Read tiv Mbaheberu 7 Bible Online

Mbaheberu 7 - tiv bible

Mbaheberu 7

¹Gadia Melkisedeki ne lu tor u Salem, lu pristi u Aôndo Uhembansha. A kohol Aberaham zum u a za hemba utor mbala, a lu hiden la, a ver un doo doo.

²Aberaham kpaa kar kwar a na sha môm-ken-upue ken akaa cii. Aluer a pase inja i iti na yô, hiihii ka Tor u perapera, man shi ka Tor u Salem kpaa, inja na yô, ka Tor u bem.

³Lu a ter ga, lu a ngô kpaa ga, lu a tsombor kpaa ga, lu a mhii u ayange ga shin mkur u uma kpaa ga, kpa a bee a bee Wan u Aôndo, ngu pristi gbem sha won.

⁴Nenge er or ne a lu zegeor yum yô, Aberaham ter u tamen kpaa tsuwa môm-ken-upue ken ishar la na un.

⁵Mba ken ônov mba Levi mba ve zough a tom u pristi la yô, tindi kaa er ve̱ ngohol môm-ken-upue hen nongoior la, ka hen anmgbianev vev je la, shin er ve lu mba ken tsombor u Aberaham nahan kpaa.

⁶Kpa or ne u i ôr un tsombor ken ve ga yô, a ngohol môm-ken-upue hen Aberaham, man a ver un u a lu a uityendezwa la doo doo.

⁷Ka or u nan lu tamen la je ka nan ver u kiriki dedoo ye, anyiman nga sha kwagh ne je ga.

⁸Keen yô, ka ior mba vea va kpe man ve lu ngohol môm-ken-upue ye, kpa heera yô, ka u i er shiada sha a nan er nan ngu uma la.

⁹Jim je yô, á fatyô u kaan er Levi u a ngohol môm-ken-upue la je kpaa a gema a na môm-ken-upue ken Aberaham,

¹⁰gadia lu ken iyol i ter na heregh zum u Melkisedeki va kohol un yô.

¹¹Aluer tom u upristi mba Mbalevi la ua lu a mlu u vough yô,—man ka sha u man nongoior la zua a tindi ye,—ka nyi i gbe u pristi ugen u a lu sha inja i Melkisedeki, una mough u i ter un er ngu sha inja i Aron la ga laa?

¹²Gadia aluer mba geman tom u pristi yô, tindi kpaa una gema keng.

¹³Gadia Un u i lu ôron kwagh Na ne yô, lu ken kwe ugen kposo man ken u yô, or môm ngu a er tom u sha atse a nanden nagh sha mi la ga.

¹⁴Gadia Ter wase due ken Yuda gbar gbar je, man sha kwe ngula yô, mayange Mose ter kwagh u upristi ga.

¹⁵Man kwagh ne hemba wanger cii er Pristi ugen u A bee Melkisedeki A va mough yô,

¹⁶u A hingir pristi, kera lu sha imo i tindi u sha tsombor u ken iyol la ga, kpa lu sha agee a uma u been ga la.

¹⁷Gadia i er shiada sha a Na er: We, U ngu pristi gbem sha won sha inja i Melkisedeki.

¹⁸Gadia vegher ugen yô, i sough tindi u tse la kera sha ci u a lu a agee ga, ngu a inja kpaa ga;

¹⁹tindi sôr ma kwagh hingir vough ga. Vegher ugen yô, i nyôr a ishimaverenkeghen i hemban doon ka sha i se kporom hen Aôndo la.

²⁰Man lu sha mbum ga ze; gadia mbala yô, ve hingir upristi, lu sha mbum ga,

²¹kpa Un yô, lu sha mbum u Wen u A kaa a Na er: Ter bum, man Una kera vaa afanyô ga, We, U ngu pristi gbem sha won.

²²Ka nahan man Yesu A hingir ishuur u ikuryan i hemban doon kpaa ye.

²³Mbala yô, ve hingir upristi ve ngee iyenge, gadia ku yange ve u lun sha tom gbem.

²⁴Kpa Un yô, ngu lun gbem sha won, nahan ngu a tom u pristi la gbem, ua kera hire sha orgen ga.

²⁵Nahan yô, mba ve lu van hen Aôndo ve karen hen Na yô, Un fatyô u yiman ve been cii, gadia ngu lun uma gbem sha u Una er msen sha ci ve yô.

²⁶Gadia ka imbazegepristi ne i kom se ye; ka u wang, u lun a ibo ga, shin acôghol a wan iyol kpaa ga, u a lu paleghaa a mbaasorabo, man u i kende Un sha A kar Usha cii.

²⁷Un yô, kera gba Un u vanden van a nagh sha ci u asorabo a Na iyol Na use use man masen van a mi sha ci u nongoior la er uzegembaupristi mbala nahan ga. Gadia A er nahan kwa môm vough zum u A na nagh sha iyol Na la.

²⁸Gadia tindi yô, ver ior mba ve lu isheer ve̱ lu uzegembaupristi, kpa kwaghôron u sha mbum u a va ken masejime u tindi la yô, a ver Wan u A lu vough gbem sha won.