Read tiv Mbaheberu 2 Bible Online

Mbaheberu 2 - tiv bible

Mbaheberu 2

¹Nahan yô, ka u sé hemba veren ishima sha akaa a se vanden ungwan la keng sha u se̱ de kuwan karen ihongo ga yô.

²Gadia aluer kwaghôron u i ôr sha zwa u mbatyomov mba Shaav la lu dông man hanma mper u tindi kua hanma ihembeato kpaa i or iyev sha mi vough yô,

³nahan se sé war nana aluer sé kera wa myom u vesen ne iko ga yôô? Ka Ter A hii u pasen un ye, mba ve ungwa un la kpaa, ve va taver un hen vese.

⁴Aôndo kpaa lu eren shiada a ve imôngo sha uivande man sha akaa a kpilighyol man akaa a ageegh atô kposo kposo man shi sha ikwar i karen i Icighan Jijingi sha ishima Na kpaa.

⁵Gadia kera ka mbatyomov mba Shaav man A na ve tar u u lu van, u se lu ôron kwagh u u la sha ikev ga.

⁶Kpa orgen er shiada mape er: Or ngu nyi ve U umbur nana? man shi wan u or kpaa er U we nan iko yô?

⁷U er nan nan yina sha mbatyomov mba Shaav sha anshighe kpeghee, U cir nan iengem iyol kua icivir kpaa,

⁸U gema akaa cii U ver shin angahar a nan, hingir sha ikev i nan je Gadia sha mver u A ver akaa cii sha ikev i nan la yô, A kera shi a ma kwagh u a lu sha ikev i nan ga ze. Hegen yô, se mba a nenge i ver akaa cii sha ikev i nan ve ga.

⁹Kpa se mba nengen a Yesu u i ver Un A yina sha mbatyomov mba Shaav sha anshighe kpeghee la. Ka sha ci u ican i kuugh la man i cir Un iengem iyol kua icivir kpaa ye, sha u Una kav mlu u kuugh sha ci u ior cii, sha mhôônom ma Aôndo.

¹⁰Gadia Un u akaa cii a dugh her a Na yô, er A lu van a ônov mba nomso kpishi ken iengem yô, doo u Una sôr Orhemen u myom ve, A̱ hingir vough, sha atsan a yan.

¹¹Gadia Un u A lu tseghan la man ve mba i lu tseghan ve la ka hen u môm man ve cii ve dugh ye. Ka nahan man kunya kera kôr Un u yilan ve er anmgbianev ga ye.

¹²A kaa er: Me pase anmgbianev Av iti You, ka her atô u mkohol man me wa icam i civir We ye.

¹³Man shi: Mo yô, Me suur sha a Na. Man shi: Nenge, M ngun, kua ônov mba Aôndo A nem ne.

¹⁴Er ônov ve zough sha inyam man awambe cii yô, kape Un kpaa A nyôr nongo a ve sha kwagh la, sha er ka sha ku man Una vihi agee a un u a lu a tahav mbu kuugh la kera ye, ka diabolo je la,

¹⁵man sha er Una pase ve cii Una tuhwa, ka ve mba ve lu ken uikangen sha mciem ma kuugh la er i mar ve la je.

¹⁶Gadia mimi je, ka mbatyomov mba Shaav man A ver ishima sha a ve ga kpa ka tsombor u Aberaham A ver ishima sha u ye.

¹⁷Nahan yô, lu u i̱ er Un A̱ lu kwagh môm a anmgbianev Nav sha akaa cii keng sha u Una hingir zegepristi u zungwen mhôônom man u jighjigh kpaa sha akaa a Aôndo, sha u Una na iwom sha ci u asorabo a ior.

¹⁸Un iyol Na ican er Un, sha imeen i i lu meen Un la, ka sha ci u nahan man A fetyô u wasen mba i lu meen ve la ye.