Read tiv Mbaajiriv 5 Bible Online

Mbaajiriv 5 - tiv bible

Mbaajiriv 5

¹Tsô Debora kua Baraki wan u Abinoam ve wa icam sha iyange la, er:

²Er mbahemenev ve hemen ken Iserael, er ior kpaa ve ne ayol a ve sha asema a ve gbar gbar je yô, wuese nen TER.

³Ungwa nen, ne utor; ver nen ato, ne atiator; mo me wa icam me ter TER, me wa icam i wuese TER, Aôndo u Iserael.

⁴TERE, zum u U due ken Seir, zum u U zende ken tiôntar u Edom yô, inya tenger, Usha haa, abeen kpaa haa ura.

⁵Iwo tenger sha ishigh ki TER, Senai kpaa, sha ishigh ki TER, Aôndo u Iserael.

⁶Sha ayange a Samgar u Anati, sha ayange a Yael kpaa akômaigbinda lu gbilin, mbazendev kar sha anigbendav.

⁷Mbahemenev hena ken Iserael, ve hena, zan zan mo Debora m mough, m mough er ngô nahan ken Iserael.

⁸Ve tsuwa mbaaôndo mba hev, sha shighe la ityav lu ken ihinda. Perutya shin iwange, i nenge a mi, ken udubu akunduahar ken Iserael je kpa?

⁹Ishima yam ngi sha mbahemenev mba Iserael, mba ve dugh ken ior ve ne ayol a ve sha asema a ve gbar gbar yô. Wuese nen TER.

¹⁰Ne mba ne hende anmgbianajaki a pupuu, ne mba ne tem sha ubutu mba mimi, man ne mba ne kar sha gbenda, yôô nen kwagh ne.

¹¹Ca a ayôôso a mbakerenavaan, hen ajiir a kesen mngerem la; keela je, vea kimbir u ôron aeren a perapera a TER, ka aeren a Na a perapera a sha tom Na u tor ken Iserael la; zum la ior i TER sen hen ihinda.

¹²Nder, nder, Debora! Nder, nder, wa icam! Mough sha Baraki! Yem a mbakwarev ou, we wan u Abinoam.

¹³Tsô mbavesen mba ve shi her la ve sen; ior i TER sen sha u wasen mo er anomaior nahan.

¹⁴Ken Eferaim yô, mba mise ve u lu ken Amaleki la, ve sen; mba ve dondo yô, lu Benyamin, her atô u ior ou; ken Makir mbahemenev sen, ken Sebulon kpaa mba ve lu a tôgh ku tor.

¹⁵Atiator a Isakar kpaa lu a Debora imôngo; er Isakar a lu nahan, kape Baraki kpaa a lu la; shin pev, ve cir un ijime ayem. Hen uipaven mba Ruben ve wa akaa ishima a vesen a vesen.

¹⁶Ka nyi u gbe teman hen atô u atôrauile nahana? Ka sha u ungwan imar i i tenge hen ikumuile laa? Hen uipaven mba Ruben, ve wa akaa ishima a vesen a vesen.

¹⁷Gileadi gba teman yande Yordan tsô, man Dan yô, ka nyi a tem hen utso nahana? Asher gba teman hen kpezegemnger ving tsô, a var hen ahongo a na.

¹⁸Sebulon ka ior mba cihin kwagh je, yan ku ishe ga; Nafetali kpaa kape a lu je la, sha agungu a kpuun kpuun.

¹⁹Utor va, va nôngo ityav; tsô utor mba Kanaan nôngo ityav, ken Taanaki hen mngerem ma Megido; ve ya ishar sha azurfa ga.

²⁰Sha je kpaa, asan nôngo ityav, sha zende u a la, a nôngo ityav a Shisera.

²¹Ifi u Kushon kuwa ve kera, tsewagh la, uwagh u Kishon. Uma wam, za hemen sha agee je.

²²Zum la acin a apande a nyinya kaa, sha iyar, iyar eren i mbaageev.

²³Wa Meroshi ifan, kape Ortyom u TER A kaa la, wa mba ve tem ken a na ifan i bo je, gadia ve va, ve va wase TER ga, ve va wase TER er anomaior nahan ga.

²⁴Iveren i Yael i hemba i ukase cii, kwase u Heber, Orkeni; iveren na i hemba i kasev mba ve tem ken utenti cii.

²⁵A sôn mngerem, a gema a na un atumba; a va na un atumba a korough shin tasa u tor.

²⁶A za uwegh nagh sha imande i tenti, man uwegh nagh ku yanegh sha msabe u mbatomov; ka sha msabe a mande Shisera ye, a mande un, a pev un ityough, a pev un a-ase.

²⁷A shirigh a gba, a yav inya ving hen angahar a na; hen angahar a na je, a shirigh a gba; hen ape a shirigh la, a gba her kpenegh.

²⁸Ngô u Shisera gbir ashe hen windou, a genger imo hen kper u windou, er: Er nan man ikyekyeutya na i ngôôr van nahana? Er nan ihuran i akeke na i ngôôr van nahana?

²⁹Kasev nav mbafankwagh gema kaa un; een, un iyol na je gema kaa er:

³⁰Ve ya ishar, mba karen i gaa? Kpan u kwase môm, ikpan i ukase ihiar kpaa, sha ci u hanma or; ishar i akondo a ngeren swamen swamen sha ci u Shisera, ishar i akondo a ngeren swamen swamen, a i kor a sha hwe; akondo ahar a ngeren swamen swamen, a i kor a sha hwe, a i ye ishar sha mi la, sha ci u mon wam.

³¹Mbaihomov Ou cii, ve̱ saa ishe nahan TERE! Kpa mba A doo ve ishima la yô, ve mba er iyange, zum u ka ia due sha agee a i nahan. Tsô tar la zua a mmem anyom akunduahar.