Read tiv Mbaajiriv 15 Bible Online

Mbaajiriv 15 - tiv bible

Mbaajiriv 15

¹Ka tse dôghôô yô, sha shighe u sundan alakema nahan, Semson va sôr kwase na a anivo; a kaa er: Ma m nyer hen iyou i kwase wam. Kpa ter u kwase na la rumun u a̱ nyôr ga.

²Ter na gema kaa er: Mimi je m fa mer, u venda un dedoo, ka nahan man m gem un m ne ikaru ye; anngô na u kiriki hemba doon ashe a na gaa? Yô, er un sha ityough ki ngula tsô.

³Nahan Semson kaa a ve er: Hen shighe ne yô, aluer me er Mbafiliti kwagh u bo kpaa, me lu a ibo ga.

⁴Tsô Semson za, za kôr ugbaseela deri utar; a tôô akagh, a zua ve ica, man hanma ica ihiar yô, a shindi ikagh hen atô.

⁵Tsar usu sha akagh la yô, a maa a pase ve a tuhwa, ve nyôr ken ishule i alakema u shisha u Mbafiliti, nahan atihi a alakema man iyiagh ki shishagh, kua ishule i olev cii hia.

⁶Tsô Mbafiliti gba pinen er: Ka an nan er kwagh ne nahana? Ve kaa er: Ka Semson wankem u Ortimna, ka sha ci u a tee un kwase, a gem a ne ikar na yô. Tsô Mbafiliti va, va nande kwase la kua ter na sha usu.

⁷Nahan Semson kaa a ve er: Aluer kape ne er la yô, mimi je, mo kpaa me de ga, saa me or iyev sha a ven keng.

⁸A ta num sha a ve, a hemba ve, a paa ve avur avur, a wua ve je falegh gba, tsô a yem a za tema ken bar u Etam.

⁹Tsô Mbafiliti kôndo za haa afoautya sha Yuda; ve samber ken Lehi.

¹⁰Nahan ior mba Yuda pine er: Ka nyi ne ve ityav hen vese? Ve kaa er: Se va ser, sé kange Semson sé er a na er a er a vese nahan.

¹¹Tsô ior mba Yuda dubu utar sen za shin bar u Etam, ve za kaa a Semson er: U fa er Mbafiliti ve tem tor sha a vese gaa? Man ka nyi u er a vese nahana? Tsô a kaa a ve er: Er ve er a mo nahan, kape mo kpaa m er a ve je la.

¹²Nahan ve kaa a na er: Yô, se va ser sé va kange u, sé za na u sha ikev i Mbafiliti. Semson gema kaa a ve er: Yô, bum nen ase a mo, ner, ne ayol a en né wuam ga.

¹³Ve ôr a na, ve kaa er: Ei. Kpa sé kange u dedoo sé za na u sha ikev ve; mimi je, sé wua u ga. Tsô ve kange un sha ikor i he ihiar, maa ve due a na ken bar la kera.

¹⁴Zum u a va hen Lehi yô, Mbafiliti va kohol un, ve gba geren; tsô Jijingi u TER kende un sha agee, ikor i sha ave na la hingir er ikar i adaagh i i ker usu yô, ikangenev nav sough sha ave na kera.

¹⁵Tsô a zua a zeeregh ku jaki ku hegh, a za uwegh a tôô, a wua ior a mi dubu.

¹⁶Nahan Semson kaa er: Sha zeeregh ku jaki, atihi atihi. Sha zeeregh ku jaki, m wua ior dubu.

¹⁷Tsô zum u a kure kwaghôron ne yô, a gema zeeregh ku sha uwegh nagh kula a ta kera; i maa i ii ijiir la iti er, Ramatilehi (igungu u zeeregh).

¹⁸Tsô imura kôr un tsung, nahan a sôn TER, a kaa er: Ka We U ne myom u vesen ne sha ikev i wanakiriki Wou ne ye; nahan yô, m̱ gema m̱ kpe imura, m̱ hingir sha ikev i mbaipusuv mbana?

¹⁹Tsô TER pav pev u ken Lehi, mngerem due; me yô, jijingi na hide her, a hingir gbang gbang; nahan i maa i ii ijiir la iti er: En-hakore (ijôr i un u a yila la); ngi hen Lehi zan zan nyian.

²⁰A lu orjir hen Iserael sha ayange a Mbafiliti la, anyom ikundu.