Read tiv 1 Yohane 3 Bible Online

1 Yohane 3 - tiv bible

1 Yohane 3

¹Nenge imba dooshima u se doo Ter ishima ne; mba yilan se je er ônov mba Aôndo, man kape se lu je la. Ka nahan man tar u fe se ga ye, sha ci u u fe Un ga yô.

²Ne mbadoon mo ishima, hegen yô, se mba ônov mba Aôndo, kpa mba a pase er sé va lu ga. Se fa zum u á va pase Un yô, sé lu er Un nahan, gadia sé nenge a Na er A lu yô.

³Hanma or u nan lu a ishimaverenkeghen ne sha a Na yô, ka nan wanger iyol i nan er Un kpaa A lu wang nahan.

⁴Hanma or u nan eren isholibo yô, nan ngu vendan tindi kpaa, gadia isholibo ka atindi a vendan.

⁵Ne fa, i pase Un sha u A̱ tôô asorabo kera; ken a Na yô, isholibo ngi ga.

⁶Hanma or u nan luun ker a Na yô, nan eren isholibo ga; hanma or u nan eren isholibo yô, nan ngu a nenge a Na ga, mfe kpaa nan fa Un ga.

⁷Mbayev av, ma or nana̱ de tsumen a ven ga. Or u nan eren perapera yô, nan ngu u perapera je er Un A lu u perapera nahan.

⁸Or u nan eren isholibo yô, ka ken diabolo nan dugh ye, gadia diabolo lu eren isholibo sha hiihii je. Ka nahan man i pase Wan u Aôndo ye, sha u vihin aeren a diabolo kera.

⁹Hanma or u Aôndo A mar nan yô, nan eren isholibo ga, gadia vor Na ngu ker a nan; man nana fatyô u eren isholibo ga, gadia ka Aôndo A mar nan ye.

¹⁰Ka sha kwagh ne man i pase ônov mba Aôndo a ônov mba diabolo ye; hanma or u nan eren perapera ga yô, nan due hen Aôndo ga, man shi u anmgbian u nan a doo nan ishima ga la kpaa.

¹¹Gadia ngun ka loho u ne ungwa sha hiihii ne: ka u ma se doo ayol a ase,

¹²i̱ de luun er Kain u a due ken Orbo man a wua anngô na la nahan ga; man i lu sha ci u nyi man a wua unu? Ka sha ci u aeren a na lu a bo, kpa a anngô na gema lu a perapera yô.

¹³Anmgbianev av, aluer tar ua kôr ne ihom yô, i̱ de kpiligh ne iyol ga.

¹⁴Se yô, se fa, se due ken ku kera se nyôr ken uma sha ci u anmgbianev ve doo se ishima yô. Or u nan lu a dooshima ga yô, ka ken ku nan tem ye.

¹⁵Hanma or u nan ker anmgbian u nan ihom yô, ka orwuanor je; ne fa ma orwuanor nan ngu a uma u tsôron ken a nan ga.

¹⁶Kwagh u se fe dooshima sha mi yô, ka un ne: A na uma Na sha ci wase, nahan se kpaa, ka u sé na uma wase sha ci u anmgbianev.

¹⁷Kpa or u nan lu a akaa a taregh man nan gem nan nenge anmgbian u nan ken ibanave man nan zungu nan mhôônom ga yô, dooshima u Aôndo ngu lun ken a nan nana?

¹⁸Mbayev av, dooshima wase a̱ de kera luun sha mkaan shin sha nombor tsô ga, kpa i̱ lu sha ieren man sha mimi kpaa.

¹⁹Sha kwagh ne yô, sé fa er se lu ken mimi man sea pever asema ase sha ishigh Nagh,

²⁰gadia aluer ishima ia na se ibo yô, Aôndo hemba ishima yase man A fa akaa cii kpaa.

²¹Ne mbadoon mo ishima, aluer ishima ia na se ibo ga yô, se mba vangertiôr sha ishigh ki Aôndo je.

²²Man nyityôkwagh i se sen kpaa se mba ngohol i her a Na, gadia se mba kor atindi a Na, shi se mba eren akaa a doon Un kpaa.

²³Tindi Na yô, ka un ne: ka u sé na iti i Wan Na Yesu Kristu jighjigh man shi ka u se̱ doo ayol a ase er A na se tindi nahan.

²⁴Or u nan we atindi a Na iko yô, nan lu ken a Na, Un kpaa luun ken a nan. Ka sha kwagh ne man se fe er Un A lu ken a vese ye: ka Jijingi u A ne se la.