Read tiv Mbaheberu 13 Bible Online

Mbaheberu 13 - tiv bible

Mbaheberu 13

¹Dooshima u anmgbianev ve doo ayol a ve la a̱ lu her.

²De hundu nen ishima u eren dedoo a mbavannya ga gadia ka sha u eren nahan man mbagenev nyôr a mbatyomov mba Shaav ken ya ve abu ye.

³Umbur nen mbakwarev, er ne kpaa ne mba mbakwarev a ve imôngo nahan, shi umbur nen mba i lu eren a ve dang dang la, gadia ne kpaa ne mba a iyol.

⁴Ivaa i̱ lu kwagh u icivirigh hen ior cii, gambe u ivaagh kpaa a̱ de lu a acôghol ga, gadia Aôndo Una ôr mbaerenijimba man mbavihin ivaa sha idya la ijir.

⁵Inyaregh ki saren ki̱ de luun ken uma wen ga. Kwagh u ne lu a mi yô, a̱ kuma ne, gadia A kaa er: Mayange Me undu u ga, Me kende u kpaa ga.

⁶Nahan yô, se fatyô u kaan vangertiôr ser: Ter ka Orwasen mo, me kera cia ga, ka nyi je or á ereme?

⁷Umbur nen mbahemenev enev, ve mba ve ôr ne mkaanem ma Aôndo, ver nen ishima sha mkur u zende ve man shi kav nen jighjigh ve u nan kpaa.

⁸Yesu Kristu ngu inja i môm tsô, nyen kua nyian zan zan gbem sha won.

⁹I̱ de kera daase a ven sha atesen a he anza kposo kposo ga, gadia u taver ishima sha mrumun u sha mhôôn yô, hemba doon a akaa a yan a ya a, mba ve za sha mi la, ve kera zua a iwasen sha mi ga.

¹⁰Se mba a atse a nanden nagh sha mi a mba eren tom sha tabernakel la, ve lu a ian i yan kwagh sha mi ga yô.

¹¹Gadia ilev mbi zegepristi a lu nyôron a awambe a mbi ken icighanjiir sha u nan nagh sha ci u asorabo yô, agundu a mbi yô, i nanden a kera ken akôngo a afoogh.

¹²Ka nahan man Yesu kpaa, a kpe hen hundagar ken won ye, ka sha ci u Una tsegha nongoior sha awambe a Na iyol Na yô.

¹³Nahan se kpaa se due nen se za kohol Un ken akôngo a afoogh, iheen Na la kpaa se tôô nen i.

¹⁴Gadia se mba a ma gar u tsôron heen je ga, kpa se mba keren u a lu van la.

¹⁵Nahan se naan nen Aôndo nagh ku iwuese gbem sha a Na, ka atam a ityumbujôôgh i pasen iti Na ken igbar je la.

¹⁶Kpa u eren dedoo man shi u panden karen ior a̱ de hungul ne ga gadia anza a iniav mbin ne doo Aôndo.

¹⁷Ungwan nen imo i mbahemenev enev, hide nen a ayol a en ijime hen ve gadia mba kuran uuma enev er ka ior mba vea za pase kwagh u ve er la keng nahan. Ve̱ er nahan saan saan i̱ de lu sha ishima i vihin ga, gayô, á lu ne a inja ga.

¹⁸Eren nen msen sha ci wase, gadia se fa dedoo ser, se mba a imo i dedoo ken ishima, sar se u zenden tsembelee sha akaa cii.

¹⁹M ngu hemban taver ne ishima u eren nahan, sha u ma i hembe hiren a mo fefa her a ven.

²⁰Aôndo u bem u A nder Ter wase Yesu Orkuranilev u tamen shin mbakpenev sha awambe a ikuryan i tsôron,

²¹A̱ na ne sha u né lu vough sha hanma kwagh u doon cii sha u eren ishima Na, gadia ngu eren kwagh u a doo Un la ken a vese sha Yesu Kristu u A lu a icivir gbem sha won yô. Amen.

²²Anmgbianev, m ngu wan ne kwagh mer, wa nen iko sha kwaghôron u taver ne asema ne gadia m nger ne tiônôô tsô.

²³Fa nen, i pase anmgbian wase Timoteu, i tuhwa. Aluer una va fefa yô, mo sea na sé zua ishigh a ven.

²⁴Sugh nen mbahemenev enev cii kua uicighanmbaiorov cii kpaa, nam nen. Mba ve lu Mbaitalia la mba sughun ne.

²⁵Mrumun u sha mhôôn a̱ lu sha a ven cii.