Read tiv Yuda 1 Bible Online

Yuda 1 - tiv bible

Yuda 1

¹Yuda kpan u Yesu Kristu man anngô u Yakobu her kpaa, ngu sughun mba i yer ve, ve doo Aôndo Ter ishima shi i lu kuran ve sha ci u Yesu Kristu la.

²I̱ seer ne mhôônom ma zungwen man bem man dooshima wuee.

³Ne mbadoon mo ishima, er m lu nôngon sha gbashima u ngeren ne kwagh u myom wase u se zough sha mi la yô, gba u me nger ne me wa ne kwagh keng mer, nôngon nen ityav tsung sha kwagh u jighjigh u nan u i na sha ikev i uicighanmbaiorov inie i môm la.

⁴Gadia ior mbagenev nyôr myer, ka mba i ver ve ngise je sha u á ôr ve ijir á na ve ibo ne yô, mba vende Aôndo mba gem mrumun u sha mhôôn u Aôndo wase hingir ve ijimba i eren, mba nyiman Yesu Kristu u A lu Tor wase man Ter wase, Un tswen ne.

⁵Kpa sarem pe umbur ne shin er ne vande fan kera nahan kpaa mer, Ter yima nongoior Na ken tar u Igipiti kpa A mase timin mba ve na jighjigh ga la.

⁶Mbatyomov mba Shaav mba ve kera wa iko sha tahav vev mbu i ver ve sha mi hiihii la ga, ve undu ijiir ve i teman jim la yô, ngu kuran ve ken uikangen ken ime i shin, gbem, sha ci u ijir i sha zegeyange la.

⁷Kape Sodom man Gomora man agar a a kase ve la kpaa ve lu eren idya shi ve lu eren sha asaren a sha gbaaôndo ga je la, i tsaha ve sha usu u tsôron, ve hingir ikav i tesen.

⁸Mban kpaa ka sha gbenda shon môm môm ne ve lu hôngor ayol a ve sha mnyam ma cien, ve lu vendan mbautahav, ve lu tuhwan mba ve engem la ye.

⁹Kpa Mikael ortyom u Sha u tamen la, zum u a lu nôngon a diabolo, lu kpelan ikom i Mose la yô, a kera cihi a ôr un ijir i sha mtoho ga, kpa a kaa er: Ter A̱ tsaha u.

¹⁰Ior mban gema mba tuhwan hanma kwagh u ve fe un ga yô, man akaa a ve kav a sha marami la er uzendenya mba fan kwagh ga nahan la, ka sha a je ve lu timin ye.

¹¹Kwagh á tser ve, gadia mba zenden sha gbenda u Kain, imeen i injar i Balaam la i hemba ve, ve tim sha mhendan u Koraki la.

¹²Mban ka acan ken uiniongo enev; mba gbe yan kwagh imôngo gbar gbar tsô, mba we ayol a ve iko tseegh, ka abeen a lun a ura ga, a ahumbe a karen a mi sha yô, ka ikon i lun a atam ga sha shighe u inyom i bee la, i kpe kwa har, i wuhe i kera.

¹³Ka agôndo a zegemnger a yemen iuuu, ka ve mbua hugh sha kunya ve ayol a ve, ka asan a tsumen gbenda, ka ior mba i ver angôghime sha ci ve gbem yô.

¹⁴Heno u a lu kov u sha utaankaruhar hii sha Adam la kpaa, ôr kwaghôron u profeti sha kwagh u mban, a kaa er: Ter va a uicighan Nav udubu udubu,

¹⁵sha u Una ôr ior cii ijir; mba ve vende Aôndo la cii Una na ve ibo sha aeren a ve a vendan Aôndo la cii, a ve er ve venda Aôndo la man shi sha akaaôron a vihin cii a mbaasorabo mba ve vende Aôndo la ve lu ôron sha a na yô.

¹⁶Mban ka mbagbanahon mba ma kwagh a kom ve ga, mba zenden sha asaren a ve ayol a ve, ijô ve ngi hagher sha akaaôron, mba nyohon zwa sha u zuan a mtsera.

¹⁷Kpa ne mbadoon mo ishima yô, umbur nen akaaôron a mbaapostoli mba Ter wase Yesu Kristu ve tsengaôron la.

¹⁸Ve kaa a ven er: Sha ayange a masejime mbanahantar vea lu, vea dondo asaren a ve ayol a ve a vendan Aôndo la.

¹⁹Ka mban je ve lu van a mbampav ye, ka mba ken iyol, mba a Jijingi ga.

²⁰Kpa ne mbadoon mo ishima yô, maan nen ayol a en ken icighanjighjigh wen u nan, eren nen msen ken Icighan Jijingi.

²¹Kuran nen ayol a en, luun nen ken dooshima u Aôndo. Kegh nen mhôônom ma zungwen ma Ter wase Yesu Kristu u a lu zan ken uma u tsôron la.

²²Man mba ve lu tan akpelan la yô, zungwe nen ve mhôônom.

²³Yima nen ve, tsuwe nen ve ken usu kera, mbagenev yô zungwe nen ve mhôônom a mciem iyol. Ikondo i i hôngor sha kwagh u iyolough la tsô kpaa nyagh nen i.

²⁴Un u A lu a agee a Una kura ne sha u né kera nôngo gbev ga shi Una ver ne né lu a acôghol iyol ga sha ishigh ki iengem Na a iember tsung je,

²⁵Aôndo u mtswen, Oryiman wase ken Yesu Kristu Ter wase ne, iengem i̱ lu i Na kua shagba man agee man tahav, je er kwagh lu a vande lun ga man hegen kpaa zan zan gbem sha won. Amen.