Read tiv Mbaajiriv 9 Bible Online

Mbaajiriv 9 - tiv bible

Mbaajiriv 9

¹Tsô Abimeleki wan u Yerubaal za hen Shekem ken igba na hen anmgbianev mba ngô na, za ôr kwagh a ve, kua ior mba hen ya u ter u ngô na cii, a kaa er:

²Shi ôr nen kwagh a ior mba Shekem cii, kaa nen ner: Ka nyi i hembe doon ne: Ônov mba Yerubaal cii, mba akunduatargber je ve̱ tema tor sha a ven, shin ka or môm nana̱ tema tor sha a vene? Man shi umbur nen er mo m lu kuhe wen man inyam yen je yô.

³Nahan anngôôv mba ngô na za ôr ior mba Shekem cii akaaôron ne cii, sha ci na; nahan asema a ve cii ver sha u rumun Abimeleki; gadia ve kaa er: Ka anngô wase je.

⁴Tsô ve na un agbenger a azurfa akunduatargber a ken ya u Baal-bereti; Abimeleki gema a, na agbilinaior a toron asema sha u ve̱ rumun un yô.

⁵A za hen ya u ter na hen Ofera, a za wua anngôôv nav, ônov mba Yerubaal, ior akunduatargber, hen iwen; kpa Yotam wan u Yerubaal, u masetyô war, gadia a yer.

⁶Tsô ior mba Shekem cii kohol kua ya u Milo cii kpaa, ve za, ve za kôr Abimeleki tor hen kon u terebin u hen ikav i umbur kwagh a mi la, u u lu hen Shekem la.

⁷Er i va ôr Yotam nahan yô, a za a za unde sha ityough ki uwo u Gerishim, a genger imo a kaa a ve er: Ver nen ato her a mo, ne ior mba Shekem, sha er Aôndo kpaa Una ver ato her a ven yô.

⁸Iyange igen ikon za sha u ia za kôr kon ugenegh tor; tsô i kaa a kon u olev er: Tema tor wase.

⁹Kpa kon u olev kaa a i er: M̱ undu mkurem am ma Aôndo kua ior ve wuese mo ne, m̱ za m̱ za tenger daase de daase sha ikonoo?

¹⁰Tsô ikon gema kaa a tur er: Yô, we va, tema tor wase.

¹¹Kpa tur kaa a i er: M̱ undu mnyohom am man atam a am a dedoo, m̱ za m̱ za tenger daase de daase sha ikonoo?

¹²Tsô ikon gema kaa a kon u wain er: Yô, we va, tema tor wase.

¹³Kpa kon u wain kaa a i er: M̱ undu zar wam u u ne Aôndo kua ior msaanyol, m̱ za m̱ za tenger daase de daase sha ikonoo?

¹⁴Tsô ikon cii kaa a saa er: Yô, we va, tema tor wase.

¹⁵Tsô saa kaa a ikon er: Á lu mimi je, ne verem ner, m̱ lu tor wen yô, va kohol nen ase shin mure wam; á lu nahan ga yô, usu u̱ due ken saa, u̱ hia usedar mba Lebanon.

¹⁶Nahan yô, aluer ne er kwagh u mimi man u perapera er ne ne Abimeleki tor yô; man aluer ne er a Yerubaal kua ior nav dedoo, ne er un kwagh u a lu vough sha tom u ave na yô—

¹⁷gadia terem nôngo ityav sha ci wen, a ta uma na kera, a yima ne sha ikev i Mbamidian;

¹⁸man nyian yô, ne mough num a ya u terem, ne wua ônov nav, ior akunduatargber, hen iwen, ne ver Abimeleki, wan u kpankwase na la, tor sha ior mba Shekem, sha ci u a lu anngô wen yô—

¹⁹aluer á lu kwagh u mimi man u perapera ne er a Yerubaal kua ior nav nyian ne yô, ember nen Abimeleki, un kpaa á ember ne;

²⁰kpa á lu nahan ga yô, usu u̱ due ken Abimeleki, u̱ hia ior mba Shekem kua ya u Milo; usu shi u̱ due di ken ior mba Shekem kua ken ya u Milo, u̱ hia Abimeleki.

²¹Tsô Yotam yevese kar kera yem ken Beer, za tema ker, sha ci u cian Abimeleki anngô na la.

²²Abimeleki tema tor sha Iserael anyom atar.

²³Tsô Aôndo tindi jijingi u bo hen atô u Abimeleki vea ior mba Shekem; nahan ior mba Shekem kera lu ishima i môm a Abimeleki ga;

²⁴sha ci u kwagh u aperagh u i er ônov mba Yerubaal akunduatargber mba i haa awambe ve inya la, a̱ hide sha ityough ki Abimeleki, anngô ve, u a wua ve la, man sha ior mba Shekem mba ve taver un ishima sha u a̱ wua anngôôv nav la.

²⁵Ior mba Shekem ver ior mba numun gbenda sha iwo, ve za kegh un; mba ve karen gbenda la cii, ve num ve; tsô i ôr Abimeleki nahan.

²⁶Tsô Gaal wan u Ebedi, va a anngôôv nav kar za hen Shekem; ior mba Shekem suur sha a na.

²⁷Ve yem ken sule ve za zôr atam a wain, ve kam, ve er iniongo, ve nyôr ken iyou i aôndo ve, ve ya, ve ma, ve gba tuhwan Abimeleki.

²⁸Tsô Gaal wan u Ebedi kaa er: Ka an je nan lu Abimeleki, u se Shekem sé civir unu? Ka wan u Yerubaal ne gaa? Man Sebul ka ititor na gaa? Civir nen ior mba Hamor, ter u Shekem, inja na nan man se sé civir unu?

²⁹Ior mban vea lu sha ikev yam yô, ma m zende Abimeleki kera. Tsô a ôr kwagh sha kwagh u Abimeleki la er: Gba seer mbautyav ou tsô, due va.

³⁰Er Sebul ititor i gar ungwa kwaghôron u Gaal wan u Ebedi la yô, maa ishima vihi un;

³¹nahan a tindi mbatyomov hen Abimeleki myer, a kaa er: Nenge, Gaal wan u Ebedi a anngôôv nav ve va hen Shekem; yô, mba wan ior mba ken gar kwagh er ve̱ hendan kwagh a we.

³²Yô, mough tugh, we a ior mba ve lu a we, yer ken toho;

³³nahan pepe er iyange ka i due nahan la mough ta num sha gar; tsô zum u un a ior mba ve lu a na vea duen u nôngon ityav a we yô, ú er a ve er u nenge i doo u u eren la.

³⁴Tsô Abimeleki mough a ior mba ve lu a na imôngo cii, tugh, ve pav akum anyiin ve yer hen Shekem.

³⁵Tsô Gaal wan u Ebedi due, va tile hen hundagar; nahan Abimeleki mough a ior mba ve lu a na hen ijiir i ve yer la.

³⁶Zum u Gaal nenge a ior yô, a kaa a Sebul er: Nenge, ior mba hungwan sha iwo. Sebul gema kaa a na er: U nenge mure u iwoogh, yô, u ngu kaan wer ka ior.

³⁷Tsô Gaal kimbir kaan er: Nenge, ior mba hungwan hen atô u sule, ikum igen ngi van sha gbenda u kon u terebin u Meonenim la.

³⁸Tsô Sebul kaa a na er: Hegen yô, kwaghôron wou la shi ngu nana u u kaan wer, Abimeleki ka an je, u sé civir unu? Kera ka ior mba u laha ve la gaa? Due ase ahegen, za nôngo ityav a ve.

³⁹Tsô Gaal due hemen Mbashekem, nôngo ityav a Abimeleki.

⁴⁰Abimeleki zenda un, a yevese un; ior kpishi kpe ku u ishôm, zan zan ar hen hundagar je.

⁴¹Tsô Abimeleki tsa hen Aruma; Sebul gema zenda Gaal a anmgbianev nav er ve̱ de kera teman ken Shekem ga.

⁴²Sev mbu aven yô, ior due nyôr ken ikôngo; i ôr Abimeleki nahan.

⁴³Tsô a kua a ior a pav ve akum atar, a za yer ken toho; nengen er ior lu duen ken gar yô, a mough a ta num sha a ve, a hemba ve je.

⁴⁴Abimeleki kua akumaior a a lu a na imôngo la ve za sha hemen ayem, ve za tile hen hundagar; akumaior ahar ta sha mba ve lu ken ikôngo la cii, ve hemba ve.

⁴⁵Abimeleki shi nôngon ityav a gar la didi, a ngohol gar la je, a wua ior mba kimi; a yôhôl gar, a kpur bar ker.

⁴⁶Zum u ior mba gôgôyou u taven sha u Shekem cii, ve za ungwa gwa nahan yô, ve nyôr shin iyou i shin inya i ken iyou i Elberiti.

⁴⁷Tsô i kaa Abimeleki er: Ior mba gôgôyou u Shekem cii zua.

⁴⁸Nahan Abimeleki mough unde sha uwo u Salmon, un a ior mba ve lu a na ityô cii; Abimeleki tôô ijembe kôr sha uwe gber gbaakon môm, gbire sha vande, gema kaa a ior mba ve lu a na la er: Kwagh u ne nenge m er ne, ne kpaa er nen nahan fefa.

⁴⁹Kape ior mbagenev cii kpaa ve er la, hanma or gber gbaakon, dondo sha Abimeleki, va haa hen iyou i shin inya la, nande ve ker; nahan ior mba gôgôyou u Shekem la cii kpaa kpe; ior lu er dubu nahan, nomso man kasev.

⁵⁰Tsô Abimeleki za hen Tebeshi za haa afo a utya, nôngo a Tebeshi, ngohol un.

⁵¹Kpa gôgôyou u taven sha u taver lu ken gar la, nahan nomso man kasev yevese za nyôr ker, kua ior mba ken gar cii; ve wuhe hunda, ve lu ker, ve unde sha haav mbu gôgôyou la.

⁵²Tsô Abimeleki va hen gôgôyou la va nôngo ityav a na, a va ikua ikua a hunda u gôgôyou la, er una nande un sha usu.

⁵³Yô, kwase ugen ta Abimeleki anishwa sha ityou hembe un ityough.

⁵⁴Tsô a yila wanye na u tilin un ikav mbi utya fefa, a kaa a na er: Tsuwa sanker wou, wuam, sha er ior ve̱ de ôron kwagh sha a mo er: Ka kwase lu wua un, ga. Tsô wanye na la kuma un, maa a kpe.

⁵⁵Tsô ior mba Iserael mba nengen er Abimeleki a kpe yô, hanma or yem hen ya u nan.

⁵⁶Ka ape Aôndo or iyev sha kwaghbo u Abimeleki u a er ter na, sha ci u a wua anngôôv nav akunduatargber la;

⁵⁷man kwaghbo u ior mba Shekem cii kpaa, Aôndo or iyev sha a ve; ifan i Yotam wan u Yerubaal la, i kôr ve.