Read tiv Mpase U Yohane 6 Bible Online

Mpase U Yohane 6 - tiv bible

Mpase U Yohane 6

¹Man m nenge zum u Waniyôngo bugh ikav i môm ken akav ataankarahar la, m ungwa u môm u ken akaauma a anyiin la lu ôron kwagh er ka imo i idyuran nahan er: Va yôô!

²M veren ashe yô, nenge, nyinya u pupuu lu. Un u a tema sha mi la, lu a ada; shi i na un tsar u sha ityou kpaa. A due, lu hemban, man lu sha u una hemba kpaa.

³Zum u A bugh ikav i sha uhar yô, m ungwa kwaghuma u sha uhar kaa er: Va yôô!

⁴Tsô nyinya ugen due nyian bong; man un u a tema sha mi la, i na un sha u a̱ kura bem shin tar kera, ior ve̱ wua ayol a ve; i na un zegesanker.

⁵Zum u A bugh ikav i sha utar yô, m ungwa kwaghuma u sha utar kaa er: Va yôô! Tsô m veren ashe yô, nenge, nyinya u il lu, man un u a tema sha mi la lu a iyôgh ki karen kwagh a mi sha uwe.

⁶Man m ungwa kwagh er ka imo nahan ken atô u akaauma a anyiin la lu kaan er: Ikaren i alakema ka gbengersule, uikaren mba shair utar kpaa ka gbengersule, man mkurem kua wain yô, de vihin ve kera ga.

⁷Zum u A bugh ikav i sha unyiin yô, m ungwa kwaghuma u sha unyiin la kaa er: Va yôô!

⁸Tsô nenge, nyinya u fung lu, un u a tema sha mi la, iti na er ku, hade lu zan a na ityô, man i na ve tahav sha tiôn môm u ken atôôn anyiin a taregh, sha u ve̱ wua sha sanker man sha ijen man sha bouange man sha inyamikume i shin tar.

⁹Zum u A bugh ikav i sha utaan la m nenge a uuma mba ior mba i wua ve sha ci u kwaghôron u Aôndo man shi sha ci u shiada u ve lu eren la, ve lu shin atô a atse a nanden nagh sha mi la.

¹⁰Ve genger imo ve kaa er: We Ter, icighan man u mimi kpaa, shi nan je man U ôr ijir U or iyev sha awambe ase sha mba ve lu shin tar laa?

¹¹Tsô i na hanmô ve riga u pupuu man i kaa a ve er, ve̱ hira tile kpuaa zan zan i iv iyenge i mba ve lu akar a ve a tom man anmgbianev vev kpaa mba á va wua ve er lu i wua ve nahan la.

¹²Man zum u A bugh ikav i sha ataratar la, m ver ashe yô, nenge, tar tenger kpen kpen, iyange hingir il er ibashôhô u lun shuwa shuwa nahan, uwer jimin cii hingir er ka awambe nahan.

¹³Asan a sha aôndo osough haa shin tar er tur ka a ndoor atam a na a kô zum u ahumbe a taveraa ka a va tenger un nahan,

¹⁴kwavaôndo kpaa pav gba huren er ka i hure ihurenruamabera nahan, hanma uwo man hanma icile kpaa i mough a ve sha ajiir a ve kera.

¹⁵Utor mba sha won kua ashagbaior man utormbautyav mba tamen man mbanyarev man mbaageev man hanma or cii, shin kpan shin wan kpaa, ve yer ken ubar man ken awen a sha iwo.

¹⁶Ve kaa a iwo man a awen er, gba kighir nen se, yisa nen se sha ishigh ki Un u A tem sha ikônough ki torough la man shi sha iyugh i Waniyôngo kpaa,

¹⁷gadia zegeiyange u iyugh Na kuma ve, ka an je nana fatyô u tilen sha?