Read tiv Mbaheberu 9 Bible Online

Mbaheberu 9 - tiv bible

Mbaheberu 9

¹Ikuryan i hiihii la kpaa lu a atindi a sha tom u civir Aôndo la, man shi lu a icighanjiir u shin tar kpaa.

²Gadia i sôr tabernakel u sha hunda hunda la, i yila un er Icighanjiir. Daarimenger lu ker, man shi tebul a ubredi mba sha ishi.

³Ken ijime i ikondo i yisan i sha uhar la yô tabernakel lu; i yilan un er icighankpar u hemban cii,

⁴lu a atse a zenaria a nanden kwaghhumandoon sha mi man shi areki u ikuryan, i cir un zenaria iyol cii. Ityegh ki sha zenaria ki ki lu a mana shimi lu ker, kua gbough ku Aron ku ku kpar la man shi ikpande i awen i ikuryan kpaa.

⁵Kughur na yô ucerubi mba iengem lu sha mi. Ve gba mure sha ijiir i nan iwom la. A fatyô u ôron kwagh sha akaa ne vighe vighe hegen ga.

⁶Er i sôr akaa angan bee yô, upristi mba ve eren tom u civir Aôndo la ve nyôron kpar u sha hunda hunda la gbem.

⁷Kpa u sha uhar la yô, ka zegepristi tseegh a nyer ker ye, ken hanma inyom kwa môm. Kpa a ban a awambe ga a ka a za na nagh a mi sha ci na iyol na man sha ci u asorabo a nongoior la, a ve er abu la.

⁸Sha kwagh ne yô, Icighan Jijingi lu tesen er i lu a bugh gbenda u nyôron ken icighanjiir ga er tabernakel u sha hunda hunda la a hira lu her yô.

⁹Kwagh ne lu tesen ikav sha shighe ne, ve lu van a uiwua man iniav mbi ve fetyô u geman imo i ken ishima i or u civir Aôndo la hingir vough ga yô.

¹⁰Akaa ne yô, lu di sha kwagh u akaayan tsô man akaaman man iyol i ôôn sha igbenda kposo kposo, ka atindi a sha iyol tsô a i we a zan zan shighe u sôron akaa una kar kuman.

¹¹Kpa Kristu yô, va due ken igbar, lu zegepristi sha akaa a dedoo a a vande van la, A nyôr ken tabernakel u hemban vesen man u hemban lun vough u i er sha ave a ior ga, inja na yô, ka kwagh u igbetar ne ga,

¹²lu sha awambe a ivo man anibuav kpaa ga, kpa lu sha awambe Na iyol Na. A nyôr ken icighanjiir kwa môm vough, A zua a mpaa u tsôron.

¹³Gadia aluer awambe a ivo man anomabua man mtwem ma tulebua ma i mishi ma sha mba ve lu wang ga la, tsegha ve sha u ayol a̱ hingir wang yô,

¹⁴man hira awambe a Kristu, Un u A na Aôndo nagh ku lun a ihogholough mape ga, sha iyol Na sha Jijingi u tsôron, aa kera wanger imo i ken asema a en sha aeren a a lu kpenegh la, sha u eren Aôndo u uma tom ga yee?

¹⁵Ka sha kwagh ne A lu Orhimen u ikuryan i he ye, sha er mba i yer ve yô, ma ve zough a dyako u tsôron u i tende zwa la gadia A kpe ku sha u paan atindi a peren a ken ikuryan i tse la.

¹⁶Gadia her ape iceghzwa i sha dyako u karen i lu yô, ka u i̱ vande yôôn ku u or u tseghan zwa la keng.

¹⁷Man iceghzwa i sha dyako u karen yô, ka shighe u ku u gbe la man i lu a inja ye, ngi a inja zum u or u tseghan zwa la nan lu uma her la ga.

¹⁸Ka nahan man i ver ikuryan i hiihii la kpaa, awambe a ban sha mi ga ye.

¹⁹Gadia Mose yee hanma tindi u ken atindiakaa hen nongoior la cii been yô, a tôô awambe a anibuav man ivo kua mngerem man ul u nyian man hisop, a mishi sha ruamabera kua sha nongoior la cii.

²⁰A kaa er: Angan ka awambe a ikuryan i Aôndo A ne ne je ne.

²¹Kape shi a mishi awambe la sha tabernakel kua ikav mbi tomov cii je la.

²²Sha tindi yô, shi kpuaa tsô akaa cii ma i wanger a sha awambe, man aluer á haa awambe ga yô mde u akaabo kpaa una lu ga.

²³Nahan yô lu keng u á wanger ieev mbi akaa a Sha sha iniav mbila kpa akaa a sha jim jim yô, ka sha iniav mbi hemban doon a mbila, man á wanger a ye.

²⁴Gadia Kristu kera nyôr ken icighanjiir u i er sha ave a ior ga, u a lu eev mbu u mimi la kpaa ga, kpa lu Sha jim jim, sha u Una ande sha ishigh ki Aôndo sha ci wase,

²⁵kera lu sha u Una na nagh sha iyol Na acin imôngo er zegepristi ka a nyôron ken icighanjiir hanma inyom a awambe a a lu a na ga la nahan ga.

²⁶Luun nahan yô, ma A ye ican acin imôngo hii sha igbetar je. Kpa hegen yô, A ande kwa môm sha mkur u ashighe sha u Una tôô asorabo kera sha nagh ku sha iyol Na la.

²⁷Er i ver ior u kpen kwa môm man á mase ôron ijir yô,

²⁸kape Kristu kpaa i na nagh sha a Na kwa môm sha u tôôn asorabo a ior kpishi kera, u sha kwa har yô Una ande, á lu sha kwagh u isholibo ga, kpa á lu sha u yiman mba ve lu keghen Un yô.