Read tiv Mbaheberu 6 Bible Online

Mbaheberu 6 - tiv bible

Mbaheberu 6

¹Nahan yô, se de nen kwaghôron u hiihii u sha kwagh u Kristu la, se za nen hemen sha mlu u vian la, sé kera kimbir u wan imagh ki mgemshima u sha aeren a a lu kpenegh la ga, shin u nan Aôndo jighjigh,

²shin ityesen sha kwagh u batisema, shin ave a pendan, shin mnder u mbakpenev, shin ijirôron i tsôron la kpaa ga.

³Man ka kwagh u sé er je ne aluer Aôndo Una rumun yô.

⁴Gadia ve mba kwagh a vande wanger ve man ve kav iwua i Sha, man ve lu a kwar sha Icighan Jijingi

⁵man ve kav mdoom ma mkaanem ma Aôndo kua agee a ayange a ken hemen la,

⁶man vea mase gban kera yô, á fatyô u shi hiden a ve ken mgemshima ga, gadia sha kwagh ve ayol a ve yô, shi mba kimbir u manden Wan u Aôndo sha terankon, heen Un ken igbar.

⁷Gadia inya i ura u nee sha mi acin imôngo, u nyer shimi dedoo, i menden akaa a a lu mba i lu shiren i sha ci ve la a inja yô, ngi zough a iveren i dedoo i Aôndo.

⁸Kpa aluer ia mende usaa man ishishagh yô, ngi a inja ga, ngi ikua ikua a u wan i ifan. Mkur u ifan la yô, ka u nanden sha usu.

⁹Kpa ne mba doon ishima, sha kwagh wen ne yô, se fa akaa a hemban doon, ka a zan ken myom je, shin er se kaa nahan kpaa.

¹⁰Aôndo ban a perapera ga. Tom wen ua hungul Un ga, shin dooshima u ne tese sha ci u iti Na kpaa ga er ne lu eren uicighanmbaiorov tom shi ne mba eren her kpaa.

¹¹Sar se u hanmô wen nana̱ tese imbashima i veren tsung shon la u zan ken mfe u mimi u ishimaverenkeghen yase zan zan mkur je,

¹²sha u iyol i̱ de kera kpeen ne ga, kpa ne̱ hingir mbakaven mba ve ya dyako u uityendezwa sha jighjigh u nan man sha ishima i wan kpaa.

¹³Gadia zum u Aôndo tôndo zwa a Aberaham la yô, A kera lu a orgen u nan hembe Un u Una bum nan ga, nahan A bum sha iyol Na

¹⁴A kaa er: Mimi je, Me ver u doo doo, Me seer we kpishi je.

¹⁵Er a wa ishima gbang, a maa a ngohol ityendezwa la.

¹⁶Gadia ior ka ve bum sha kwagh u a hembe yô, man ken akpelanakaa a ve cii mbum ka a kure kwagh vough.

¹⁷Ka nahan man Aôndo kpaa er i sar Un pe tesen mbayandyako u ityendezwa la, i̱ hemba wanger er awashima Na a lu kwagh u geman mayange ga yô, A nyôr a mbum sha mi,

¹⁸sha u sha akaa ahar a a lu a geman ga, a Aôndo kpaa Una fatyô u eren aie sha mi ga ne, se mba se yevese ser, sé za war her a Na la, se̱ hemba lun a ishima i taver, sha u kôron ave sha ishimaverenkeghen i i lu se ken hemen la.

¹⁹I yô, se mba a mi er imandetso i uma i dông i i tenger ga, i nyôr ken ijime i ikondo i yisan nahan.

²⁰Ka hen ape Orhemen wase Yesu kpaa A nyôr sha ci wase la, Un u A hingir Zegepristi sha inja i Melkisedeki gbem sha won.