Read tiv Mbaajiriv 1 Bible Online

Mbaajiriv 1 - tiv bible

Mbaajiriv 1

¹Tsô Yosua kpe kera yô, Mbaiserael pine TER, ve kaa er: Ka an wase nana̱ vande za nôngon ityav a Mbakanaana?

²TER kaa er: Ka Yuda una za ye; nenge, M na tar ne sha ikev na.

³Tsô Yuda kaa a Shimeon anngô na er: Va, sé za imôngo ken tar u i nem la, sé za nôngo ityav a Mbakanaan; yô, mo kpaa me za a we imôngo ken tar u i ne u la. Nahan Shimeon za a na imôngo.

⁴Tsô Yuda kôndo; TER na Mbakanaan kua Mbaperishi sha ikev ve; ve wua ve hen Beseki kuma ior dubu pue.

⁵Ve kohol Adoni-beseki ken Beseki, ve nôngo ityav a na, ve hemba Mbakanaan kua Mbaperishi kpaa.

⁶Kpa Adoni-beseki yevese, nahan ve zenda un ijime ve za kôr, ve tôndo un ahôaveegh a tamen kua ahôangahar a tamen.

⁷Tsô Adoni-beseki kaa er: Utor mba akunduatargber, mba i tôndo ve ahôaveegh a tamen man ahôangahar a tamen la, lu sangen kwaghyan ve shin atô a tebul wam je; er mo iyange m er nahan, kape Aôndo kpaa A orom iyev ne. Tsô ve va a na hen Yerusalem, a va kpe her.

⁸Ônov mba Yuda nôngo ityav a Yerusalem, ve ngohol un, ve hemba un sha zwa u sanker, ve nande gar sha usu.

⁹Ken masetyô la, ônov mba Yuda sen za nôngo ityav a Mbakanaan mba ve tema ken tar u iwoogh, man tar u Imbusutariyan man tar u delaa la.

¹⁰Yuda za nôngo ityav a Mbakanaan mba ve tema ken Heberon la (ngise la i yilan Heberon er Kiriati-arba); ve hemba Sheshai man Ahiman kua Talmai.

¹¹Shi a mough a za nôngo ityav a mba ve tema ken Debir la (ngise la, i yilan Debir er Kiriati-sefer).

¹²Tsô Kalebu kaa er: Or u nana hemba Kiriati-sefer, nana ngohol un yô, me na nan Akesa wan wam u kwase, nana̱ er.

¹³Tsô Oteniel wan u Kenashi anngô u Kalebu u kiriki la, za za hemba un; nahan a na un Akesa wan na u kwase la, hingir kwase na.

¹⁴Tsô zum u kwase la, lu van her a na yô, a za un iyol er a̱ sôn ter na tiôntar ugen; tsô kwase la hungwa sha jaki na, nahan Kalebu pine un er: Ka nyi i sar uwe?

¹⁵A kaa a na er: Nam iwua, u nam tar u tseghe tseghe ken tar u Imbusutariyan la, yô, shi nam amboramnger kpaa. Nahan Kalebu na un ambor a sha kua a shin kpaa.

¹⁶Ônov mba Orkeni won u Mose la, mough ken gar u avilegh la, a ônov mba Yuda imôngo, ve nyôr ken ikôngough ki Yuda ki ki lu hen Aradi tar u ken Imbusutariyan la, ve za tema a ior mba hen tar la imôngo.

¹⁷Yuda kpaa za a anngô na Shimeon imôngo, ve za hemba Mbakanaan mba ve tema ken Sefati la, ve tim ve ci ca cii. I maa i yila gar la iti er Horma.

¹⁸Yuda ngohol Gasa a tar na, man Asekelon a tar na, kua Ekeron a tar na kpaa.

¹⁹TER lu a Yuda, nahan a zenda mba ve tema sha tar u iwoogh la kera; kpa a fatyô u zendan mba ve tema shin pev la ga, sha ci u ve lu a akeke a iyôô.

²⁰Ve gema Heberon, ve na Kalebu er Mose lu kaa yô; a zenda ônov mba Anaki keregh ior itiar.

²¹Ônov mba Benyamin yô, ve zenda Mbayebushi mba ve tema ken Yerusalem la ga; nahan Mbayebushi lu a ônov mba Benyamin imôngo ken Yerusalem zan zan nyian.

²²Ya u Yosev kpaa kôndo za nôngo ityav a Betel; TER lu a ve.

²³Ya u Yosev tindi er i̱ za nenge mker ken Betel (ngise i yilan gar shon iti er Lushi).

²⁴Mbanengenmker mbala ve nenge orgen nan lu duen ken gar, ve kaa a nan er: Shi tese se hunda u nyôron ken gar, yô, sé er a we dedoo.

²⁵Nahan nan tese ve hunda u nyôron ken gar; ve hemba gar la sha zwa u sanker; kpa or la yô, ve de nan, nan yem a ior mba nan cii.

²⁶Nahan or la yem ken tar u Mbahiti za maa gar ker, a ii un iti er Lushi ka iti na je la zan zan nyian.

²⁷Manase zenda mba ve tema ken Bete-shean man agar a na la kera ga, kua shi Taanaki kpaa man agar a na la, kua shi mba ken Dor kpaa man agar a na la, kua shi mba ken Ibeleam kpaa man agar a na la, kua shi mba ken Megido kpaa man agar a na la; kpa Mbakanaan gba teman ken tar la tsô.

²⁸Tsô zum u Iserael taver yô, ve gba kighir Mbakanaan a tom, ve zenda ve kera ca ca ga.

²⁹Eferaim zenda Mbakanaan mba ve tema ken Geser la kera ga, kpa Mbakanaan tema her atô ve ken Geser.

³⁰Sebulon zenda mba ve tema ken Kireton kera ga, man shi mba ken Nahalol la kpaa ga; kpa Mbakanaan tema her atô ve, gema hingir mba eren ve tom.

³¹Asher zenda mba ve tema ken Ako la kera ga, man shi mba ken Shidon la kpaa ga, kua mba ken Alabi, kua shi mba ken Akeshibi, kua shi mba ken Heleba, kua shi mba ken Afiki kua shi mba ken Rehobi la kpaa ga;

³²kpa Mbaasher tema hen atô u Mbakanaan, mba ve lu ken tar la la; gadia ve zenda ve ga.

³³Nafetali zenda mba ve tema ken Bete-shemeshi la kera ga, man shi mba ve tema ken Bete-anati la kpaa ga; kpa a tema hen atô u Mbakanaan, mba ve lu ken tar la la; nahan mba ve tema ken Bete-shemeshi kua mba ken Bete-anati kpaa gema hingir mba eren ve tom.

³⁴Mbaamor mgbegha ônov mba Dan hide sha tar u iwoogh, ve rumun u ve̱ sen shin pev ga;

³⁵kpa Mbaamor tema sha Har-hereshi la heregh, man ken Aiyalon kua ken Sha-alebim; kpa uwegh ku ya u Yosev hemba, nahan ve gema ve hingir mba eren ve tom.

³⁶Ikighirtar i Mbaamor hii hen igungu u Akrabim, hen vande la zan zan kôndo sha.