Read tiv Mpase U Yohane 3 Bible Online

Mpase U Yohane 3 - tiv bible

Mpase U Yohane 3

¹Nger hen ortyom u nongo u Kristu u Sardisu wer: Un u A lu a ujijingi mba utaankaruhar mba Aôndo man asan ataankarahar la, ngu ôron akaa ne nahan er: M fa aeren a ou, u ngu a iti i i kaan er u ngu uma, kpa u gema u ngu kpenegh je.

²Lu per, taver akaa a a shi her a a sôôn u kpen la. M kar aeren a ou sha ishigh ki Aôndo Wam a iv kuma ga.

³Nahan yô, umbur akaa a u ngohol shi u ongo a la, kusu a, gema ishima. Aluer u lu per ga yô, Me va er ormbaiv nahan, ú fa shighe u Me va hen a we ga.

⁴Nahan kpaa u ngu a ati agen ken Sardisu her kpeghee, ka ior mba ve hôngor akondo a ve ga yô. Vea zende a Mo a akondo a pupuu iyol, gadia ve kuma.

⁵Or u nan hembe yô, kape á haa nan akondo a pupuu iyol je la, man Me ese iti i nan ken ruamabera u uma kera je ga, kpa Me pase iti i nan sha ishigh ki Terem man sha ishigh ki mbatyomov Nav kpaa.

⁶Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô.

⁷Nger hen ortyom u nongo u Kristu u hen Filadelfia wer: Un u A lu icighan, A lu u mimi, u A lu a ishindan i Davidi la, Una bugh yô, ma or nana kera senda ga, Una senda yô, ma or nana kera bugh ga la, ngu ôron akaa ne nahan er:

⁸M fa aeren a ou. Nenge, M ver hunda ivegher sha ishigh you, ma or nana fatyô u sendan u ga. Gadia u ngu a anagee kpeghee, kpa u kusu kwaghôron Wam, u kera nyiman iti Yam ga.

⁹Nenge, Me na, mba ken shinagoge u Satan mba ve yer ayol a ve er Mbayuda kpa i lu nahan ga i lu aie tsô ve eren la, Me na, vea va gure inya hen angahar a ou, vea va rumun er u doom ishima yô.

¹⁰Er u kor kwaghôron u ishimawan Yam yô, Mo kpaa Me kura u shighe u imeen i i lu van sha tar cii sha u karen mba ve tem sha tar yô.

¹¹M ngu van fefa. Kusu kwagh u u lu a mi la gbang gbang sha u ma or nana̱ de ngohol we tsar ga yô.

¹²Or u nan hembe yô, Me gema nan nana hingir ityughunugh ken tempel u Aôndo Wam, nana kera due ker mayange ga, shi Me nger iti i Aôndo Wam sha a nan man shi iti i gar u Aôndo Wam, ka Yerusalem u he u a lu senen Sha, a dugh hen Aôndo Wam la, kua shi iti Yam i he kpaa.

¹³Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô.

¹⁴Nger hen ortyom u nongo u Kristu u hen Laodishia wer: Un u a lu Amen, Orshiada u jighjigh man u mimi, mhii u igbetar i Aôndo ngu ôron akaa ne nahan er:

¹⁵M fa aeren a ou, u ndôhôr ga, u tsee kpaa ga. Ma u ndôhôr, gayô, ma u tsee!

¹⁶Nahan yô, er u sagh a sagh yô, u tsee ga, u ndôhôr kpaa ga yô, Me haa u ken zwa Wam kera er ijer nahan.

¹⁷Gadia u ngu kaan wer, m ngee a akaa, m hingir u lun a kwagh ave kpishi, ma kwagh kera banem ga, kpa u kera fa er u gbe kera, u lu mhôônom mhôônom, u kungu ican, u pir ashe, u lu idyelegh kpaa ga.

¹⁸M ngu wasen we henen Mer, yam kwagh a Mo, yam zenaria u i ser sha usu sha er ú ngee a kwagh yô, man shi akondo a pupuu sha er ú haa a iyol, kunya u idyelegh wou u̱ de dugh ken igbar ga yô, man shi icigh ki shighen sha ashe a ou sha er ú nenge kera yô.

¹⁹Mo yô, mba ve doom cii ka M tsaha ve shi M kôôm ve kpaa, nahan yô, ver ishima, gema ishima.

²⁰Nenge, M ngu tilen sha hunda, M ngu manden uwegh. Aluer or nana ungwa imo Yam nana bugh hunda yô, Me nyôr hen a nan, Me ya kwaghyan a nan imôngo, nan di kpaa, a Mo imôngo.

²¹Or u nan hembe yô, Me na nana tema a Mo imôngo sha ikônough Yagh ki torough di er Mo kpaa M hembe man M tem a Terem imôngo sha ikônough Nagh ki torough nahan.

²²Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô.