Read tiv 2 Timoteu 3 Bible Online

2 Timoteu 3 - tiv bible

2 Timoteu 3

¹Fa kwagh ne. Ken ayange a masejime yô, ashighe a ican aa va.

²Gadia ior vea hingir mbawan ayol a ve iko tseegh man mba inyaregh ki doo ve ishima man mbahagher sha akaa man mbagengeseyol man mbaôron kwagh dang dang, man mbahemban mbamaren vev ato man mbalun a ishughun ga man mbalun wang ga,

³man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga

⁴man mbapasen ior aker man mbawan uma ve iko ga man mbamoronyol a ve man mba iember i iyolough i hembe doon ve a Aôndo la.

⁵Sha ashe yô mba a mlu u civir Aôndo la kpa mba geman mba nyiman agee la. Nyagh ambaaior la.

⁶Mbagenev ken ve yô, mba nyer ken uya, mba ker adômaukase a asorabo a ngee a iyol, asaren kposo kposo a lu hemen a la.

⁷Mba henen ityesen gbem kpa mba fan ityô u aren sha mfe u vea fa mimi la ga.

⁸Er Yane man Yambere kpaa lu hendan a Mose nahan kape mban kpaa ve lu hendan a mimi la, ka ior mba mhen ve a vihi, jighjigh u nan ve kpaa a lu vough ga yô.

⁹Kpa vea kera za hemen yum ga, gadia ior cii vea va kav ibumegh vegh wanger wanger er yan i kav ki ior mba uhar mbala nahan.

¹⁰Kpa we u lu a mo mangeraa sha ityesen man ieren yam man ishimaveren yam man jighjigh u nan man ishima i wan man dooshima man ishima i taver

¹¹man mtev u sha ican man atsan a a tserem ken Antioki man Ikonium man Lisetera. Mbamtev mba sha ican ne cii m wa ishima sha mi, man ve cii, Ter yimam sha mi.

¹²Man mba i sar ve pe zenden sha mciviraôndo ken Kristu Yesu cii á tôv ve a ican.

¹³Kpa udangmbaiorov man mbatsughunior vea yem hemen hemen vea hemba vihin a vihi kwagh. Mba tsughun ior man ve di kpaa mba gem mba tsughun ve.

¹⁴Kpa we yô, lu ken akaa a i tese u, u ne a jighjigh la, gadia u fa ve mba u hen sha ikev ve la.

¹⁵Man shi u fa er hii iyev je u kav icighanruamabera u a fatyô u tesen we u zan ken myom sha jighjigh u nan u ken Kristu Yesu la.

¹⁶Gadia icighanruamabera cii ka Aôndo A ne i nger ye. Ngu a inja sha ityesen man sha mkôôm man sha myange man sha myese u ken perapera kpaa,

¹⁷sha u or u Aôndo nana̱ kuma nana̱ lu a ago iyol sha ci u hanma tom u dedoo.