Read tiv Mbaheberu 5 Bible Online

Mbaheberu 5 - tiv bible

Mbaheberu 5

¹Gadia hanma zegepristi u i tsough un hen ior yô, i ver un u eren tom sha ci u ior, sha akaa a Aôndo la, sha u una naan uiwua kua iniav sha ci u asorabo yô.

²A fatyô u wan ishima a mbalanenkwagh man mbatsumen gadia un iyol na kpaa, isheer kase un.

³Sha ci u kwagh ne yô, lu u una naan nagh sha ci u asorabo sha ci na iyol na keng, di er a naan sha ci u nongoior la nahan.

⁴Man mayange or gbe ngohol icivir ne iyol i nan tsô ga, kpa ka Aôndo je A yer nan ye er A yila Aron nahan vough.

⁵Kape Kristu kpaa A civir iyol Na er Una hingir zegepristi ga la, kpa ka Un u A ôr kwagh a Na la, A kaa er: We, U ngu Wan Wam je, Mo M mar U nyian.

⁶Kape A kaa ijiir igen kpaa la er: We U ngu pristi gbem sha won sha inja i Melkisedeki.

⁷Sha ayange a Yesu lu ken mlu u or la yô, A eren mbamsen man uzamber sha imo i genger genger man shi a mliam ashe kpaa. A sôn Un u A fatyô u yiman Un ken ku la, man i ungwa Un kpaa sha ci u mcieaôndo Na la.

⁸Shin er Un lu Wan nahan kpaa, A hen iko i wan sha atsan a A ya la.

⁹Er A hingir vough yô, A hingir itine i myom u tsôron sha ci u mba ve ongo imo Na la cii.

¹⁰Maa Aôndo yila Un er Zegepristi u sha inja i Melkisedeki.

¹¹Sha kwagh ne yô, se mba a kwaghôron her kpishi, man a cimin u pasen kpaa gadia ne hingir mbaungwan tumbuluu.

¹²Gadia shighe yô, kuma u ma ne lu mbatesen je, kpa i shi i gba ne u orgen nana or ne atôakaa a hiihii a sha akaaôron a Aôndo la, ne hingir mba kwagh a gbe ne u man atumba, kera ka kwaghyan u taver ga.

¹³Gadia hanma or u nan me atumba yô, nan ngu a via sha kwaghôron u perapera ga gadia nan ngu wanikundan je.

¹⁴Kpa kwaghyan u taver yô, ngu sha ci u mbaganden, ka ve mba ve er tom sha mkav u ken ishima la, hoghor ve u paven kwagh u dedoo a kwagh u bo.