenaria man azurfa tseegh mbi lu ker ga, kpa mbi sha kon man mbi sha inyatyuu kpaa mbi. Mbigenev ka mbi eren akaa a icivirigh a mi, mbigenev yô, ka u eren akaa a a lu a icivir ga la a min.

²¹Aluer or nana dugh akaa ne ken iyol i nan kera yô, nana lu ikagh ki icivirigh ki i tsegha ki, ki lu or u ki a inja kpishi yô, ki i ser ki sha ci u hanma tom u dedoo yô.

²²Nahan yevese asaren a sha inja i mbayevikaior la, gema dondo perapera ityô, man jighjigh u nan man dooshima man bem a mbala mba ve yer iti i Ter sha ishima i wang la imôngo.

²³Kpa nyagh anyimanaikaa a ibume a injaa ga la gadia u fa er a ne ayongo yô.

²⁴Kpa kpan u Ter yô, ka u nana̱ lu or u ayongo ga keng, kpa nana̱ lu sar sar a ior cii, nana̱ lu or u fan ityesen man or u wan ishima kpaa,

²⁵nana̱ kôôm mbahendan kwagh a nan sha ishima i legh legh. Alaghga Aôndo Una na ve mgemshima vea kav mimi,

²⁶vea nder vea war to u diabolo, gadia a vande kôron ve sha u ve̱ er ishima na yô.