Read tiv Mbaajiriv 2 Bible Online

Mbaajiriv 2 - tiv bible

Mbaajiriv 2

¹Tsô Ortyom u TER mough hen Gilgal, kôndo za hen Bokim. A kaa er: Ka Mo M er, ne dugh ken tar u Igipiti, M ve a ven ken tar u M bum a uter enev ne ye, man M kaa Mer: Me bunde ikuryan Yam a ven mayange ga;

²ne kpaa de ye nen ikur a mba ve tem ken tar ne ga, hembe nen atse a ve a nanden nagh sha mi kera; kpa ne ver ato sha imo Yam ga; ka nyi ne er nahana?

³Ka nahan man M kaa Mer: Me kera zenda ve sha ishigh yenegh kera ga ye, kpa vea hingir mbahendan kwagh a ven; mbaaôndo vev kpaa vea hingir kwagh u hônon ne a min.

⁴Tsô zum u Ortyom u TER ôr kwagh ne a Mbaiserael cii nahan yô, ior gba vaan genger genger.

⁵Nahan ve ii ijiir la iti er Bokim (Mbahaan mliam); ve na TER nagh heregh.

⁶Tsô zum u Yosua na ior gbenda yô, Mbaiserael yem, hanma or yem hen dyako u nan, sha u za ngohol tar la.

⁷Nahan ior civir TER sha ayange a Yosua lu uma la cii, kua sha ayange a mbatamen mba ve lu ken ijime i Yosua la cii, mba ve nenge aeren a TER a vesen cii, a A er sha ci u Iserael yô.

⁸Yosua wan u Nun, wanakiriki u TER kpe; anyom a na kuma deri man pue.

⁹Ve ii un ken tar u dyako na sha Timnati-hereshi, sha tar u iwoogh u Eferaim, uwo u Gaashi vegher u ken imbusutarimese la.

¹⁰I magh kov la cii a uter vev; tsô kov ugen mough ken ijime ve, u u fe TER kua tom u A er sha ci u Iserael ga yô.

¹¹Mbaiserael er kwaghbo sha ishigh ki TER, ve civir Ubaal;

¹²ve undu TER, Aôndo u uter vev, u A due a ve ken tar u Igipiti la, ve gema ve dondo mbaaôndo mbagenev, mbaaôndo mba akuraior a a kase ve la, ve gure, ve civir ve; nahan ve bam TER.

¹³Er ve undu TER, ve civir Baal man Ashetaroti la yô,

¹⁴ishima vihi TER a Iserael, A gema ve A na sha ikev i mbayanshar, mbala va kuran ve akaa; shi A tee ve, ve hingir sha ikev i mbaihomov vev mba ve kase ve la, nahan ve kera fatyô u shi tilen sha ishigh ki mbaihomov vev je ga.

¹⁵Hanma ijiir i ve lu zan cii, uwegh ku TER lu ihom a ve sha u eren ve kwagh u bo, er TER kaa yô, man er TER bum a ve kpaa; nahan ican er ve tsung.

¹⁶Tsô TER ver ve mbaajiriv, ve yiman ve sha ikev i mba nzughul a ve la.

¹⁷Nahan kpaa ve ver ato sha mbaajiriv vev ga, kpa ve er idya sha u dondon mbaaôndo mbagenev, ve gure ve civir ve; ve kaha fese, ve undu gbenda u uter vev lu zan sha mi waan atindi a TER iko la; ve yô, ve kera er nahan ga.

¹⁸Zum u TER ver ve mbaajiriv yô, TER A lu a orjir la imôngo, A yima ve sha ikev i mbaihomov vev, sha ayange a orjir la cii; gadia mhôônom kôr TER a mtoghor ve u ve toghol sha ikev i mba zan ve iyol kua mba eren ve ican la.

¹⁹Kpa zum u orjir una kpe yô, ve gema ve hide ve gba eren akaa a hôngorough, a hemba a uter vev je, sha u dondon mbaaôndo mbagenev civir ve, guren ve inya; ve de aeren a ve ga, kua inja ve i taver ityough la kpaa ga.

²⁰Nahan ishima vihi TER a Iserael; A kaa er: Er ikurior ne i vende ikuryan Yam i M ya a uter vev la, shi ve we imo Yam iko kpaa ga yô,

²¹Mo kpaa hii hegen je, Me kera zenda ma ikurior i môm sha ishigh vegh kera ga, i Yosua lu undu man kpe la;

²²ka sha a je, Me kar Iserael ye, shin vea ver ishima sha gbenda u TER, vea zaan sha miou er uter vev lu ver ishima sha u nahan shin ve vea er nahan gaou?

²³Nahan TER de akuraior la, A zenda a fefa ga; shi A na a sha ikev i Yosua kpaa ga.