Read tiv Mbaajiriv 10 Bible Online

Mbaajiriv 10 - tiv bible

Mbaajiriv 10

¹Ken jime i Abimeleki yô, Tola wan u Pua, wan u Dodo, Orisakar, mough sha u yiman Iserael; ya na lu ken Shamir ken tar u iwoogh u Eferaim.

²A lu orjir sha Iserael anyom ikundu kar atar; a kpe, i ii un ken Shamir.

³Ken ijime na yô, Yair Orgileadi mough; a tema orjir sha Iserael anyom ikundu kar ahar.

⁴A lu a ônov mba nomso ikundugber mba ve hendan agumajaki ikundugber yô, ve lu a agar ikundugber, i yilan a er, Agar a Yair zan zan nyian, nga ken tar u Gileadi.

⁵Yair kpe, i ii un ken Kamon.

⁶Mbaiserael shi er kwaghbo sha ishigh ki TER, ve civir Ubaal man Mbaashetaroti man mbaaôndo mba Shiria man mbaaôndo mba Shidon man mbaaôndo mba Moabi man mbaaôndo mba Mbaamon kua mbaaôndo mba Mbafiliti; ve undu TER, ve de u civir Un.

⁷Nahan ishima vihi TER a Iserael, A tee ve, ve hingir sha ikev i Mbafiliti, kua sha ikev i Mbaamon kpaa.

⁸Inyom la je, ve er Mbaiserael ican, ve kighir ve; anyom pue kar anigheni cii ve lu kighir Mbaiserael cii, mba ve lu yande Yordan ken tar u Mbaamor u u lu ken Gileadi la.

⁹Mbaamon per Yordan sha u va nôngon ityav a Yuda man Benyamin kua ya u Eferaim kpaa, nahan Iserael cia tsung.

¹⁰Mbaiserael vaa a TER, ve kaa er: Se er U isholibo, sha er se undu Aôndo wase se gem se civir Ubaal yô.

¹¹Tsô TER kaa a Mbaiserael er: Ka Mo lu M yima ne sha ikev i Mbaigipiti man i Mbaamor man i Mbaamon kua i Mbafiliti ye gaa?

¹²Man zum u Mbashidon man Mbaamaleki kua Mbamaon, ve kighir ne, ne vaa a Mo la, Mo kpaa M yima ne sha ikev ve gaa?

¹³Nahan kpaa ne undum, ne civir mbaaôndo mbagenev; nahan Me kera yima ne ga.

¹⁴Yô, yem za vaa nen a mbaaôndo mba ne tsough yô, ve̱ yima ne hen shighe u ican i tser ne ne.

¹⁵Nahan Mbaiserael kaa a TER er: Se er isholibo; yô, gba eren se kwagh u a doo U cii tsô; kpa ma U shi yem se nyian ne tsô.

¹⁶Tsô ve dugh mbaaôndo mbagenev ken a ve kera, ve gema ve civir TER; nahan ishima vihi Un sha ci u ican i Iserael.

¹⁷Tsô Mbaamon zua va haa afo ken Gileadi. Mbaiserael kpaa zua haa afo ken Misepa.

¹⁸Nahan ior mba ve lu atiator a Gileadi la, ve kaa ayol a ve er: Ka anti nana hii ityav a Mbaamonou? Ka nan je nana hingir orhemenegh u mba ve lu ken Gileadi cii ye.