Read tiv Titu 2 Bible Online

Titu 2 - tiv bible

Titu 2

¹Kpa we yô, ôron akaa a a kom ityesen i dedoo la.

²Wa mbaganden kwagh wer, ve̱ lu per, ve̱ tema sha inja sha inja, ve̱ lu tsev tsev, i̱ kpe jighjigh ve u nan la iyol kua dooshima man ishima i wan ve la kpaa.

³Kape kasev mba tamen kpaa ve̱ lu la, mlu ve a̱ kuma icivir, ve̱ de eren angereke ga, ve̱ de lu mba msôrom ma ye tor sha a ve ga, kpa ve̱ tesen akaa a dedoo.

⁴Nahan man vea wa kasev mba kiriki kwagh er noov vev ve̱ doo ve asema kua shi ônov vev kpaa,

⁵ve̱ lu tsev tsev, ve̱ lu wang, ve̱ sôron uya vev, ve̱ eren dedoo, ve̱ ungwan imo i noov vev, sha u i̱ de lamen sha kwaghôron u Aôndo dang ga yô.

⁶Kape mbayevikaior kpaa, wa ve kwagh la, ve̱ lu tsev tsev sha akaa cii.

⁷Lu ve ikav i tesen sha aeren a dedoo man sha ityesen i mimi man mlu u sha inja sha inja

⁸man sha kwaghôron u a lu vough, a gande u nyiman kpaa, sha u or u nan mough ahendan nana̱ va ahenge nana̱ de fetyô u teren se sha kwaghbo ga yô.

⁹Mbashirentom kpaa, ve̱ ungwan imo i uter vev ken akaa cii, ve̱ eren kwagh sha ishima ve kpaa, ve̱ de hon ga,

¹⁰ve̱ de iin ga, ve̱ eren akaa cii sha jighjigh doo doo sha u vea hingir kwagh u hweegh sha ityesen i Aôndo Oryiman wase sha akaa cii.

¹¹Gadia mrumun u sha mhôôn u Aôndo va ande ve, a va a myom sha ci u ior cii.

¹²Ngu tesen se er se̱ venda mwe u i wa Aôndo iko ga la man asaren a taregh kpaa, se̱ zenden tsev tsev man sha jighjigh man sha mciviraôndo kpaa ken tar u ainge ne,

¹³se̱ keghen ishimaverenkeghen i dedoo, ka m-ande u iengem i Aôndo wase u A vese yum ne man Oryiman wase Kristu Yesu

¹⁴u A ne iyol Na sha ci wase sha u Una paa se sha hanma ifer cii man shi Una wanger nongoior sha ci Na iyol Na, mba asema a tsee ve u eren akaa a dedoo.

¹⁵Ôron akaa ne, waan kwagh man shi yangen kwagh sha utaha cii. Ma Or nana̱ de lahan we ga.