Read tiv 2 Peteru 2 Bible Online

2 Peteru 2 - tiv bible

2 Peteru 2

¹Kpa mbaprofeti mba aiev iyange ve due hen nongoior la di er ken a ven kpaa mbatesen mba aiev vea va lu nahan. Vea nyôr a ityesen i kahan i dang myer, Ter u A paa ve la je kpaa vea nyiman Un, mba van a mtim sha ayol a ve fefa je.

²Ior kpishi je, vea dondo aeren a ve a sha ijimba la; ka sha ci ve je man á teren gbenda u mimi ne sha dang ye.

³Sha hua ve u eren la, vea zua a mtser sha a ven sha akaaôron a sha atseregh. Ibo i i na ve ngise la, ngi gbilin ga, man mtim ve kpaa ngu mnya ga.

⁴Gadia mbatyomov mba Shaav mba ve er isholibo la kpaa Aôndo tange ve ga, A gbihi ve ken Tartaru ken ahungwa a imegh sha u kuran ve zan zan shighe u ijir ia kuma yô.

⁵Man tar u tsuaa la kpaa A tange u ga, kpa A yima Noa u a lu yôôn kwagh u perapera la, kua ior mbagenev utaankaruhar zum u A va a mngerem deemee sha tar u mba ve vende Aôndo la.

⁶Man A nande agar a Sodom man Gomora a hingir mtwem, A na ve ibo, i tim ve kera, A gema ve ve hingir ikav hen mba vea va venda Aôndo la cii.

⁷Man A yima Loti or u perapera u a ya ican ken ishima tsung sha ci u ijimba i eren i mbaaferev mbala.

⁸Gadia or u perapera la tema ker atô ve, a nenge shi a ungwa akaa la, ishima na i perapera la lu vihin un use use sha aeren a ve a ifer la.

⁹Nahan mba ve civir Aôndo la Ter fa u yiman ve ken imeen, shi A fa u kuran mbaaferev zan zan á ar sha iyange i ijirigh la, sha u tsahan ve.

¹⁰Man jim je yô, ka mba ve zenden sha inja i iyolough sha isharen i hôngorough, ve lahan mba i ver ve ve lu a tahav la cii. Ve cihi kwagh, ve wa apera, u tuhwan mba ve engem mbala kpaa ka cier ve iyol ga.

¹¹Mbatyomov mba Shaav yô, shin er ve hembe ve iyoltaver man agee nahan kpaa, mba za senden ve ityough a Ter sha ilyahan ga.

¹²Kpa mban yô, er ve toho kwagh u ve fe un ga yô, vea tim sha mvihi ve er inyamtoho i kaven kwagh ga nahan, i mar i sha inja i iyolough sha u á gba kôron, wuan tsô yô.

¹³Vea zua a injar i ifer sha ifer i ve er la. Ishar i haan iyol atetan doo ve; ve yô, mba kwagh u côv côv man kwagh u lun afesan afesan; maa ve iyol a atseregh a ve zum u ka vea yan iniongo a ven imôngo la.

¹⁴Ashe a ve iv a idya, nga memen u eren isholibo ga; mba meen ior mba ve lu a ishima i pee pee la. Ve via ishima sha hua u eren, ka ônov mba ifanev je.

¹⁵Ve undu gbenda u mimi ve tsume, ve za sha gbenda u Balaam wan u Beor u injar i ifer i eren i doo un ishima yum la.

¹⁶Kpa i yange un tindi u peren la, zendenya u lamen ga gema ôr kwagh sha imo i or, yange ihundugh ki profeti la.

¹⁷Mban yô, ka ihwembe i lun a mngerem ga, ka irkpiigh i ijeverahumbe a purugh a mi kera. I ver ve angôghime.

¹⁸Gadia ka sha u ôron ugbilinmbaakaav sha iyolgengese man sha asaren a iyolough man ijimba i eren ve meen ior mba ve sember duen ken mba ve lu ken mtsum la, ye.

¹⁹Ka ve tôndo zwa a mbala er vea kera lu ken uikangen ga, kpa ve ayol a ve gema ka ikpan i hôngorough; gadia kwagh u a hembe or yô, ka un je ka a gbihi nan ken kpan ye.

²⁰Gadia aluer vea osough vea war ihôngor i tar kera sha mfe u ve fe Yesu Kristu, Ter wase man Oryiman wase la, kpa akaa ne á shi á kôr ve á hemba ve yô, mkur ve u masejime la hemba vihin a mlu ve u hiihii la.

²¹Gadia guda her a ve u ma ve fe gbenda u perapera ga a u ve vande fan u kera man ve gem ve undu icighantindi u i na ve la.

²²Injakwaghôron i mimi ne kuma sha a ve vough er: Iwa suwa, shi hide ya, man shi: Ngôigo ôô iyol kpa shi hide vingir shin angbiôr.