Read tiv Yakobu 3 Bible Online

Yakobu 3 - tiv bible

Yakobu 3

¹Anmgbianev av, de kera hingir nen mbatesen wuee ga, gadia ne fa er ijir i á ôr se ia hemba taver cii yô.

²Gadia se cii se mba nenge gbev sha akaa kpishi. Aluer or nana nôngo gbev sha kwaghôron ga yô, nan ngu or u vough je, iyol cii kpaa nana fatyô u kôron i tsaha.

³Aluer se wa anyinya ulijam ken ijô sha u a̱ ungwa se yô, se kôôm a iyol cii.

⁴Nenge, utso kpaa shin er ve kehe man ahumbe a vesen ka a mgbeghan ve nahan kpaa ka i kôôm ve sha annaha kpeghee hanpe ornahan la nan soo cii.

⁵Kape nombor kpaa u lu anlyegh u kpeghee kpa u hagher sha uzegembaakaav je la. Nenge anusu kpeghee kpaa ka a nande ingbaikon yô.

⁶Nombor kpaa ka usu je, ka ifer i sha won cii. I ver nombor ken alegh a ase, ngu gem ngu hôngor iyol cii, ka u keer usu sha uma wase jimin cii, man u yô, ka shin gehena i tsar u u ker usu ye.

⁷Gadia hanma inja i inyamtoho man shi inyon man akaa a kpelan iyav inya man akaa a uma a shin zegemnger cii a fatyô u koso a, aa var ken ya, man i vande koson a nahan sha ishima i or kpaa.

⁸Kpa nombor yô, ma or u umace môm nan fatyô u kôôm u ga, ka ifer i memen mayange ga, u iv a megh ku bogh.

⁹Ka sha u je ka se wuese Ter, man Aôndo ye, shi ka sha u kpaa ka se wa ior mba i gbe ve sha mlu u Aôndo la ifan ye.

¹⁰Ka ken zwa shon môm môm man iwuese ka i due kua shi ifan i wan kpaa ye. Anmgbianev av, doo u kwagh ne a̱ lu nahan ga.

¹¹Imbormnger i dugh a mngerem ma dedoo man shi mngerem ma barem shin ihura i môm kpa?

¹²Anmgbianev av, kon u tur ua fatyô u umen atam a olev shinii, itine i wain ia fatyô u umen atam a turu? Kape mngerem ma barem kpaa, maa fatyô u duen mngerem ma dedoo ga.

¹³Ka an ken a ven nan lu or u fan kwagh man or u kaven kwagha? Yô, nana̱ pase ase aeren a nan a sha ishima i legh legh i i lu a kwaghfan la sha zende u nan u dedoo.

¹⁴Kpa aluer nea lu a iwuhe i yuan ken ishima shin u wan kwagh wen ayol a en iko tseegh yô, de te nen ihagh ga, shi de eren nen aie sha kwagh u mimi kpaa ga.

¹⁵Heera yô, ka kwaghfan u a dugh Sha la ga, kpa ka u taregh shi ka u iyolough shi ka u ujijingi mba bov tsô.

¹⁶Gadia her ape iwuhe i lu kua u wan kwagh wou iko tseegh yô, anzughul ban ga, kua shi hanma ieren i dang kpaa.

¹⁷Kpa kwaghfan u a dugh Sha yô, hiihii ka u wang, shi ka u bem kpaa, man u sar sar, man u norom ikaa ga, a iv a mhôônom ma zungwen kua atam a dedoo, ka u sangen sha dooshima ga man shi u imangeregh kpaa ga.

¹⁸Ityamegh ki perapera yô, ka i lôô ki sha bem sha ci u mba ve ker num la.