Read tiv Mpase U Yohane 21 Bible Online

Mpase U Yohane 21 - tiv bible

Mpase U Yohane 21

¹Tsô m nenge Sha u he man tar u he kpaa, gadia Sha u hiihii man tar u hiihii la kar kera, zegemnger kpaa kera lu ga.

²Shi m nenge icighangar, ka Yerusalem u he je la, lu senen Sha, a due her Aôndo, i sôr un er kwasehe u i er un hwe iyol sha ci u nom na yô.

³Shi m ungwa zegeimo due ken ikônough ki torough kila kaa er: Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve.

⁴Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.

⁵Un u A tema sha ikônough ki torough la kaa er: Nenge M ngu geman akaa cii hingir a he. Shi A kaa er: Nger, gadia akaaôron ne ka a jighjigh man ka a mimi kpaa.

⁶Shi A kaa a mo er: I kure ve! Mo M ngu Alefa man Omega, mhii man mkur. Or u imura i ker nan yô, Mo Me na nan mngerem ma imbormnger i uma la gbilin.

⁷Or u nan hembe yô, nana ya dyako sha akaa ne, Me lu Aôndo u nan, nan di kpaa nana lu wan Wam.

⁸Kpa mbaciankwagh man mbanan jighjigh ga, man mba kwagh ve a ndôhôr ishima la man mbawuanior man mbadyarev man mbaahiriv man mbacivirakombo man mbaerenaie cii, kwar ve ngu ken ber u a lu hian sha usu man sulfur, ka ku u sha uhar je la.

⁹Tsô u môm ken mbatyomov mba Shaav mba utaankaruhar mba ve lu a agbande ataankarahar a a iv a atsan a ataankarahar a masetyô la, a va ôr kwagh a mo, a kaa er: Va heen, m̱ tese u kwasehe, ka kwase u Waniyôngo je la.

¹⁰Tsô a yem a mo ken Jijingi a za a mo sha zegewo u taven Sha, a tesem icighangar, ka Yerusalem u he je la, lu senen Sha; a due her Aôndo,

¹¹lu a iengem i Aôndo je, iwanger na lu er ka iwen i injaa kpishi nahan, lu er iwen i yasepi i wanger er krusetalu nahan.

¹²Lu a zegegilgar u taven sha, shi lu a ihinda pue kar ihiar kpaa, mbatyomov mba Shaav pue kar uhar kpaa lu sha ihinda la. I nger ati sha mi, ka ikwe i Iserael pue kar ihiar je la.

¹³Vegher u sha ityoughkitaregh ihinda lu itiar, ken imbusutarimese ihinda lu itiar, ken imbusutariyan ihinda lu itiar man shin ityôtar kpaa ihinda lu itiar.

¹⁴Gilgar u gar la lu a amagh pue kar uhar, i nger ati pue kar ahar a mbaapostoli mba pue kar uhar mba Waniyôngo sha mi.

¹⁵Un u a lu ôron kwagh a mo la lu a iyiagh ki karen kwagh a mi ki sha zenaria, sha u una kar gar man ihinda na man ugilmbaagarev nav kpaa.

¹⁶Gar la lu akuku, iniembe na man igbanger na lu kwagh môm. Tsô a kar gar la sha iyiagh nagh ki karen kwagh a mi la, lu mail dubu môm man deri utaan. Iniembe na man igbanger na man ityaven na lu kwagh môm.

¹⁷Shi a kar gilgar na kpaa, lu aseva deri man akunduahar kar anyiin sha ikaren i or, ka u ortyom u Sha je la.

¹⁸I maa gilgar la sha awen a yasepi. Gar la lu zenaria eng er gelase u lun wang nahan.

¹⁹Amagh a gilgar u gar la i er hwe sha mi sha awen a injaa anza kposo kposo. Imagh ki hiihii lu yasepi, ki sha uhar lu safir, ki sha utar lu kalekido, ki sha unyiin lu semaragidu,

²⁰ki sha utaan lu sardoniku, ki sha ataratar lu sardiu, ki sha itiankarihiar lu krusetalu, ki sha anigheni lu beril, ki sha itiankarinyiin lu topashi, ki sha pue lu krusoperasu, ki sha pue kar môm lu hiakinto, ki sha pue kar uhar lu ametise.

²¹Ihinda pue kar ihiar la lu utagbede pue kar uhar. Hanma hunda tagbede môm jimin, igbenda i gar la lu zenaria eng, er gelase u ananene nahan.

²²Tempel yô, m nenge a mi ker ga, gadia ka Ter Aôndo Uhembanagee la A lu tempel na ye, man shi Waniyôngo kpaa ka imenger na.

²³Kwagh gba gar la a iyange shin uwer sha u ve̱ ta ker ga, gadia iengem i Aôndo ngi wanger ker, Waniyôngo kpaa ka imenger na.

²⁴Akuraior aa zenden ken iwanger na, utor mba shin tar kpaa ve nyôr a iengem ve ker.

²⁵Ihinda na kpaa á wuhen i atetan ga, gadia tugh mbua kera ile ker je ga.

²⁶Shi á va nyôr a iengem man icivir i akuraior ker kpaa.

²⁷Ma kwagh u lun wang ga shin ma or u eren akaa a ndôhôr ishima shin u eren aie vea nyôr ker ga, saa mba i nger ve ken ruamabera u uma u Waniyôngo la vea nyôr ker ye.